موڕشید برادۆستی – سۆران:
لە رۆژانی رابردوو، ژمارەیەك دەرچووی زانكۆ و پەیمانگە لە بەڕێوەبەرایەتی وەبەرهێنانی سۆران بە شێوەی گرێبەست دامەزراون، ئەمەش ناڕەزایی دەرچووانی دیكەی لێ كەوتۆتەوە و پێییان وایە دامەزراندنەكە نا دادی تێدابووە، بەڕێوەبەری وەبەرهێنانیش لە رێگەی زاری كرمانجی روون كردنەوە دەدات.
دڵڤان عومەر بەڕێوەبەری وەبەرهێنانی ئیدارەی سۆران، بە زاری كرمانجی گووت:” دوای ئەوەی سۆران بووە ئیدارەی سەربەخۆ و بەڕێوەبەرایەتی وەبەرهێنانی لێ كرایەوە، بە مەبەستی دابین كردنی میلاك، پێویستیمان بە ژمارەیەك كەس و 13 پسپۆڕی هەبوو، هەر ئەو كات لە پەیجی وەبەرهێنان بڵاومان كردەوە كە دامەزراندن بە شێوەی گرێبەست لە بەڕێوەبەرایەتییەكەمان هەیە و لە رێگەی فۆڕمی ئۆنلاین هەر كەس ئارەزووی هەیە بە پێی مەرجەكان دەتوانن داواكاری دامەزراندن پێشكەش بكەن.
بەڕێوەبەری وەبەرهێنانی سۆران، دەڵێت:” نزیكەی چوار هەزار كەس داواكاری و سیڤیان بۆ دامەزراندنی گرێبەست لە بەڕێوەبەرایەتییمان پێشكەش كرد، لەو رێژەیە ئێمە تەنها 24 كەسمان دەویست، بەهۆی زۆری رێژەی سیڤیەكان نەمان توانی چاوپێكەوتن لەگەڵ هەموو ئەو كەسانە بكەین، دامەزراندنەكەش بە نوێنەرایەتی ئیدارەی سەربەخۆ و دەستە سەرپەرشتییان كردووە و لیژنەیەك بۆ ئەم مەبەستە پێكهێنرابوو، دوور لە هەموو واستە و واستەكاری و دەستێوەردانێك دامەرزاندنەكە بەشەفافی ئەنجامدراوە و تەنانەت كچە پێشمەرگە و شەهیدیشی تێدایە.
دلڤان عومەر، دووپاتی كردەوە:” رێژەی دامەزراندنەكە لە ئاست داوكارییەكان زۆر كەمبوو، بۆیە ئەو نارەزاییە دروست بووە، ئەگەرنا هیچ كارێكی ناداد پەروەرانە لە دامەزراندنەكە نەكراوە، هەر كەسێكیش تێبینی هەیە لەسەر ئەو دامەزراندنە با سەردانی بەڕێوەبەرایەتییمان بكات “.
دوای دروستبوونی ئیدارەی سەربەخۆ و هێنانە كایەی بەڕێوەبەرایەتییەكان، تا ئێستا تەنها 24 كەس بۆ وەبەرهێنانی سۆران دامەزێندراون، ئەوانی دیكە بە شێوەی گواستنەوەی راژە سوود لە فەرمانبەر و كەسانی پسپۆڕ وەرگیراوە .
