زاری كرمانجی – سۆران:
دوای بە ئیدارە كردنی سۆران، كار لەسەر زۆر پڕۆژەی خزمەتگوزاری كراوە بە تایبەت لەم دوو مانگەی دوایی، بەڵام هەر وەكو بەشێك لە گەنجان باسی دەكەن، تا ئێستا هیچ هەنگاوێك نەنراوە بۆ بەهێزكردن و باشتركردنی ژێرخانی ئابووری، بۆیە داواكارن لە رێگەی پڕۆژەی جۆراوجۆر و پێدانی قەرزی بچووك و مامناوەند بە گەنجان، كار لەسەر ئەو لایەنە گرنگە بكەن، لە پێناو بەرەوپێشبردنی ئیدارەكە و دەربازبوونی گەنجان لە بێكاری .
ئەوان بیرۆكەی كۆمەڵێك كار و پرۆژەیان هەیە، بەڵام نەبوونی سەرمایە و پارە، هەر وەكوو خۆیان باسی دەكەن، پرۆژە و بیرۆكەكانیان تەنیا وەك خەون و خەیاڵ ماونەتەوە و نەكەوتوونەتە واری جێبەجێكردنەوە.
سامی عەبدوڵڵا دەڵێ” خۆشی بەخش بوو كە دەڤەرەكەمان بوو بە ئیدارەی سەربەخۆ، بۆ ئەوەی ئەو خۆشییە بەردەوام بێت، دەبێت تەواوی چین و توێژەكانی كۆمەڵگەی سۆران بێ جیاوازی خزمەت بكرێن، تا هەموویان خۆیان بە خاوەنی بزانن، لەگەڵ ئەوەش پێویستە گەنجانیش شوێن پەنجەیان دیار بێت و ببنە خاوەن كاری خۆیان، تا بتوانن لەو رێگەوە خزمەت بە پێشكەوتنی ئیدارەكە بكەن، ئێستا رێژەیەكی زۆری گەنجان بێ كارن و هەندێكیان بیریان لە جێهێشتنی شار و نیشتمانەكەیان كردووەتەوە، جا ئەگەر لێرە كار هەبێت و ژیانێكی خۆش هەبێت، بە دڵنیایەوە هیچ كامیان نیشتمانی خۆیان ناگۆڕنەوە بە هیچ وڵاتێكی پێشكەوتووی دونیا”.
حەمید قادر، دوو بیرۆكەی كاركردنی لە خەیاڵدایە، بەڵام لە بێ پارەیەیی نەیتوانیوە هیچ كام لە بیرۆكەكانی بكاتە ڕاستی و ببێتە خاوەن كاری خۆی، ئەو دەڵێ” بیرۆكەی كار، بێ بوونی پارە هیچ ناهێنێت، ئێستا دوو بیرۆكەی كاركردنم لە خەیاڵدایە، بەڵام پارەم نییە”،
حەمید داواكارە لە ئیدارەی سۆران، چ بە خۆیان یان لە ڕێگەی رێكخراو و بانكەكانەوە هەوڵ بدەن قەرز بە گەنجان بدەن تا ببنە خاوەن كاری خۆیان :” پێشتر لەو شارە ڕێكخراو هەبوو قەرزی كاركردنی بە گەنجان دەدا و كۆمەڵێك گەنج بوونە خاوەن كاری خۆیان، بۆیە ئیدارەی سۆرانیش دەتوانێت هەمان كار بكات، ئەگەر لە دەسەڵاتی ئەویشدا نەبێت دەكرێت لە ڕێگەی ڕێكخراو و بانكەكانەوە كار بكات و ڕاكێشی ئیدارەی سۆرانیان بكات”.
هاوكار حەمەدەمین باس لەوە دەكات ئەگەر دەرفەتی كارییان بۆ بڕەخسێت كاری گەورە دەكەن و دەڵێ: ” كاری گەورە و مەزن دەكەین ئەگەر دەرفەتمان بۆ بڕەخسێت، بەڵام نەبوونی هەر دوو دەستی گرێداوین و هیچمان پێ ناكرێت، دەمانەوێت ئیداری سۆران كاری جددیمان بۆ بكات و بە هەر شێوەیەك بێت قەرزمان پێ بدات، تا ببینە خاوەن كار و خزمەتی خۆمان و شارەكەمان پێ بكەین، لە جیاتی ئەوەی چاومان لە دامەزراندن بێت، لە ڕێگەی كاری خۆمانەوە ژیان و گوزەرانی خۆمان دابین دەكەین و قورسایی سەر شانی حكومەتیش سووك دەكەین”.
مامۆستایەكی بنەڕەتی حەزی نەكرد ناوی ئاشكرا بكرێت، باس لەوە دەكات گەر دووكانێكی بچووكی دەست بكەوێت و كرێیەكی هەرزان بێ، ئامادەیە لەپاڵ پیشە راستەقینەكەی خۆی كاری نێو بازاڕیش بكات، ئەو پێی وایە ناكرێت لەوە زیاتر پشت بە مووچەی حكومەت ببەسترێت و گەنجان دەبێ لەسەر دەست و هێزی خۆیان بن و ببنە خاوەن كاری سەربەخۆیی خۆیان” كرێی خانوو و كارەبا و ئاو و خەرجی ماڵەوە، زۆربووە لە توانای تەنیا مووچە چووەتە دەرەوە، بۆیە ئەگەر دەرفەتی كار بڕەخسێت لەلایەن ئیدارەوە بە دڵنیایەوە لە پاڵ پیشەیی خۆم، دووكانێكی بچووكیش دادەنێم، چونكە كاری ئازاد دەكرێ ببێتە پاڵپشتییەك بۆ مووچەكە و ژیانێكی نیوە باش بۆ خێزان و منداڵەكەم دابین بكەم.
ئەو مامۆستا گەنجە، ئامۆژگاری گەنجانیش دەكات گەر بە قەرزیش بێ، بۆ خۆیان كارێك بكەن و واز لە گەڕان و سووڕان بهێنن” شەرمە گەنج بیت و فلووسێك لە گیرفانت نەبێت و دواتریش گلەیی لە وەزعەكە بكەیت”.
