لە ئیدارەی سۆران كەمترین ئاماری دزی تۆماركراوە

محەمەد مەحموود-سۆران:
لە دیدارێكی تایبەتی زاری كرمانجی دا عەمیدی مافپەروەر سەران شێخ لەتیف، بەڕێوەبەری پۆلیسی سۆران باس لە ئەرك و كارەكانی پۆلیس دەكات و دەڵێت” لە ئیدارەی سۆران كەمترین فەرمانی گرتن هەیە كە جێ‌ بەجێ‌ نەكرابێت.
لەسەرەتای قسەكانی بەڕێوەبەری پۆلیسی سۆران، گوتی:” لە كاتی دەستبەكاربوونم وەك بەڕێوەبەری پۆلیسی سۆران بەهەماهەنگی لەگەڵ وەزارەتی ناوخۆ و بەڕێوەبەرایەتی گشتی پۆلیسی هەرێم و ئیدارەی سۆران، بە ئامانجی بیرۆكەی خزمەتكردنی پۆلیسی سۆران بە پلەی یەكەم كارەكانمان ئەنجامداوە.
عەمید سەران شێخ لەتیف، باسی لەوەشكرد:” لە رێگەی وەزارەتی ناوخۆ داوای دروستكردنی باڵەخانمان كردووە بۆ سەرجەم بنكە و بەشەكان تاكو دیوێكی شارستانی جوان پیشانی خەڵك بدەین، ویستمان گرفتی باڵەخانە چارەسەر بكەین ئەوەبوو بە خۆشحاڵییەوە وەزیری ناوخۆی حكوومەتی هەرێمی كوردستان رەزامەندی نیشاندا لەسەر دروستكردن و نۆژەنكردنەوەی باڵەخانە بۆ چەندین بەش و بنكە كە جێگەی سوپاسە لەگەڵ ئەوەش دروستكردنی چەند باڵەخانەیەكی تر لە پلان و بەرنامەدان.
ئەو باڵەخانانەی دروستدەكرێن و لە ژێر نۆژەنكردنەوەدان ئەمانەن:
1-دروستكردنی باڵەخانەی پۆلیسی پاسەوانی چالاكییە مەدەنیەكان.
2-دروستكردنی باڵەخانەی بنكەی پۆلیسی دیانا.
3- دروستكردنی باڵەخانەی بنكەی پۆلیسی هەرێم.
4-نۆژەنكردنەوەو دروستكردنی سیاجی باڵەخانەی بەڕێوەبەرایەتیی پۆلیسی سۆران.
5-نۆژەنكردنەوەی بەشی پۆلیسی گرتن و گواستنەوەی سۆران.
جگە لەوەش لە رووی پێداویستییەوە ژمارەیەكی زۆر لە ئامێرەكانی كۆمپیوتەر و فۆتۆكۆپی و پرێنتەر و تاخم قەنەف و دۆڵاب و چەندین پێداویستی تر لەلایەن وەزارەتی ناوخۆ و بەڕێوبەرایەتیی گشتی پۆلیس و ئیدارەی سەربەخۆی سۆران دابینكراون.
لەسەر دابینكردنی ئۆتۆمبێلیش بەڕێوەبەری پۆلیسی سۆران، دەڵێت” لەو ماوەیەدا 10 ئۆتۆمبێلی نوێ‌ بۆ بەشی پۆلیسی فریاكەوتن دابین كراون، 10 ئۆتۆمبێلی جۆری مێگەزەمین بۆ بەشی پۆلیسی چاڵاكییە مەدەنییەكانن، لەگەڵ 5 پیكەب بۆ بنكەكان كە دەستكەوتێكی زۆر گرنگ بوو بۆ خزمەتكردنی سێكتەری پۆلیس لە ئیدارەی سۆران.
سەران شێخ لەتیف، روونیشیكردەوە” لەرووی كاروباری رۆژانەوە زۆرترین چاڵاكی ئەنجامدراون لەوانەش كەمترین فەرمانی گرتن هەیە كە جێبەجێ‌ نەكرابێت، زۆرترین سمینار و چالاكی بۆ قوتابییان و دامودەزگاكان لەسەر كاروباری پۆلیس و وشیاركردنەوەیان لەلایەن پۆلیسی كۆمەڵگەیی، چەندین تۆمەتبار لەشارەكانی تری عێراقەوە فەرمانی گرتنیان هەبووە توانیومانە دەستگیریان بكەین، زۆرترین تۆمەتبار دەستگیر كراوە بە بڕیاری دادوەر، لەگەڵ ئەوەی كەمترین ئاماری دزی تۆماركراوە.
بەڕێوەبەری پۆلیسی سۆران ئاماژەی بۆ ئەوەشكرد” لەرووی جێبەجێ‌ كردنی رێنمای و راسپاردەی وەزارەتی ناوخۆ بە هەماهەنگی لەگەڵ دامودەزگاكانی تر بۆ ئەمەشیان زۆرترین شوێنەكانی جوانكاری ئۆتۆمبێل ئاگادار كراونەتەوە لە یاسا دەرنەچن، دەست بەسەر زۆرترین چەك و كەل و پەلی تاوانكاری دا گیراوە، لەرووی زێدەڕۆییەوە ئەو دیاردەیە زۆر كەمی كردووە كەمترین حاڵەت تۆماركراوە، 4 ژمارەی تەلەفۆن كراوەن بۆ خزمەتكردنی هاووڵاتییانی ئیدارەی سۆران و بەبێ‌ هیچ تێچووێك هاووڵاتییان دەتوانن پەیوەندی بەو ژمارانەوە بكەن، ژمارەكانیش بریتین لە (104,124،134) ئەو ژمارانە تایبەتن بە پۆلیسی فریاكەوتن، ژمارە (144) تایبەتە بە نەهێشتنی تاوان، جگە لەوە بەرزركردنەوەی ئاستی بنكەی پۆلیسی فریاكەوتن لە بنكەوە بۆ بەش، هەروەها كردنەوەی چەندین بنكەو هۆبە و نووسینگە لەوانەش، بنكەی پۆلیسی دادگا، هۆبەی پەنجەمۆر لە بەشی بەڵگەكانی تاوان، هۆبەی خراپ بەكارهێنانی ئامێرەكانی پەیوەندی لە بەشی نەهێشتنی تاوان، كردنەوەی هۆبەی زانیاری و تاوانكاری لە بەشی نەهێشتنی تاوان و كردنەوەی بەشی نەهێشتنی تاوان لە رواندز.