“ئەگەر هونەر نەبێتە بژێوی بۆ هونەرمەندان، ئەوە بەرەو داڕمان دەچێت”
“هونەر پێویستی بە پاڵپشتی هەیە، بۆ ئەوەی بگاتەوە بە لوتكەی ڕەسەنایەتی خۆی”
“هونەر لە كوردستان زۆر كاڵبۆتەوەو بەرەو تونێلێكی تاریك دەڕوات”
بەختیار سەباح-زاری كرمانجی:
هونەرمەندانی بواری شێوەكاری و میوزیك لە كوردستان، بۆچوونی جیاوازیان هەیە لەبارەی دۆخی هونەر لە كوردستان و گرینگی دان بە دەزگا ئەكادیمی و هونەرییەكان، تێڕوانینی كۆمەڵگە بۆ هونەر، هەر وەك دەڵێن “ئەگەر هونەر نەبێتە بژێوی ژیانی هونەرمەند، ئەوە بەرەو داڕمان دەچێت و هونەر لە كوردستان زۆر كاڵبۆتەوەو بەرەو تونێلێكی تاریك دەڕوات”.
هادی فەتاح، وەك هونەرمەندێكی شێوەكار لە شاری سلێمانی لەبارەی دۆخی ئێستای هونەر لە كوردستان بۆ زاری كرمانجی گووتی: “هونەر لە هەر جێگایەكی ئەم جیهانە نەبێتە هۆكاری بژێوی بۆ هونەرمەندەكە، ئەوە هونەر بەرەو داڕمان دەچێت، چونكە كاری هونەری سەرقاڵی زۆری دەوێت و كاری زۆری پێویستە، بۆیە ئەگەر بژێوی ژیان دابین نەكات، ناچار دەبی بە شوێن كاری تردا بگەڕێیت”.
بە بۆچوونی دڵشاد ئیبڕاهیم، وەك هونەرمەندێكی شێوەكاری شاری هەولێر، “ئاستی هونەر لە كوردستان زۆر كاڵبۆتەوەو بەرەو تونێلێكی تاریك دەڕوات”. ئەمەش دەگەڕێنێتەوە بۆ چەند هۆكارێك لەوانە، نەبوونی یەكڕیزی و پەرتەوازەیی لە نێوان هونەرمەندان، نەبوونی ئاستی ڕۆشەنبیریی بۆ هونەر، هەروەها بایەخ نەدان بە پەروەردەی هونەر لە قوتابخانەكان و پێشاندانی بەرهەمی لاواز، كە وادەكات بینەر زەوق و سەلیقەی هونەری لەدەست بدات.
هونەرمەند هادی فتاح، زیاتر قسەی كردو گووتی، لە كوردستان هونەری شێوەكاری و شانۆ هیچ دەرامەتێكی وای نییە، كە هاندەری كەسەكە بێت بۆ بەردەوامی لە كارەكەی، لە خوێندنگاكانیش هیچ گرنگییەكی ئەوتۆی پێنادرێ، لەبەر ئەوە خوازیاری كەم دەبێت و دەبێتە هۆی دووركەوتنەوە لە هونەر.
دڵشاد ئیبڕاهیم، لەبارەی گرینگی دەزگا هونەری و ئەكادیمیەكان و لایەنی پەیوەندار لە كوردستان، ئاماژەی بەوەكرد، نەبوونی فلتەری هونەری لەلایەن وەزارەتی ڕۆشنبیری، یەكێكە لە گرفتەكانی دیكەی بەردەم كاری هونەری، كە پێیوستە بەرهەمی ئەكادیمی نمایش بكات و رێگری لە بەرهەمی لاواز بگرن، هەروەها پێویستە پەیمانگەی هونەرە جوانەكان هونەرمەندی ئەكادیمی دروستبكەن، تەنیا پێدانی بڕوانامە نەبێ.
“لاوازی سەنتەرو ڕێكخراوە هونەرییەكان و نەبوونی چالاكی هونەری بە شێوازێكی ئەكادیمی، هەروەها نەبوونی قوتابخانەیەكی هونەری كوردی، تا ئێستە ڕێبازێكی تایبەت بە خۆمان نییە، هونەرەكانمان وەرگیراوو لاساییكردنەوەیە”. هونەرمەند دڵشاد وایگووت.
نەبەز تۆفیق، مامۆستای میوزیك لە پەیمانگەی هونەرە جوانەكانی ڕواندز، لەبارەی دۆخی هونەر لە كوردستان گووتی ” بە شێوەیەكی گشتی هونەر لە پاشەكشەدا نییە، بەڵكو لە حاڵەتی سڕبوون دایە، بەهۆی ئەو هۆكارە جیاوازانەی بەسەر كوردستاندا هاتووە”.
گووتیشی، هونەر هەمیشە زیندووە، بەڵام پێویستی بە هاوكاری و پاڵپشتی ماددی مەعنەوی هەیە، بۆ ئەوەی بگاتەوە بە لوتكەی ڕەسەنایەتی خۆی.
