مەترسی بەریەككەوتنی چەكدار لە نێو هێزە عێراقییەكان هەیە

دوای هەڕەشەكانی هێزی ئەمریكا لە حكومەتی محەمەد شیاع سودانی، لەئەگەری رانەگرتنی ئەو هێرشانەی لە لایەن هێزەكانی سەربە ئێرانەوە دەكرێتە سەریان، وەڵامی توندیان دەبێت، كێشە كەوتۆتە نێوان هێز و گرووپەكانی نێو حەشدی شەعبی و هەندێكیان پێیانوایە دەبێ رێگە لە هێرشەكان بۆ سەر هێزەكانی ئەمریكا بگیرێت، هەندێكشیان پێیانوایە ناكرێت پابەندی خواستی ئەمریكا بن و هێرشەكان نەوەستێنن.
ئەم دوو ئاراستە لە بیر كردنەوە وای كردووە كە حكومەتی سودانی و چوارچێوەی هەماهەنگی ئەو هێزانەی كە پابەندی بڕیارەكانی راگرتنی هێرشكردنەسەر هێزەكانی ئەمریكا نین، پەراوێز بخرێن، لە نێویشیاندا كەتیبەكانی حزبولڵا و مەقاوەمەی ئیسلامی.
ئەم گوشارەی سودانی وایكردووە كە ناكۆكییەكان لە نێو لایەنە شیعەكان گەشە بكات و ئەگەری بەریەككەوتنی سەربازی لە نێو ئەو گرووپانە لە ئارادایە.
بە تایبەتی لە چەند رۆژی رابردوو لە هێرشێكی هێزەكانی ئەمریكا چەندین هێزی سەربە حەشدی شەعبی لە شارە جیاكانی عێراق كوژران.