موڕشید برادۆستی – زاری كرمانجی
ئەمڕۆ چوارشەممە، بەڕێوەبەری گەنجینەی ئیدارەی سۆران، بە زاری كرمانجی ڕاگەیاند:” ماوەی چەند ڕۆژێكە ئامادەكاری تەواومان كردووە و وردبینی موچەی موچەخۆرانی سنووری گەنجینەمان ڕەوانەی وەزارەتی دارایی و ئابووری حكوومەتی هەرێمی كوردستان كردوە، چاوەڕوانی ئەو بڕە پارەیە دەكرێت كە لە بەغداوە بۆ هەرێمی كوردستان ڕەوانە دەكرێت.
سیامەند دەرگەڵەیی، بەڕێوەبەری گەنجینەی سۆران، ئاشكراشی دەكات، وردبینی لە موچەخۆران بۆ مانگی 8 كراوە و بۆ وەزارەت بەرز كراوەتەوە، هەروەها وردبینی لە لیستی مانگی 9 كراوە و سەرقاڵی وردبینین بۆ مانگی 10، ئاگادار كراینەوە كە دوێنێ سێشەممە ئەو 700 ملیار دینارە دەگاتە كوردستان و دەست بە دابەش كردنی موچە بكرێت بەڵام بە هۆكارێكی نادیار دوا كەوت..
گووتیشی:” لە 21ی مانگی ڕابردوو، دەست بە دابەش كردنی موچەی مانگی تەمووزی لیواكانی پێشمەرگە كرا، لە 24ی هەمان مانگ لیستی تەواواوی وەزارەتەكان بڵاو كرایەوە و لە وەزارەتی تەندروستی دەستی پێكرد، ئەگەر تا پێنجشەم دەست بە دابەش كردنی موچە نەكرێت، پێشبینی دەكەین سەرەتایی هەفتەی داهاتوو دەست بە دابەش كردنی موچە بكرێت.
