چیرۆكی ئەو ئافرەتە كارمەندەی تاقیگەی ئاشتی سۆران كە لە باڵەخانەكەی شاری سۆران گیانی لەدەستدا
راپۆرت
شەهلا رەشید
محەمەد هەسنانی
كاتێك وەك تیمی زاری كرمانجی سەردانی تاقیگەی نەخۆشخانەی ئاشتی فێركاری سۆرانمان كرد، پزیشك و كارمەندانی بەشەكە پەشێوی و نیگەرانی زۆریان پێوەدیاربوو، ئەوان خەفەتبار بوون بۆ لەدەستدانی هاوپیشەكەیان (رەنا وەحید) كە ماوەی زیاتر لە 10 ساڵە لەگەڵ زۆربەیان لەم بەشەدا خزمەت دەكات، بەدەم گریانەوە باسیان لە دلسۆزی و خەمخۆری ئەم كچە دەكرد”.
بەقسەی كارمەندانی بەشەكە جگە لە كاری تاقیگەو خزمەتكردنی بەردەوامی خەڵك، هەروەها ئافرەتێكی دەستكراوە بووە مانگانە لەكاتی وەرگرتنی مووچەكەی بڕێك پارەی بەخشیوە بە كەسانی هەژار و كەمدەرامەت، هەروەها كەسێكی نەرم و نیان و خاوەن ڕەوشت و دڵفراوان بووە، لەگەڵ كارمەندان و ئەو نەخۆشانەی ڕوویان لە تاقیگە دەكرد، لەگەڵ ئەوەشدا بەردەوام بایەخی بە تەندروستی خۆی داوە كە زۆربەی رۆژەكان بە پیادا لە ماڵەكەی ڕووی كردووەتە نەخۆشخانە”.
هەروەك ئەسعەد قادر، كارمەندی بەشی تاقیگە، زۆر پەرۆش و خەمبار بوو بە لەدەستدانی هاوپیشەكەیان و نیگەران بوو بەوەی كە مەرگ چیتر رێگەی نەدا لەگەڵ ئەوان و خزمەتكردن بەردەوام بێت، لەكاتێكدا هەمیشه ئافرەتێك بووە بە گەشبینییەوە دەیڕوانیە ئایندەو خەون و هیوای زۆری هەبوو كە لەداهاتوودا كاریان لەسەر بكات و خزمەت بە كۆمەڵگە بكات”.
ئاشكراشی كرد: ” كە ڕەنا وەحید، لەگەڵ چەند كارمەندێكی بەشەكەی قوڕعەی مانگانەی كردووەو تەنها دوو مانگ مابوو نۆرەی ئەو بێت، كەچی كۆچی ئەبەدی رێگەی پێنەداو بۆ یەكجاری ماڵئاوای لە هەمووان كرد و بۆ هەمیشە ناوی لای ئێمە بە زیندوو دەمێنێتەوە.
هۆگر حسێن، دەرچووی بەشی بایۆلۆجی و كارمەندلە تاقیگەی نەخۆشخانەی ئاشتی فێركاری سۆران، بە خەفەت و چاوی پڕ گریانەوە بە زاری كرمانجی ڕاگەیاند” بەداخەوە لە كارەساتی شەوی ڕابردوو یەكێك لە هاوپیشە هەرە دڵسۆزەكان و كارمەندی بەشی كیمیایی تاقیگەكەمان بەناوی (رەنا واحید دەحام) لە دەستدا، ئەو دەرچووی كۆلیژی زانستی بەشی كیمیا و هەڵگری بڕوانامەی ماستەر بوو، هەروەها بە ڕەگەز عەرەب بوو و خەڵكی شاری دیالە زیاتر لە 10 ساڵە نیشتەجێی شاری سۆرانن، لە خێزانێكی پێشكەوتوو و خوێندەوار بوو و هەموویان خاوەن بڕوانامەی بەرزن، جگە لە خۆی برایەكی و خوشكی و دایكیشی لەم كارەساتەدا گیانیان لەدەستدا.
گووتیشی” رەنا لە دایكبووی ساڵی 1981ە و لەساڵی 2012 وەك كارمەند لە تاقیگەی نەخۆشخانەی فێركاری سۆران كاری كردووە، دواتر كە نەخۆشخانەی ئاشتی دامەزرا لەوێ دەستبەكار بوو، ئەو كەسێكی زۆر دڵسۆز هەم بۆ پیشەكەی هەمیش بۆ نەخۆش و هاوپیشەكانی، لە ماوەی ئەم هەموو ساڵەی كە كاری كردووە دڵی هیچ یەك لە كارمەندەكان لێی نەڕەنجاوە، كەسێكی دەروون جوان بوو هەروەها جاری وا هەبوو كە دەوامیش تەواو دەبوو و نەخۆشێك هاتبا ئەو خزمەتی دەكرد و لای ئەو گرنگترین شت خزمەتكردنە بە هاووڵاتییان و ئەركەكەی خۆی بە پیرۆز دەزانی”.
ئەوەش دەخاتەڕوو: ” نێوانی لەگەڵ ئێمەی كارمەندان زۆر باشبوو، هەروەها هەمیشە لە بوونەكانی وەك نەورۆز و جەژنە نەتەوەییەكان و ڕۆژی جلی كوردی و هەموو ئەوانەی پەیوەندی بە كولتووری كوردەوە هەبوو بەشداری دەكرد بە جل و بەرگی كوردی، ئەو كەسێك بوو بە هەزاران وشە پێناسەی ناكرێت، لەبەر ئەوەی ئەو نموونەی دڵسۆزی و خەمخۆری بوو بەرامبەر كارو و پیشەكەی.
