بەڕێوەبەری كشتوكاڵی ڕواندز : دوو حەوزی ماسی لە سنووری قەزای ڕواندز هەبوو، بەهۆی بێ بازاڕی داخران
مەهدی محەممەد – ڕواندز :
قەزای ڕواندز خاوەنی 35 كێڵگەی پەلەوەریی و دوو حەوزی ماسی و یەك كێڵگەی بەخێوكردنی گۆلك، بەڵام بە هۆی بێ بازاڕی بەرهەمەكانیان ڕووی لە كەمی كردووە و بەشێكیشیان داخراون.
پەیام دڵدار سەبری بەڕێوەبەری كشتوكاڵی ڕواندز، لەسەر بوونی كێڵگە پەلەوەرییەكان لە سنووری قەزای ڕواندز بە زاری كرمانجی ڕاگەیاند “لە سنووری قەزای ڕواندز 35 كێڵگەی پەلەوەری هەن، لەو ژمارەیە 30 كێڵگەیان مۆڵەتیان هەیە و دوو پرۆژەیان لەواری جێبەجێكردندان و سێ كێڵگەشیان كاتی خۆی بە سەرپێچی دروستكراون و نووسراومان لە سەر كردوون و چوونەتە پۆڵینەكان،”
بێ بازاڕی و زەرەر كردن، بەرهەمی كێڵگەكانی كەم كردووەتەوە و چەند دانەیەكیشی ڕووبەڕووی داخستن كردوونەتەوە، بەڕێوەبەری كشتوكاڵی ڕواندز دەڵێ “پێشتر دوو حەوزی ماسی هەبوو لە هەوارەكۆن و بەرسیرین، بەڵام لە ساڵی 2014 بە هۆی بێ بازاڕییەوە داخراون، هەروەها دوو كێڵگەی پەلەوەریش كارەكانیان ڕاگرتووە، ئەوانی تریش بە گشتی بەرهەمیان كەم كردووەتەوە و ئەگەر بەو شێوەیەش بەردەوام بێت دەكرێت چەند دانەیەكی تریش كارەكانیان ڕابگرن، جگە لەوەش كێڵگەیەكی قەڵەوكردنی گۆلك لە ناوچەی خەلكان هەیە كە پێشتر بە سەرپێچی دروست كرابوو، بەڵام ئەمساڵ مۆڵەتی وەرگرت و كاری خۆی دەكات،”
بەشێك لە هاووڵاتییانی نیشتەجێ بووی نزیك كێڵگە پەلەوەرییەكان، گلەیی لە بۆنی كێڵگەكان دەكەن لە وەرزی هاویندا، بەڵام پەیام دەڵێ “كێڵگە پەلەوەرییەكان بە پێی ڕێنماییەكان دروستكراوەن و بە ڕەزامەندی تەواوی لایەنە پەیوەندیدارەكان وەرگیراون و بێ كەم و كوڕین.”
