مەهدی محەممەد – زاری كرمانجی :
سەرۆكی دەستەی ئاماری هەرێمی كوردستان، ڕێژەی گەشەی دانیشتووانی هەرێم بەراورد بە ڕێژەی گەشەی دانیشتووانی عێراق بە كەمتر ناودەبات و پێی وایە ساڵی داهاتوو ڕێژەكە نزمتر دەبێتەوە، هەروەها ڕادەگەیەنێت كە ڕێژەی دانیشتووانی هەرێمی كوردستان تا كۆتایی ئەمساڵ دەگاتە شەش ملیۆن و 550 هەزار كەس جگە لە ئاوارەكان.
سیروان محەممەد، سەرۆكی دەستەی ئاماری هەرێمی كوردستان، ئاشكرای دەكات كە ماوەی 26 ساڵە سەرژمێری لە عێراق ئەنجام نەدراوە، دەشڵێت ڕێژەی گەشەی دانیشتووان لە هەرێمی كوردستان بە بەراورد بە عێراق كەمترە، عێراق ساڵانە ڕێژەی گەشەی دانیشتووانی 2.5% یە و ڕێژەی گەشەی دانیشتووانی هەرێم ساڵانە 2% یە.
بەپێی پێشبینییەكانی دەستەی ئاماری هەرێمی كوردستان بێت، ژمارەی دانیشتووانی هەرێمی كوردستان تا ساڵی 2040 دەگاتە هەشت ملیۆن و 800 هەزار كەس.
هەروەها سیروان محەممەد ڕێژەی گرووپی تەمەنەكانی دانیشتووانی هەرێم ئاشكرا دەكات و دەڵێ “ڕێژەی گرووپی تەمەنی 15 بۆ 24 ساڵی نزیكەی 20% لە دانیشتووانی كۆمەڵگەی كوردی پێك دەهێنێت، بەڵام لە ڕووی ئابوورییەوە تەمەنی 15 بۆ 64 ساڵی چالاكن كە ڕێژەی 61%ی كۆمەڵگە پێك دەهێنن،”
دەشڵێت ئەگەر بتوانرێت سوود لەم گرووپە وەربگرێت و بازاڕی كاریان بۆ دابین بكرێت، هەرێم لە ڕووی ئابوورییەوە زۆر بەرەو پێش دەخەن، ئەوەش دەڵێ “ئێستا لە كابینەی نۆیەمدا هەوڵ دەدرێت ئەو بابەتە یەكلایی بكرێتەوە.”
سەرۆكی دەستەی ئاماری هەرێم، ئاشكراشی دەكات كە ڕەگەزی نێر 51.5% و ڕەگەزی مێ 49.5%ی ژمارەی دانیشتووانی هەرێم پێك دەهێنێت.
بە پشتبەستن بە ڕاپۆرتی دینامیکی دانیشتووان لە هەرێمی کوردستان، کە وەزارەتی پلاندانانی حکومەتی هەرێمی کوردستان، بە هاوکاری لەگەڵ سندووقی نەتەوە یەکگرتووەکان بۆ دانیشتووان (UNDPA ) بۆ ساڵی 2020 ئامادەی کردبوو، ژمارەی دانیشتووانی هەر سێ پارێزگای هەرێمی کوردستان (هەولێر و سلێمانی و دهۆک) 6,171,083 کەس بوو.
