^{هاووڵاتییانی كەركووك پێشوازیان لەو كارە گرنگەی سەرۆك بارزانی كرد}

بەشێواندنی پۆستەری كاندیدكانمان خەڵك زیاتر پارتی خۆش دەوێت

بەرپرسی لقی سێی پارتی لە كەركووك، لە دیدارێكدا لەگەڵ زاری كرمانجی، ڕایگەیاند: بە گەڕانەوەی پارتی چی دیكە زوڵم لە هاووڵاتییانی كەركووك ناكرێت. دەشڵێ: بەشێواندنی پۆستەری كاندیدكانمان خەڵك زیاتر پارتی خۆش دەوێت.

محەممەد كەمال، بەرپرسی لقی سێی پارتی لە كەركووك، دەڵێت: گەڕانەوەی پارتی بۆ كەركوك كاریگەری زۆری دەبێت لەسەر بارودۆخی شارەكە و سیمای خۆشەویستی بە هاووڵاتییانەوە دیار بوو كە پارتی گەڕایەوە شارەكە.

بەرپرسی لقی سێی پارتی لە كەركووك، گوتیشی: پارتی لە كەركووك بێت ڕێگە نادات زوڵم لە هاووڵاتییان بكرێت و بێبەش بن لە خزمەتگوزارییەكان و ئەو فەرمانگانەی كە لە دەستمان داوە بەهۆی خیانەتی 16 ئۆكتۆبەرەوە، هەوڵ دەدەین بگەڕێنینەوە بۆ جێگەی خۆی.

محەممەد كەمال، بەرپرسی لقی سێی پارتی لە كەركووك، ئاشكراشی كرد: دڕاندنی لافیتەی كاندیدەكانمان شتێكی منداڵانەیە و كاریگەری نابێت لەسەر بانگەشەی هەڵبژاردن، بەڵكو بە پێچەوانەوە خەڵك حەماسەتی زیاتر دەبێت، كە دەبینن پۆستەری كاندیدانی پارتی دەدڕێندرێن و خەڵك زیاتر پارتی خۆش دەوێت.

بەرپرسی لقی سێی پارتی لە كەركووك، زیاتر گوتی: پێشتر كە لە كەركووك بووین برایەتی و پێكەوەژیانەمان پاراستبوو، پەیوەندیەكی باشمان هەبوو لەگەڵ هەموو لایەنەكان و پێكهاتەكان، دوای گەڕانەوەمان بە ستراتیژیەتێكی باشتر و لەسەر ڕێنمایەكانی سەرۆك بارزانی كە هانمان دەدات لەگەڵ هەموو پێكهاتە و لایەنەكان بەڕێكوپێكی مامەڵە بكەین و برایەتی و خۆشەویستی و پێكەوەژیان بپارێزین.

محەممەد كەمال، بەرپرسی لقی سێی پارتی لە كەركووك، ڕوونیشیكردەوە: سەرۆكی زانكۆی كەركووك لە كۆنفرانسێكدا چەندین جار سوپاسی سەرۆك بارزانی كرد بۆ ئەم دیاریەی كە پێشكەشی كردووە بە زانكۆ و بە لاوانی كەركووك، بۆ زیاتر بەرزكردنەوەی ئاستی رۆشنبیری و زانیاری و زانست لە شارەكە، مامۆستایانی زانكۆ و هاووڵاتییانی دانیشتووی كەركووك پێشوازیان لەو كارە گرنگەی سەرۆك بارزانی كرد