د . فەیسەڵ سادق : سۆران بە یەكێك لە چالاكترین ناوچەی گەشتیاری كوردستان دادەندرێت

موڕشید برادۆستی – زاری كرمانجی:
لە دیدارێكی زاری كرمانجیدا، د . فەیسەڵ سادق بەڕێوەبەری گشتی گەشت و گوزاری سۆران، باس لە گرنگی ئیدارەی سۆران لە ڕووی گەشتیارییەوە دەكات و ئاماژەبەوەدەكات، سۆران بە چالاكترین ناوچەی گەشتیاری لە هەرێمی كوردستان دادەندرێت، ئاشكراشی دەكات، لە داهاتوودا بنكەی گەشت و گوزار لە قەزاكانی خەلیفان و سیدەكان دەكەنەوە، ناشی شارێتەوە، هانی وەبەرهێنەران و كەرتی تایبەت و خەڵكی ناوچەكە دەدەین پڕۆژەی گەشتیاری ئەنجام بدەن.
بەڕێوەبەری گشتی گەشت و گوزاری سۆران، دووپاتی كردەوە، سنووری ئیدارەی سۆران، لە ڕووی گەشتوگوزارییەوە بەیەكێك لە چاڵاكترین ناوچە گەشتیاریەكانی هەرێمی كوردستان دادەنرێت بەپێی هەڵكەوتەی جوگرافی و بوونی ناوچەی دڵڕفێن و كەش و هەوای گونجاوی چوار وەرزەی . هەر بۆیە ناوچەكە دابەشی سەر چەند زۆنێكی گەشتیاری بووە كە توانراوە بۆ هەر چوار وەرزی ساڵ گەشتیار بۆ خۆی پەلكێش بكات بۆ نموونە لە وەرزی هاوین هاوینەهەوارەكانی گەلی عەلەی بەگ و بێخاڵ و جوندیان وسەكران و وەرتێ و رووباری چامە و گەلی زرارا و رووباری ڕێزان و چیای حەسەن بەگ و حاجی ئۆمەران و بناری چیای هەڵگۆرد بە هەزاران سەردانیكار وگەشتیاری بۆ دەچن ، لەلایەكی بۆ وەرزی زستان چیای كۆڕەك و چیای حسن بەگ و حاجی ئۆمەران وێستگەی سەدان هەزار گەشتیارە لە وەرزی بەهاریش سەیرانگاكانی بێڕۆیان و ئاكۆیان و فەقیان لە ڕواندز و مەیدانۆكا و بلێ و بارزان ڕووگەیەكی خواستراوی گەشتیاریە . بۆیە دەتوانین بڵێن ناوچە گەشتیاریەكانی سۆران هەمەچەشنە و هەم وەرزین .
بەڕێوەبەری گشتی گەشت و گوزاری سۆران، ئاماژەشی بەوەدا، كردنەوەی بەرێوەبەرایەتی گشتی گەشتوگوزار لە سۆران بێگومان گۆڕانی دروست كردووە لە فراوان بوونی پەیكەری كارگێری بەوەی بەرێوەبەرایەتی لە سنووری رواندز و مێرگەسۆر هاتنە كایەوە وێڕای بەرێوەبەرایەتی چۆمان و لە پلانماندایە بنكەی گەشتوگوزار لە قەزاكانی سیدەكان و خەلیفانیش بكەینەوە ، لەلایەكی چاودێری و پۆلین و پشكنین و سەرپەرشتیاری كردنی ناوچە گەشتیاریەكان زیاتر بووە و توانراوە بەماوەیەكی كەم زۆربەی چاڵاكیە گەشتیاریەكان لەژێر ڕێنمای و چاودێری گەشتوگوزار كار بكەن و پابەندی مۆڵەتی پیشەیی گەشتیاری كراون و هاوكات كاری جدی دەكەین لەسەر ئەپدێیت كردنەوەی ماستەر پلانی گەشتیاری لە چوارچێوەی نەخشە ڕێگای هەشت ساڵەی دەستەی گەشتوگوزار، لەلایەكی تر توانرا لە ڕێگای وەزارەتی شارەوانی و گەشتوگوزارو بە پاڵپشتی ڕاستەوخۆی جەنابی وەزیر بەشێك لە ڕێنماییەكان هەموار بكرێنەوە لە بەرژەوەندی پەرەپێدان بە كەرتی گەشتوگوزار لە ناوچەكە و كوردستان بە گشتی . هەر ئەمەش وای كردووە ژمارەیەك پڕۆژەی گەشتیاری نوێ بێنە ئارا لەسەر ئاستی زیاد كردنی فۆرمی نوێی چاڵاكی گەشتیاری .
د . فەیسەڵ سادق بەڕێوەبەری گشتی گەشت و گوزاری سۆران، روونی كردەوە، پلانی ئێمە ئەوەیە كە ناوچەی گەشتیاری نوێ وەبەرهێنانی تیادا بكرێت، بەو ئومێدەی بتوانین لە سنووری قەزای سیدەكان و مێرگەسۆر و چۆمان پەرەپێدانی زیاتر بە كەرتی گەشتیاری بدرێت، لەم پێناوەشدا لەوانەی تیشكی زیاتر بخەینە سەر قەزای سیدەكان و هانی وەبەرهێنەران و كەرتی تایبەت و خەڵكی ناوچەكە و یەكە ئیداریەكان بدەین كە كار بۆ كرانەوە بەڕووی گەشتوگوزارەوە بكەن و چونكە دەرئەنجام ناوچەكە بە بوونی بنەمای باشی گەشتیاری دەتوانێ سوودی زۆر بە گەنجانی ناوچە بگەێنێت دەرفەتی كارو پڕۆژە زیاد دەكات و كاریگەری زۆر باشە لە بووژانەوەی ئابووری ناوچەكە دەكات”.