راپۆرت-محەمەد هەسنانی
دوای دانانی بەردی بناغەی بە گوژمەی دوو زیاتر لە ملیار و 820 ملیۆن دینار، دەستكراوە بە جێبەجێكردنی پڕۆژەی دروستكردنی دەروازەی دیانای كۆن، بە شێوەی مۆدێرن و سەردەمیانە، ئەوەش بووەتە جێگەی دڵخۆشی دانیشتووانی سنوورەكە.
لەمبارەیەوە غەفور فەتاح، هاووڵاتییەكی دانیشتووی ناحیەی دیانا لە سنووری قەزای ناوەندی سۆران، بەزاری كرمانجی راگەیاند: ” ئەوەی پێی دڵخۆشین لە زۆربەی گەڕەك و شوێن و شەقامەكانی ئیدارەی سەربەخۆی سۆران، پڕۆژەی خزمەتگوزاری تیادا ئەنجام دەدرێت، ئەوەش هۆكاریەكە كە هاووڵاتی متمانەی زیاتری بە حكوومەتەكەی بێت و جێگەی دەستخۆشی كردنە”.
ئاماژەی بەوەشدا: ” ئەگەرچی پێشوتر هاووڵاتییان گلەییان لەوە هەبوو كە لە شەقامە گشتییەكانی ناحیەی دیانا، پڕۆژەی وەك پێویست نییە، بەڵام لەم دوو ساڵانەدا هەڵمەتێكی خزمەتگوزاری لەم شەقامانە دەستی پێكردووە، لە درەوازەی دیانای كۆن بگرە كە لە ئێستادا پڕۆژەیەكی ستراتیژی تیادا ئەنجام دەدرێت، تا دەگاتە بینایەی ئیدارەی سەربەخۆی سۆران، لە زۆربەی شوێنی شەقامەكە كاری چاككردن و سەوزكردنی تیادا بەردەوامی هەیە، ئەمانەش ئومێد بەخشن.
سەلمان سەباح، گەنجێكی دانیشتووی سنووری ناحیەی دیانا، بۆ زاری كرمانجی ئەوەدەخاتەڕوو: ” ئەگەر پڕۆژەی دەروازی ناحیەی دیانا بەپێی نەخشەكە جێبەجێ بكرێت، جگەلەوەی سیمایەكی شارستانی بە ناحیەكە دەبەخشێت، لە هەمانكاتیشدا دەبێتە هۆكارێك بۆ كەمكردنەوەی جەنگاڵی هاتووچۆی ئۆتۆمبێل لە شەقامەكەدا، كە رۆژلنە قەرەباڵغی زۆری لەسەرە”.
دەشڵێت: ” جگەلە دروستكردنی دەروازەكە بەپێی ئەو نەخشەیی بڵاوی كردەوە پاركێكی بچوك لە شوێنەكە دروست دەكرێت، ئەمەش هۆكارێكی باشە بۆ پشووی گەنجان و هاووڵاتییان بەگشتی و بەسەر بردنی كات، لەگەڵ ئەوەشدا نۆژەنكردنەوەی مزگەوتی گەورەی دیانا و پڕكردنەوەی كەندەكە بووەتە هۆكارێك گۆڕستانی دیانا لە رووچوون بپارێزرێت.
لای خۆیەوە هەژار حەكیم، بەڕێوەبەری ڕاگەیاندن و پەیوەندییەكانی ئیدارەی سەربەخۆی سۆران، بە زاری كرمانجی گووت : ” دوای ئەوەی لەسەر ڕاسپاردەی مەسرور بارزانی، سەرۆكی حكوومەتی هەرێمی كوردستان، لەژێر چاودێریی هەڵگورد شێخ نەجیب، سەرپەرشتیاری ئیدارەی سەربەخۆی سۆران، بە ئامادەبووانی چین و توێژەكانی دەڤەرەكە، بەردی بناغەی پرۆژەی دەروازەی دیانای كۆن لە سنووری قەزای ناوەندیی سۆران دانرا، ئێستا دەست كراوە بە جێبەجێكردنی بە گوژمەی دوو ملیار و 820 ملیۆن و 477 هەزار دینار، لەلایەن كۆمپانیای كاڤین گرووپەوە لەسەر بودجەی ئیدارەی سەربەخۆی سۆران، جێبەجێ دەكرێت و دەكەوێتە خزمەت هاووڵاتییان”.
گووتیشی: ” كاروانی خزمەتگوزاری كابینەی نۆیەمی حكوومەتی هەرێمی كوردستان، لە زۆربەی شارو شارۆچكەو گوند و ناوچەكانی سنووری ئیدارەی سەربەخۆی سۆران بەردەوامی هەیە، بە ئامانجی خزمەتكردنی زیاتری خەڵكی دەڤەرەكە.
