ئەمڕۆ چوارشەم 15ی تشرینی دووەم، نێچیرڤان بارزانی سەرۆكی هەرێمی كوردستان، پێشوازیی لە ڤۆڵكەر پێرسێس سەرۆكی تیمی سەربەخۆی پێداچوونەوەی ستراتیجی بە ئەركی نێردەی نەتەوە یەكگرتووەكان لە عێراق (یونامی) كرد.
لە كۆبوونەوەیەكدا بیروڕایان لەبارەی ئەرك و سەردانی پێرسێس بۆ عێراق و دیدار و كۆبوونەوەكانی لەگەڵ بەرپرسانی باڵای عێراق، گۆڕییەوە و تیشكیان خستە سەر ئەرك و كارەكانی تیمی نەتەوە یەكگرتووەكان و ئاژانسەكانی لە عێراق و هەرێمی كوردستان.
نێچیرڤان بارزانی وێڕای سوپاس و پێزانینی بۆ ڕۆڵ و پشتگیریی نەتەوە یەكگرتووەكان و ئاژانس و ڕێكخراوەكانی لە عێراق و هاوكارییەكانی لە بوار و قۆناغە جیاجیاكاندا، ئاماژەی بە هەوڵ و كارەكانی یونامی كرد كە دوای پرۆسەی ئازادی، یارمەتیی عێراقی داوە بۆ سەقامگیری و بەرەوپێشبردنی دیموكراسی و باشكردنی كاری دامەزراوەكان.
لای خۆیەوە پێرسێس، دید و بۆچوونەكانی لەبارەی ئەركی یونامی لە عێراق و داواكاریی عێراق بۆ پێداچوونەوە بە ئەركی نێردەی نەتەوە یەكگرتووەكان خستە ڕوو، هەروەها سوپاسی سەرنج و بۆچوونەكانی سەرۆكی هەرێمی كوردستانی لەبارەی كار و ئەركی نەتەوە یەكگرتووەكان و ئاژانسەكانی بۆ هاوكاری و یارمەتیدانی عێراق كرد.
لە تەوەرێكی تری كۆبوونەوەكەدا، دۆخی ناوخۆی هەرێمی كوردستان، دواین پێشهاتەكانی دۆخی سیاسیی عێراق و ناوچەكەیان بەگشتی، تاوتوێ كرد.
