مەهدی محەممەد – زاری كرمانجی:
ڕێژەی ئەنجامدانی تاوان لە دوو ساڵی ڕابردوو، عێراقی خستووەتە پلەی هەشتەمی جیهانی و دووەمی كیشوەری ئاسیا.
ئەمساڵ بەراورد بە دوو ساڵی ڕابردوو، ڕێژەی ئەنجامدانی تاوان لە عێراق زیادی كردووە، ئەمە لە كاتێكدا ساڵی 2021 ڕێژەی تاوان 7.05 بوو، بەڵام ئەمساڵ ڕێژەكە بەرز بووەتەوە بۆ 7.13 پلە و لە كۆی 193 وڵاتی جیهان عێراق لە ڕیزبەندی هەشتەم دایە و پلەی دووەمی لە كۆی 46 وڵاتی كیشوەری ئاسیای وەرگرتووە و لە 14 وڵاتی هەرێمی ڕۆژئاوایی ئاسیا لە پلەی یەكەم دێت.
كەناڵی ABC عێراقی باس لە جۆری ئەو تاوانانەش دەكات كە عێراقی گیرۆدە كردووە و تاوانەكانیش لە بازرگانیكردن بە مرۆڤ و ڕفاندن و قاچاخچیتی و زەوتكردن و بازرگانیكردن بە كاڵای ساختە بگرە تا دەگاتە بازرگانیكردن بە ماددە هۆشبەرەكان.
