كێن ئەو قوتابییانەی دەگەڕێنەوە بەر خوێندن ؟
محەممەد مەحموود – سۆران :
ئەم ساڵیش وەكۆ ساڵی رابردوو وەزارەتی پەروەردە بە هەماهەنگی لە گەل رێكخراوی یونسێف ( (uncef كەمپینی (گەڕانەوە بۆ خوێندن Back to Learning-B2L ) ڕادەگەیەنێت بۆ تۆماركردنی ئەو منداڵانەی كە لە خوێندن دابڕاون لە قوتابخانەكان، لێژنەی بەرێوەبەرایەتیی گشتی پەروەردەی هەولێر راستەوخۆ لە لایەن بەرێوەبەری گشتی سەرۆكایەتی و سەرپەرشتی دەكرێت .
ئینزار تاهیر ئەرگۆشی، بەرپرسی پلاندان لە پەروەردەی سۆران و هەماهەنگكار و سەرپەرشتیاری پڕۆژەی گەرانەوە بۆ خوێندن بە زاری كرمانجی راگەیاند” ئەو هەڵمەتە لە رێكەوتی 22 / 9 / 2022 ڕاگەیاندراوە و لە رێكەوتی 24 / 9 / 2022 دەست پێكردووە تا 1 / 11 / 2022 بەردەوام دەبێت وە لە رێگەی تیمی بەرێوەبەرایەتیی پەروەردەكەمان لیستی ناوەكان داندراوە و ڕاستەوخۆ ئەم پڕۆژەیە جێبەجێ دەكرێت لە سەر ئاستی سنووری پەروەردەی سۆران ، بۆ پێشكەشكردنی هاوكاری كارئاسانی لە پێدانی زانیاری لە سەر قوتابییانی دابڕاو هەروەها تۆماركردنی قوتابییانی گەڕاوە لە پێناو پێدانی هەلی زیاتر بۆ فێربوون “.
ئینزار تاهیر گووتیشی” گەرانەوەی قوتابییەكان بە پێی رێنماییەكانی بەرێوەبەرایەتیی گشتی ئەزموونەكانی وەزارەتی پەروەردە دەبێت ، هەر قوتابییەك رێنماییەكان بگرێتەوە راستەوخۆ لە لایەن تیمەكانمانەوە دەنێردرێتەوە قوتابخانە و دواتر كۆتایی هەموو هەفتەیەك ناوی گەڕاوەكان دادەنێین، پێویستە لەسەر بەڕێوەبەری قوتابخانە لە كاتی ناردنی قوتابییەكان بۆ قوتابخانەكەت قوتابییەكان وەربگری و دڵنیابی لە پۆل و ساڵانی كەوتنی (ئەگەر دوو ساڵ لە سەر یەك لە كۆتا پۆل كەوتبوو لە قوتابخانەكانی شار وە لە قوتابخانەكانی گوندەكان سێ سال كەوتبوو ئەوا لە قوتابخانەكانی رۆژ وەرناگیرێت هەروەها هەر قوتابییەكیش پێشتر قوتابی دەرەكی بێت ناتوانیت بگەڕێتەوە.
هەر قوتابییەكیش پێشتر لە سەر كاری خراپ و ناپەروەردەیی لە قوتابخانە دەركرابێت ئەوا گەڕانەوە لە سەر رەزامەندی كارگێری قوتابخانەیە واتە كارگێری قوتابخانە بڕیار دەدات لە گەڕانەوە و نەگەڕانەوەی ئەو قوتابییە .
