دوای شەش ساڵ؛ ئەمڕۆ پارتی دەگەڕێتەوە كەركووك

سه‌رچاوه‌ : K24

“باڵەخانەی ئەنجوومەنی سەركردایەتیی پارتی بە بڕیاری سەرۆك بارزانی ڕادەستی زانكۆی كەركووك دەكرێت”.

بۆ یەكەمجار لە دوای رووداوەكانی 16ـی ئۆكتۆبەری 2017؛ پارتی دیموكراتی كوردستان (پەدەكە) دەگەڕێتەوە كەركووك و دەست بە كار و چالاكییە سیاسییەكانی خۆی لەو شارە دەكاتەوە.
گەڕانەوەی پارتی بۆ كەركووك بە دوو هەنگاو دەبێت. لە هەنگاوی یەكەمدا، بەیانی ئەمڕۆ یەكشەممە، 05-11-2023، باڵەخانەی ئەنجوومەنی سەركردایەتیی پارتی بە بڕیاری سەرۆك بارزانی ڕادەستی زانكۆی كەركووك دەكرێت و دواتریش پارتی بارەگای لقی سێی خۆی لە كەركووك وەردەگرێتەوە.
لەوبارەوە تەلەفزیۆنی “كوردستان24” رایگەیاند: “تەواوی كەرستە و كەلوپەلەكانی نێو باڵەخانەی ئەنجوومەنەكە بردراونەتە دەرەوە، بارەگاكە بە تەواوەتی چۆڵكراوە و هێزی ئەمنی لێی نەماوە. بڕیارە پاش كەمێكی دیكە بە ئامادەبوونی شاخەوان عەبدوڵڵا، ئەندامی كۆمیتەی ناوەندیی پارتی و محەممەد كەمال، بەرپرسی لقی سێی پارتی لە كەركووك، بارەگای ئەنجوومەنی سەركردایەتی پێشكەشی زانكۆی كەركووك بكرێت”.
ئاماژەی بەوەش كردووە، “وابڕیارە لە هەنگاوی دووەمدا، پارتی بارەگای مەكتەبی رێكخستنی كەركووك – گەرمیان، كە كەمال كەركووكی بەرپرسییەتی و ئێستا كار و چالاكییەكانی لە هەولێر راییدەكات؛ لە كەركووك بكاتەوە، بەڵام تاوەكو ئێستا كاتی كردنەوەی ئەو بارەگایە دیاری نەكراوە”.
خەلیل حەسەن، كادیری لقی سێی پارتی دیموكراتی كوردستان رایگەیاندووە: “لەسەر بڕیاری سەرۆك بارزانی بڕیاردرا پارتی بەفەرمی بگەڕێتەوە كەركووك و بارەگاكانی خۆی وەربگرێتەوە. سەرۆك بارزانی بەرژەوەندیی كەركووكییەكانی بەلاوە گرنگە و، كورد و كەركووكییەكانیش زۆر دڵخۆشن بە گەڕانەوەی پارتی”.
ئەو كادیرەی پارتی گوتیشی، “لەگەڵ هەموو حزبە سیاسییەكان هەوڵ دەدەین لەم هەڵبژاردنە (هەڵبژاردنی ئەنجوومەنی پارێزگای كەركووك) دۆخی كەركووك بگەڕێنینەوە بۆ پێش رووداوەكانی 16ـی ئۆكتۆبەر، بە شێوەیەك هەموو هاووڵاتییانی كەركووك بتوانن بێنە سەر سندووقەكانی دەنگدان و بێ ترس و دڵەڕاوكێ دەنگ بە كاندیدە دڵخوازەكانیان بدەن”.

بانگەشەی هەڵبژاردنی ئەنجوومەنی پارێزگاكان

رۆژی چوارشەممە، 01-11-2023، بانگەشەی هەڵبژاردنی ئەنجوومەنی پارێزگاكان لە كەركووك و 14 پارێزگای عێراق دەستیپێكرد. لە كەركووك 10 هاوپەیمانێتی، پێنج پارتی سیاسی و سێ كاندیدی سەربەخۆ بەشداری لە هەڵبژاردنی ئەنجوومەنی پارێزگا دەكەن. بە گشتی 234 كاندید لە هەڵبژاردنەكە بەشدارن و 16 كاندید وەك ئەندامی ئەنجوومەنی پارێزگای كەركووك هەڵدەبژێردرێن.
پارتی بە 30 كاندید بەشداریی لە هەڵبژاردنی داهاتووی ئەنجوومەنی پارێزگاكانی عێراق لە كەركووك دەكات، كە بڕیاروایە رۆژی 18ـی كانوونی یەكەمی 2023، بەڕێوەبچێت. پارتی بانگەشەی هەڵبژاردنی لەو شارە دەستپێكردووە و چاوی لەوەیە بەشێكی زۆری كورسییەكانی ئەنجوومەنی داهاتووی پارێزگای كەركوك بەدەست بهێنیت.
ماوەی 45 رۆژ بانگەشەی هەڵبژاردنی ئەنجوومەنی پارێزگاكانی عێراق بەردەوام دەبێت. 48 كاتژمێر پێش دەستپێكردنی پڕۆسەی دەنگدانی تایبەت بانگەشەكە رادەگیرێت.

كاندیدێكی پارتی: هیچ شتێك لە كەركووك ناتوانێت رێگریمان لێبكات

ڕۆژی شەممە، 04-11-2023، عەلی نازم، كاندیدی پارتی دیموكراتی كوردستان بۆ هەڵبژاردنی ئەنجوومەنی پارێزگای كەركووك، بە كوردستان24ـی راگەیاندبوو: “ئێمە بەبێ پۆستەریش بەشداریی هەڵبژاردنەكە بكەین، هەر براوەین لە شاری كەركووك، چونكە ئێمە هەڵگری بەرنامەیەكین بۆ خزمەتكردنی كەركووكییەكان”.
عەلی نازم گوتیشی: “بەرنامەی پارتی بۆ شاری كەركووك، لادانی ئەو هێزە سەربازییەیە كە لەناو شارەكە هەیە و گەڕانەوەی شكۆیە بۆ خەڵك و دامودەزگاكان بەتایبەت. ئەوەی ئێستا لە شاری كەركووكدا روودەدات، سیمای شاری پێوەنەماوە، بەرنامەی پارتیش گەڕاندنەوەی شارستانییەتە بۆ ئەو شارە”.
كاندیدەكەی پارتی ئاماژەی بەوەشدا: “وەك كاندیدی پارتی هیچ شتێك ناتوانێت رێگریمان لێبكات، چونكە ئێمە خەڵكی ئەو شارەین و خەڵك دەمانناسێت. ئەوەی ئێستا لە كەركووك روودەدات، پێشێلكاری هەڵبژاردنە بەرامبەر بە كاندیدانی پارتی دەكرێت، بەڵام هیچ یەكێك لەم هەڵسوكاوتانە ساردمان ناكانەوە”.

رووداوەكانی 2ـی ئەیلوول و شەهیدبوونی چوار گەنجی كورد

رۆژی 2ـی ئەیلوولی 2023، ژمارەیەك لایەنگری حەشدی شەعبی و حزبە توركمانییەكانی كەركووك، لە دژی گەڕانەوەی پارتی بۆ شارەكە خۆپیشاندانیان كرد و رێگەی كەركووك – هەولێریان داخست. لە گەڕەكی رەحیماوەی كەركووك، هاووڵاتییانی كورد لە دژی داخستنی رێگەكە، بە ئاڵای كوردستانەوە دەستیان بە خۆپیشاندانی هێمنانە كرد، بەڵام بەهۆی رێگری هێزە عێراقییەكان، خۆپیشاندان گرژی تێكەوت و چوار هاووڵاتیی كورد بە گولـلـە هێزە ئەمنییەكان شەهیدكران و دەیان خۆپیشاندەری كوردیش بریندار كران.
لە خۆپیشاندانەكەدا، چوار هاووڵاتیی كوردی كەركووك بە ناوەكانی (هاوكار عەبدوڵڵا، هەڤاڵ ستار، سەمەد محەممەد و حوسێن سابیر)، بە تەقەی هێزە ئەمنییەكان شەهید كران و نزیكەی 15 كەسی دیكەش برینداربوون.
هەرچەندە دوای رووداوەكان، سەرۆكوەزیرانی عێراق و پەرلەمانی عێراق، بڕیاریاندا بە پێكهێنانی لیژنەی لێكۆڵینەوە بۆ دەرخستنی راستی رووداوەكان و بە سزاگەیاندنی سەرپێچیكاران، بەڵام تاوەكو ئێستا نە ئەنجامی لێكۆڵینەوەكان بەشێوەیەكی فەرمی راگەیەندراوە و نە رێكاری یاسایی بەرامبەر ئەو كەسانە گیراوەتەبەر كە بوونە هۆی شەهیدكردن و برینداركردنی خۆپیشاندەرانی كەركووك.
دوو رۆژ دوای رووداوەكانی 02ـی ئەیلوول، پێشەوا هەورامانی، گوتەبێژی حكومەتی هەرێمی كوردستان رایگەیاند، “مەسرور بارزانی، سەرۆكی حكومەتی هەرێمی كوردستان، فەرمانی بە وەزارەتی كاروباری شەهیدان و ئەنفالكراوانی حكومەتی هەرێمی كوردستان كرد، مامەڵەی شەهیدانە بۆ شەهیدانی رووداوەكانی 2ـی ئەیلوولی كەركووك بكەن و هەموو هاوكارییەكی تەندروستی و چارەسەریش بۆ بریندارەكان فەراهەم بكرێت”.