پشتیوان كریم – زاری كرمانجی :
بەڕێوەبەری ناحیەی سیدەكان بە زاری كرمانجی راگەیاند:” ماوەی پێنج رۆژە، ناوچە سنووریەكانی دەڤەری برادۆست لەلایەن ئێرانەوە تۆپباران دەكرێت، بەڵام ئەمڕۆ ئارامە “
ئیحسان چەلەبی، بەڕێوەبەری ناحیەی سیدەكان روونیشیكردەوە:” تا ئێستا هاووڵاتیان و مەڕداران و جوتیاران لە ترس و دڵە ڕاوكێی دان و نەگەڕاونەتەوە شوێنەكانی خۆیان، چونكە دیار نییە ئاخۆ تۆپباران دەست پێ دەكاتەوە یا نا”
چەلەبی لەبارەی زیانەكانی تۆپبارانەكەش دەڵێ:” لەبەر ئەوەی تا ئێستا پشكنین بۆ ناوچەكە نەكراوە، بۆیە نازانین بە دیاریكراوی زیانەكان چین، بەڵام رەز و باخی هاووڵاتیان سووتاوەو مەڕ و ماڵات جێهێڵدراوە و بەركەوتنی ساچمە بە ئۆتۆمبێلی خەڵكانی ناوچەكە هەبووە، تا لیژنەیەك دروست نەكرێت و بەداواداچوون و لێكۆڵینەوە نەكات، زیانەكانمان بۆ دەر ناكەوێت”.
بەهۆی تۆپبارانی بەردەوامی ناوچە سنوورییەكانی دەڤەری برادۆست، چوار گوند بە تەواوی چۆلكراوە و كەسی تێدا نەماوە و لە هەردوو گوندی بێواس و بن رەشكین هەروەكو بەڕێوەبەری شارەدێی سیدەكان ئاماژەی بۆ دەكات خوێندن تێدا وەستاوە و دەرگای قوتابخانەكان داخراون.
