زاری كرمانجی-سۆران:
شارەزایەكی كەشناسی ئاشكرای دەكات كە سبەی شەممە شەپۆڵێكی دیكەی بارانبارین ڕوو لە ناوچەكانی هەرێمی كوردستان دەكات و ماوەی چەند رۆژێك بەردەوام دەبێت.
ئاراس جەبار شارەزای كەشناسی ڕایگەیاند: سبەی شەممە ئاسمانی هەرێم لە كاتەكانی پاش نیوەرۆدا بە زۆری دەگۆرێت بۆ نیمچەهەور و لە كاتەكانی شەو درەنگدا بارانی پچڕپچر لە ناوچەشاخاوییەكانی پارێزگای دهۆك دەست پێ دەكات.
ڕاشیگەیاند: لە رۆژانی 26 و 27ی مانگ كاریگەری شەپۆڵەكە زیاتر دەبێت و ئاسمانی هەرێم بە زۆری بۆ هەوری تەواو دەگۆرێت لەگەڵ بارانی مامناوەند و پچڕپچر لە ناوچە شاخاوییەكاندا و بارانێكی كەم بۆ مامناوەند لە هەندێك كاتدا لە سەنتەری پارێزگەكان.
هەروەها ڕایگەیاند: پێشبینی دەكرێت بە گشتی كاریگەری زیاتر لەسەر ناوچە شاخاوییەكانی پارێزگەی دهۆك و هەولێر ببێت و تا بەرەو باشووری هەرێم بڕۆین كاریگەری بەرەو كەمبوونەوە دەچێت.
شارەزاكەی كەشناسی ئاماژەی بەوەش دا كە پلەكانی گەرماش لەماوەی ئاماژەپێكراودا زیاتر جێگیر دەبێت لەگەڵ نزمبوونەوەیەكی كەم لە ناوچە شاخاوییەكاندا، هەروەها خێرایی با لە رۆژانی 26 و 27 مامناوەند چالاك دەبێت 15-30كم/س لە ئاراستەی باشووری رۆژهەڵاتەوە .
جەختیشی كردەوە كە كاریگەری ئەم نزمەپالەپەستۆیە لەسەر ناوچەكانی هەرێمی كوردستان لاواز دەبێت، بەڵام لە وڵاتانی باكور و ناوەراست و رۆژهەڵاتی ئەوروپا و وڵاتی توركیا هەر لە رۆژانی 26 و 27 ی مانگەوە شەپۆلێكی سەرما و بەستەڵەك و بەفربارین بەرێژە و كاریگەری جیاواز ئەو ناوچانە دەگرێتەوە.
