رێبوار حەمەلاو شوانی
ئەگەر ئاوڕێک لە مێژووی خەباتی گەلی کورد بدەینەوە، نەیارەکانی کورد لەسەر هەموو مافێکی نەتەوەیی سازشیانکردووە، بەڵام کەرکووک ئەو شارە کوردستانییە بووە کە نەک وەک خاک و بەشێک لە خاکی کوردستان نەیانبینیوە، بگرە هەوڵی تەواویشیان داوە کوردە رەسەنەکەی بە شێوەی راگواستن و گۆڕینی ناسنامەی نەتەوەیی بکەنە کەمینە، بۆیە لە سەرەتای شۆڕشی نوێی گەلەکەمانەوە لە هیچ دۆخێکدا سازشی لەسەر بستێک خاک و مافی خەڵکەکەی نەکردووە، بڕواشی بە پێکەوەژیانی سەرجەم نەتەوە و ئایین و مەزهەبەکان بووە، بەڵام لە چوارچێوەی کەرکووکی کوردستانیدا.
هەموو ئاماژەکان دەرخەری ئەو راستییەن کە کەرکووک و کەرکووکییەکان لەلایەک ولایەکی تریش هێزولایەنە کوردستانییەکان و بەتایبەت پارتی دیموکراتی کوردستان لە بەردەم قۆناغێکی هەستیار و ئەرک و بەرپرسیار گرنگ و چارەنووسساز دان بەتایبەت دوای 6 لە ساڵی سەخت و دژوار کە جگە لە وێرانکاری و پرۆسەیەکی دیکەی بە عەرەبکردن و ڕاگواستنێکی نوێدان بوو لەلایەن ئەو گروپ و لایەنە فاشیزم و شۆڤێنیانەی کە بەدرێژایی سەدی رابردوو و لەم بیست ساڵەش دا ئامادەی پێکەوەژیانی ئاشتیانە و ئاساییکردنەوەی رەوشی ئەو ناوچە کوردستانییە گرنگە نەبووە و ڕێگربوونە لە جێبەجێکردنی دەستوور و چارەسەری.
بۆیە لە دوای شانزە ساڵ لە هەڵبژاردنی ئەنجومەنی پارێزگاکان وابڕیارە لە رۆژی 18/12/2023 دووەم هەڵبژاردن بۆ ئەنجومەنێکی نوێ بکرێت، باشترین دەرفەتە لەبەردەم گەلی کورددا، تا کەرکوک و ناوچە جێناکۆکەکان بگەڕێنێتەوە باوەشی هەرێمی کوردستان، ئەگەر ئەو هەڵبژاردنە بۆ پارێزگاکانی تری عیراق ئاسایی بێت، ئەوا بۆ کەرکووک و کورد چارەنووسسازە و سەلماندنی خاوەندارێتی خاکەکەشە و سەندنەوەی مافە بۆ خاوەن ماف، هەر ئەوەندەش نا، بگرە بۆ پێگەی هەرێمی کوردستانیش گێڕانەوەی سەنگە چ لەسەر ئاستی ناوخۆیی عیراق و چ لەسەر ئاستی نێودەوڵەتی.
هەڵبژاردنی رۆژی 18ی مانگی 2023ی پارێزگاکانی عێراق، بەتایبەتی کەرکووکی دڵی کوردستان وبە بەشداری چەندین لایەنەی سیاسی هەر لە کەرکووکەوە تا کو شەنگال کە لە زۆرێک ئەو ناوچانەیش بەشێکیان خاکی کوردستان و بەشێکیش کوردی تێیدا نیشتەجێ و جێنیشین ، گرنگ و جێگەی بایەخن و پێوستە زۆر هوشیارانە و کوردپەوەرانە مامەڵە بکەین و ڕێگریش لە هەموو جۆرە هەوڵێک بگرین تا نەیارانی کورد دەنگەکانی کورد بۆ مەبەستی تایبەتی خۆیان بەتاڵان ببەن ، خەڵکی ئەو ناوچاننە دەنگەکانیان بەو کاندیدە کوردانە بدەن کە لە سبەی داکۆکیکار و پارێزەریی مافەرەواکانیانن بەتایبەتی کەرکووک کە لە دوای ساڵی 2005وە ، بۆ جاری دووەهەمینە هەڵبژاردنی تێیدا بەڕێوە بچێت ، ئەو کاتە لیستی برایەتی بوو کە خاوەنی لە کۆی 41 کورسی ئەنجوومەنی پاڕێزگاکە توانی 26 كورسی ئەنجوومەنی پارێزگار بەدەستهێنێت و ڕێژەی دەنگەكانی 63.41 % بوو. ئێستا ژمارەی كورسییەكانی كەمكراوەتەوە بۆ 15 كورسی و یەك كورسی بۆ پێكهاتەی كریستیانەكان.هەروەها لە هەڵبژاردنی ساڵی 2021 لە کۆی 12 کورسی پەرلەمانی گەلی کورد توانی 6 كورسی پەرلەمانی بەدەست بێنێت و161 هەزار دەنگ بباتەوە كە دەكاتە 39% ـی دەنگەكانی ئەو هەڵبژاردنە.
هەڵبژاردنی ئەمجارە پارێزگای کەرکووک لەو رووەوە گرنگە بۆ داهاتووی كەركووك بەتایبەتی بۆ دیاریكردنی پارێزگاری داهاتوو بۆ کەرکووکییەکان ، بەتایبەت کە لەماوەی شەش ساڵی رابردوو پارێزگارێكی داسەپاو و شۆڤێنی و بە بە پشتیوانیی گروپ و میلیشیاکانی ستەمکاری زۆر بەرامبەر بە کەرکووک وکەرکووکییە ڕەسەنەکانی و کورد لە شارەکە و دەوروبەری دەكرێت . بەداخەوە لایەنە كوردستانییەكان لە پاریێزگای كەركوك نەیانتوانی پێكەوە و بەیەك لیست بەشداری بكەن و ئەمەش ڕەنگە كاریگەریی نەرێنی هەبێت. دەکرێ لەو روانگەیەوە بڵێین کەرکووک شادەماری پێگەی خاک و خەڵکی کوردستانە بە گشتی، دەنگدان بە لیستە کوردستانییەکان و کاندیدە کوردەکان هیچی کەمتر نییە لەو پێشمەرگەیەی لە سەنگەردا گیانی خۆی فیدای خاک و گەلەکەی کردووە و دەکات، بە تایبەتی دەنگدان بە لیستی 197ی پارتی دیموکراتی کوردستان ، دەبێتە هێزووزەی و ئیرادە بۆ کەرکووکییەکان ، چونکە پارتی تاکە حیزبی کوردستانە کە لە هیچ بارودۆخێکدا خاک و خەڵکی کەرکووکی بە جێنەهێشتووە، بەتایبەت کە بۆ ئەم هەڵبژاردنە چارەنووسسازە پارتی بەهەموو تواناوە ئامادەکاری کردووە لە پێناو سەرکەوتنی کەرکووک وکەرکووکییەکان هەڵبژاردنی پارێزگارێکی نیشتیمانپەوری نوێی لە پێناو خزمەتکردنی هەموو چین و توێژەکان و سڕینەوەی ئاسەواری ستەمکاری و شۆڤێنییەکان و سەقامگیری و ئۆقڕەیی .بەتایبەتی کە کەرکووک وکەرکووکییەکان ، پارتی بە ئاڵاهەڵگری سەرڕاستی کوردستانیبوونی کەرکووک لە رابردوو و ئێستا و ئایندە دەبینن
