“ئەمساڵ لە ئیدارەی سۆران بە گوژمەی زیاتر لە پێنج ملیار دینار رێگاوبانەكان چاك كراون”

پشتیوان كەریم – سۆران:
لەكاتی بەشداریكردنی لە پڕۆگرامی بەدواداچوون لە رادیۆی زاری كرمانجی، ئەندازیار خوسرەت سادق، بەڕێوەبەری چاككردنەوە و پاراستنی رێگاوبانی ئیدارەی سۆران باس لە كۆی پڕۆژەكانی رێگاوبان لە سنوورەكە دەكات، ئاماژە بە هەڵمەتی پاككردنەوەی رێگای گوند و باخەكان دەدات.
لە دەستپێكی قسەكانیدا، بەرێوەبەری چاككردنەوە و پاراستنی رێگاوبانی ئیدارەی سۆران، بۆ زاری كرمانجی دەڵێت:” بۆ ئەوەی خزمەتگوزارییەكان خێراتر بگەیەنین لە ساڵی 2021 بەڕێوەبەرایەتیەكەمان بووە گشتی، كارەكانمان بەسەر سێ زۆندا دابەشكرد، لە هەر زۆنێك كەرتێكمان دامەزراند، لە هەر كەرتیك كۆمەڵێك ئامێر و فەرمانبەر و ئەندازیارمان داناون، كەرتی یەكەم قەزای ناوەندی سۆران دەگرێتەوە لەگەڵ بەشێكی رواندز، كەرتی دووەمیش دەڤەری بارزان لە خۆ دەگرێت، دەڤەرێكی فراوانە و لە وەرزی زستان كێشەیەكی یەكجار زۆر دێتە پێش، بەهۆی بارینی بەفرێكی زۆر، هەروەها كەرتێكیش بۆ ناوچەی باڵەكایەتی و ناحیەی وەرتێ دانراوە، ئەمساڵ لە هەموو ئەو شوێنانە بە گوژمەی شەش ملیار دینار پڕۆژە ئەنجامدراون.
ئەندازیار خوسرەت سادق، لەبارەی بوددجە ئاماژەی بەوەكرد:” بوددجەی پلان پڕۆژەی گەورەن، بۆ نموونە چەند رۆژێك لەمەوبەر حەوت پڕۆژە لە پلانی وەزارەتی ئاوەدانكردنەوە و نیشتەجێكردندا بوون كە بۆ پارێزگای هەولێر دەرچوونە، خۆشبەختانە پێنج لەو پڕۆژانە دەكەونە ئیدارەی سۆران، ئەوانیش بە گوژمەی شەش ملیار دینار كە پشكی شێر بەر ناحیەی سیدەكان كەوتوووە، چونكە سیدەكان مەغدوورترین ناحیە بووە لە ساڵانی رابردوو، بەهۆی ئەم پڕۆژانەوە ناوچەكە لەرووی رێگاوبانەوە تا رادەیەكی زۆر كێشەی نامێنێت”.
بەرێوەبەری چاككردنەوە و پاراستنی رێگاوبانی ئیدارەی سۆران، هێمای بۆ ئەوەشكرد:” كاركردن لە رێگای گوندەكان بەردەوامە، ئەمساڵ پاككردنەوەی رێگای باخ و گوندەكان ئەنجامدرا كە نزیكەی 700 كلیۆمەتر پاككرایەوە، ئەوەش لەسەر راسپاردەی سەرپەرشتیاری ئیدارە بوو.
خوسرەت سادق، ئەوەش دەخاتەڕوو:” ئەو ئامێرانەی كە لە بەر دەستی ئێمەدان زۆر كەمن، هەروەها بەشێكیان كۆنن، لە هیچ شوێنێك ئەم ئامێرانە بەكارناهێن، بەڵام ئێمە بە ناچاری بەكاری دەهێنین و داواشمان كردووە ئامێری پێویستمان بۆ دابین بكرێت، بەڵام بەهۆی ئەوەی كە ئامێری رێگاوبان گرانبەهان، بۆیە لەوانەیە ئەوانیش ئەو بوددجەیان لە بەردەست نەبێت, بەڵام هەوڵیش هەیە لە ئایندەیەكی نزیك ئامێری نوێ بۆ بەڕێوەبەرایەتیەكەمان دابین بكرێن، هەروەها ئەو پڕۆژانەی ئەمساڵ دەرخستەمان بۆ كردوون دەیان پڕۆژەن، بۆ هەر پڕۆژەیەك تیمەكانمان دەنێرین دەرخستەیان بۆ دەكەین بەرزیان دەكەینەوە، ئەو رێگاوبانانەی كە پێویستن هەوڵدەدەین لە كاتێكی زوودا ئەنجام بدەین، هەروەها هەر پڕۆژەیەكیش گەر لە كاتی خۆیدا تەواو نەبێت ئەوە بەهۆی ئەوەیە كە ناوچەكەمان سنوورێكی شاخاویە و بەفرێكی زۆری لێ دەبارێت.
لە بارەی پردەكانەوە ئەو بەرپرسەی رێگاوبان، روونیكردەوە:” لە كۆی پەنجا پردی سنووری پارێزگای هاولێر، ٤٢ پرد دەكەونە ئیدارەی سۆران، پردە ئاسنەكان پێویستیان بە توند كردنەوە و چاكردنەوە و سبوخ كردنەوەی بەردەوام هەیە، واتە بە بەردەوامی كێشەمان بۆ دروست دەكەن هەر كاتێك بورغویەك یا پلێتێكی كێشەی تێ كەوت دەست بەجێ تیمەكان دەنێرین بۆ چاككردنەوە، هەندێك جاریش لە رێگەی كۆمپانیاكانی كەرتی تایبەتەوە كە كاری دروستكردنی پردەكان دەكەن پلێتەكان دەگۆڕدرێن و پردەكان توندوتۆڵ دەكرێنەوە، هەروەها پلانمان هەیە بۆ دروست كردنی پردی زیاتر لە سنووری سۆران، هەفتەی دهاتوو پلانی دروست كردنی پردی گوندی بەرگركە لە ناحیەی وەرتێ دەكەوێتە كار، ئەو پردە لە لافاوی ساڵی ٢٠١٨ رووخاوە، هەر چەندە پردەكە خۆی پردێكی هەندەسی نەبووە و لەلایەن خەڵكەوە دروست كرابوو، بەڵام دروست دەكرێتەوە، سوودێكی زۆری بۆ خەڵكی ئەو گوندە دەبێت، لەگەڵ ئەوەی بەردەوام داواكاری هەیە بۆ دروستكردنی پردی ئاسن، بەدواداچوونی بۆ دەكەین و پلانی دروست كردنی بۆ دادەنرێت.
ئەندازیار خوسرەت سادق، بەڕێوەبەری چاككردنەوە و پاراستنی رێگاوبانی ئیدارەی سۆران، گووتی:” وەك هەموو بەڕێوەبەرایەتیەكانی سنووری ئیدارەی سۆران گرفتمان هەیە لە كەمی كارمەند، داوامان كردووە، هەروەها لە سنووری ئیدارەی سۆران سێ كارگەی قیڕ هەن، لەوانە لە قەزای مێرگەسۆر كارگەیەك و دوو كارگەش لە سۆران، بەڵام هیچ كارگەیەكی قیڕی حكوومی نییە، بەجددی كار لەسەر ئەوە دەكەین كارگەیەكی حكوومی بەستانداردی نێودەوڵەتی بهێندرێتە ئیدارەی سۆران، چونكە ئەو كارگە قیڕانەی هەن كارگەی ستاندارد نین، بەڵام ناچارین دەبێ كاری پێ بكەین”.