زاری كرمانجی-سۆران:
ئەمڕۆ شەش ساڵ بەسەر خیانەتی 16ی ئۆكتۆبەری 2017 تێدەپەرێت، لەو رۆژەدا هێرش كرایە سەر كوردستان و لە ڕێككەوتنێكی نهێنیدا كەركووك رادەستی هێزەكانی حەشدی شەعبی و هێزە عێراقییەكان كرا. ئامانجی ئەو هێزە كەركووك و ناوچەكانی دەوروبەری نەبوو، بەڵكو پیلانەكە بۆ هەڵوەشاندنەوەی قەوارەی هەرێمی كوردستان بوو، بەڵام هێزی پێشمەرگە لە خاڵەكانی پردێ، سحێلا و مەحموودیە توانیان بەرگرییەكی بێ وێنە لە هەرێمی كوردستان بكەن و هێزە میلیشیاكان بووەستێنن.
بەرەبەیانی رۆژی 16ـی ئۆكتۆبەری 2017، هێزەكانی حەشدی شەعبی بە پشتیوانی هێزە عێراقییەكانی دیكە بەرەو ناوشاری كەركووك لە چەندین میحوەرەوە هێرشیانكرد و چەندین ناوچەیان تۆپبارانكرد. ئەوەی بۆ هەموو كوردستانیان جێگەی سەرسوڕمان بوو، كشانەوەی بێمەرجی هێزەكانی سەر بە لایەنێك بوو لە هەموو ئەو میحوەرانەی لەژێر دەستیاندابوو.
خیانەتی 16ی ئۆكتۆبەر، پەڵەیەكی ڕەشە بە نێوچەوانی ئەو كەسانەوە كە كەركووكیان فرۆشت و ڕادەستی گروپە چەكدارەكانیان كرد، لەدوای 16ی ئۆكتۆبەر كورد دەیان پۆستی لەدەستداو هەموو پۆستەكانیش ڕادەستی عەرەب و توركمان كران، ئێستەش كورد هیچ پۆستێكی لە فەرمانگە حكوومییەكان بەدەستەوە نییە، هەتا بارەگای حزبە كوردستانییەكان لە كەركووك ناتوانن ئاڵای كوردستان لەسەر بینایەكەی خۆیان بەرز بكەنەوە.
كەركووك لە 2014ـەوە كە سوپای عێراق هەڵات لە ترسی داعش، پێشمەرگە بە پەلە شوێنی گرتەوە و پاراستی، لەو سێ ساڵەدا دۆخی ئەمنی بە تەواوەتی كۆنترۆڵ كرا، پێشتر ڕۆژانە تەقینەوەی تیادا تۆمار دەكرا، بەڵام دوای خیانەتی 16ی ئۆكتۆبەر، شارەكە پێشكەشی میلیشیای عێراق كرایەوە و دۆخی ئەمنی ناجێگیرە و شەوانە تەقینەوە ڕوودەدات و قوربانیەكانیش دانیشتووانی كەركووكن، ڕۆژانە لەو شارە هاووڵاتییان دەڕفێندرێن و نارنجۆك دەخرێتە ماڵی كورد و هەڕەشە لە خەڵكی كەركووك دەكرێت.
ئەو پێشمەرگانەی فەرمانیان پێ بوو بەرەنگاری لەشكركێشی گروپە چەكدارەكان ببنەوە، دوای شەكەتی و شەونخوونییەكی زۆر، حەسرەتیان هەڵدەكێشا و بە بەرچاوی كامێراكانەوە بە گریانەوە دەیانگوت “كەركووكیان فرۆشت” و خیانەتیان كرد، ئێستەش كە شەش ساڵ بەسەر ئەو ڕووداوانە تێپەڕ دەبێت، هێشتا لێكۆڵینەوەیەكی هەمەلایەن و بێلایەنانە سەبارەت بە ڕادەستكردنی كەركووك و پاشەكشێی هێزی پێشمەرگە لە كەركووك نەكراوە، ڕۆژ لە دوای ڕۆژ لێكەوتە و شوێنەوارەكانی خیانەتی شازدەی ئۆكتۆبەر برینی گەورە لەسەر دڵی كەركووكییەكان و كوردستان دروست دەكات، هێشتا خەڵكی كوردستان وەڵامی ئەو پرسیارەیان دەست نەكەوتووەتەوە، كە هەر بە ڕاست “كاڵفام و هەرزەكار” بەسە بۆ وەسفی ئەو كارەكتەرانەی لە پشت خیانەتەكەوە بوون، یان پێویستە ئەوان ڕووبەڕووی دادگەی خەڵك بكرێنەوە و وەك خیانەتكار ناویان لە مێژووی نوێی كورد تۆمار بكرێت.
