ئیسماعیل ئیبڕاهیم
كاتێ كادیرێكی ئیسلامی سیاسی قەتیسماوە لە نێو ئایدۆلۆژیایەكی كۆنەپەرستانە، بە بەرگێكی نوێی سەردەمی مۆدێرنەوە بیەوێت رووی كۆمەڵگە بەو ئاڕاستەیە بەرێت كە مەبەستێتی، تا بتوانێت بەشە كێكی خۆی لە جیهانی سیاسی بەرێت، لەسەر هەر بابەتێك دەریچەیەك بۆ قسە كردن دەدۆزێتەوە بۆ ئەوەی بڵێت “منیش هەم و بەرگری لە پیرۆزییەكان دەكەم”، ئەمەش مافی خۆیانە و جوانی پێكەوە ژیان و یەكتر قبوڵكردن لە نیشتمان نمایش دەكات.
لەو پێشهاتانەی لە كوردستان یا ناوچەكە بە گشتی دێنە ئاراوە، بۆ خۆهێشتنەوە لە نێو هزری ئەو كەسانەی هێشتا بە ئاوازی لێوان لێو لە خورافاتی چەق بەستوو و سیناریۆ بۆ دارێژراو ماونەتەوە، بەراورد كردنێك هەمیشە دێتە ئاراوە، تەنها بۆ ئەوەی بڵێن هەین، یا بۆ ئەوەی هەمیشە موریدانی هزر بازنەیی لە دەووریان بسووڕێنەوە و ئەوانیش ئیستیسماری خۆیانی لەسەر بكەن.
بۆ نموونە بەراورد كردنی هێزی پێشمەرگەی كوردستان لەگەڵ بزووتنەوەی حەماس.
كە ئەمە لە دیدی منەوە تاوانێكە لە ئاست هێزی پێشمەرگەی كوردستان دەكرێت.
هێزی پێشمەرگەی كوردستان كە لە مێژووی دەیان ساڵەی دامەزراندنی تا ئەمڕۆشی لەگەڵ دابێت، یەك كردەوەی تیرۆرستی ئەنجام نەداوە.
هێزی پێشمەرگە دەستی بۆ منداڵ و ژنی عەرەب، فارس و تورك نەبردووە.
پێشمەرگەیەك ئافرەتی بەساڵاچووی نەڕفاندبێت و وەك قەڵغانی مرۆیی بەكار نەهێنابێت.
پێشمەرگەیەك دەستدرێژی سێكسی بەو شێوەی لە ڤیدیۆكانەوە بینیمان نەیكردبێتە سەر بارمتەكان، كە حەماس كردیی و هەموو جیهانی خەمبار كرد.
هێزێكی پێشمەرگە تۆمەتبار نەبێت بە یەك كردەوەی تیرۆرستی لەسەر ئاستی نێودەوڵەتی.
هێزێكی پێشمەرگە یەك تەقینەوەی لە نێو هاووڵاتییانی سڤیل و داگیركەران ئەنجام نەدابێت.
تۆ بێی و بەراوردی بكەی بە بزووتنەوەی حەماس و بڵیی، حەماس پێشمەرگەی غەززەن.
هێزی پێشمەرگە نەتەوەكەی كیمیاباران كرا دەستی بۆ گیانی دیلێك نەبرد.
هێزی پێشمەرگە لەلایەن هزر حەماسییەكانەوە ئەنفال كرا كوا كێیان كۆمەڵكوژ كردەوە.
سەرچاوەی قوتابخانەی حەماس دەگەڕێتەوە بۆ وڵاتانی دژە مرۆڤایەتی وەك ئێران.
كە جگە لەوەی پاڵپشتی ئاژاوەی ناوچەكە دەكات، هەمیشە هۆتافی مردن بۆ ئەم و ئەو دەخوازێت.
حەماسیش بەو هزرەوە گەشەی پێدراوە، بۆ دۆزێنەوەی پاڵپشتی ماددی و مەعنەویش لایەنە سیاسییە دینییەكان مەكینەكانیان دەخەنەگەڕ .
دەنا حەماس لە دیدی منەوە بەكرێ گیراو و بووكەڵەی دەستی ئێرانە، هۆكاری كوشتنی ئەو هەموو خەڵكەیە.
هیچ نەتەوەیەك هێزێكی نییە وەك پێشمەرگە بێت، كورد بە پێشمەرگەوە لەسەر ئاستی جیهان جوانە، عەرەبیش بە حەماس و داعش و هاوشێوەكانیان لەئاستی جیهان و مرۆڤایەتی شەرمەزارن.
