هەڵگۆرد شێخ نەجیب: لەسەر راسپاردەی سەرۆكی حكوومەت كاروانی ئاوەدانی بەردەوامە

پشتیوان كەریم – سۆران:

كردنەوەی دەروازەی كێلەشین و زێتێ لەگەڵ ئێران و توركیا هەنگاوی باشیان بڕیوە

لە دیمانەیەكی تایبەتی زاری كرمانجی دا، هەڵگورد شێخ نەجیب، سەرپەرشتیاری ئیدارەی سۆران، لەبارەی تێپەڕبوونی ساڵێك بەسەر تەمەنی ئیدارەكە، باس لە كاروچالاكی و ئەو پڕۆژانە دەكات كە لە ماوەی رابردوو جێبەجێ كراون، هاوكات باسی پلانی داهاتوو دەكات و دەڵێت:” لەئێستادا كاروانێكی دیكەی ئاوەدانی لە ئیدارەی سۆران دەستی پێكردووە، بۆ ئەم مەبەستە سەرۆكی حكوومەت ئێمەی راسپاردووە تا بەجوانترین شێوە خزمەتی دەڤەرەكە بكەین.
لە دەستپێكی قسەكانیدا، هەڵگۆرد شێخ نەجیب، دەڵێت:” لە رۆژی 14ی ئەیلوولی 2021، خوددی سەرۆك بارزانی ئەو متمانەی بە ئێمەدا، هەنگاوەكانمان خستۆتەگەڕ بۆ ئەوەی لە هەنگاوی یەكەم هەیكەلی ئەو ئیدارە دروست بكەین، راستەوخۆ وەك ئیدارەیەكی سەربەخۆ مامەلەمان كرد، بەشە گرنگەكانی هەیكەلی، كارگێڕی و یاسایی و بەشی هونەری ئەندازەكانمان دروستكرد، بەشەكانی دیكەش هەنگاوبەهەنگاو دروستیان دەكەین، لەساڵی ئایندە حەوت بەڕێوەبەرایەتی گشتی فەرمانی سەرۆكی حكوومەتی پێ دەرچووە و دروستكراون و دەست بەكار دەبن، بەوەش هەم كارەكان زیاتر خێرا دەبن، هەم رۆتینیات مامەڵەكردنی ئیداری كەمتر دەبێت، ئەو بەشانەی كە دروستیشمان كردوون تا ئێستا كەسی بۆ دانەمەزراوە، سوودمان لە هەموو كارمەند و فەرمانبەر و ئەندازیارانی بەڕێوەبەرایەتیەكانی دیكە وەرگرتووە و گواستوومانەتە ناو ئیدارە زۆر بە دڵسۆزی كار دەكەن، بەدڵنیاییەوە پێویستمان بە فەرمانبەری پیسپۆڕە لەم بەڕێوەبەراتیانە داوامانكردووە خودی سەرۆكی حكوومەت رەزامەند بێت لەسەر چەند گرێبەستێك بۆ ئەو بەڕێوەبەرایەتیانە”.
سەرپەرشتیاری ئیدارەی سۆران، دووپاتی كردەوە:” لە كەمكردنەوەی رۆتینیاتە كارگێڕییەكان و لە جێبەجێكردنی پڕۆژەكانیش، ئەمساڵ جیاواز لە ساڵەكانی تر، لە سنووری ئیدارەی سۆران كاری باشكراوە و خەڵكیش هەست بەو گۆڕانكارییە دەكەن، لە كاتێكدا ناشتوانین لە ماوەی یەك ساڵدا، هەڵسەنگاندن بۆ ئیدارەیەكی وەها گەورە بكەین بزانین تا چەند سەركەوتوو بووە.
ئاشكرای دەكات:” لەئێستادا كاروانێكی دیكەی ئاوەدانی لە ئیدارەی سۆران دەستی پێكردووە، كابینەی نۆیەم بەخۆشحاڵییەوە سەرەڕایی قەیرانە داراییەكان دەستی بە پرۆژەكان كردووە، سەرۆكی حكوومەت ئێمەی راسپاردووە تا بە جوانترین شێوە خزمەتی دەڤەری سۆران بكەین، ئێمەش بە هەموو هێز و توانامانەوە هەوڵدەدەین لەژێر راسپاردە و رێنمایەكانی مەسرور بارزانی پڕۆژەی گرنگ و ستراتیژی جێبەجێ بكەین، لەم ساڵەدا ئەم بوددجەیە و بڕە پارەیەی وەك ئیدارە لە بەردەستمان بووە، توانیومانە بە دادپەروەرانە لەسەرجەم قەزا و ناحیەكانی سنووری ئیدارە دابەشی بكەین بەشیوەیەكی خێرا پڕۆژەی پێ جێ بەجێ بكەین”.
هەڵگورد شێخ نەجیب، روونی دەكاتەوە:” پڕۆژە خزمەتگوزاریەكانیش سەرەتاین، لە چەند ساڵی رابروو كاركردنیان تێدا راگیرابوو، ئێستا دەستمان پێكردوونەتەوە، ناتوانین تەواوی كەم و كوڕیەكانی چەندین ساڵی كەڵەكەبوو چارەسەر بكەین، بۆیە كاتمان پێویستە و داواكارم لە هاووڵاتییان بەتایبەتی سەنتەری شاری سۆران هاوكارمان بن، چونكە زۆر جار كە خزمەتگوزاری بو شوێنێك دەبەین چەندین شوێنی دیكە دێنە سەرخەت داوا دەكەن و گلەیش دەكەن، سۆران بەشێوەیەكی زۆر خێرا گەورە و بەرفراوان بووە، زێدەرۆیی زۆر كراوە، بۆیە لەكاتی جێبەجێكردنی پڕۆژەكانیش كێشەی زۆرمان بۆ دروست دەبێت، هەوڵی ئێمە ئەوەیە كە ئەوەی كراوە راستی بكەینەوە و رێكی بخەین، لەمەودوا بەرفراوان بوونی ئیدارەی سۆران بە ئەندازەیی و بەرێكو پێكی بكەین”.
دەشڵێت:” بۆ شەقامی سی مەتری و شەست مەتری، مژدەی خۆش هەیە، پڕۆژەی دووساید كرنی سپیلیك – خەلیفانیش دەستی پێدەكرێت، هەروەها رێگای حاجی ئۆمەران چۆمان وەستاو بوو ئێستا كاركردن لە هەنگاوی یەكەم بە نزیكەی چوار كلیۆمەتری ئەنجام دەدرێت، كۆمەڵێك پڕۆژەی گرنگ لە واری جێبەجێ كرندندایە، بە تەواو بوونییان ئاسانكاری باش بۆ هاووڵاتییان و شوفێران دروست دەبێت”.
لە بەردەوامی قسەكانیدا، سەرپەرشتیاری ئیدارەی سۆران، گووتی:” هەریەك لە سێكتەرەكانی ئاو، كارەبا گرفتی زۆریان هەبووە، ئەمساڵ نزیكەی شەش ملیار تەرخانكراوە بۆ گرفتی ئاو هەوڵمانداوە بۆ لێدانی بیر سوودی لێ ببینین، پرۆژەكانی كارەبا كارمان بۆ كردووە، لە چۆمان و هێلی هەولێر – سۆران كراوە، هەروەها دروستكردنی پارك كارمان لەسەری كردووە هەنگای باشمان بڕیوە كاری لەسەر دەكەین لەئایندەیەكی زۆر نزیك ئەم پڕۆژەیە رادەگەیێنین، هاوكات لە سێكتەری تەندروستیش دەبێت ئەو بوددجەیەی لە بەردەستمانە، میكانیزمێك بدۆزینەوە بۆ دابەشكردنی بەشێوەیەكی دادپەروەرانە لە سەرجەم ئیدارەی سۆران”.
ناشیشارێتەوە كە بەهۆی پەكەكە و شەڕ و پێكدادانی وڵاتانی دراوسێ، گوندە سنوورییەكانی ئیدارەی سۆران، نائارامن، دەڵێت:” بەداخەوە گوندە سنووریەكان، ساڵانێكە بەهۆی شەڕی عێراق و ئێران بوونەتە قوربانی و ئارامییان تێكچووە، ئێستاش بەهۆی ململانێی شەڕێك كە دور و نزیك پەیوەندی بەوانەوە نییە، هەوڵمان داوە ئەم شەڕە لە نزیك گوند و ئاواییەكان دوور بخەینەوە.
سەرپەرشتیاری ئیدارەی سۆران، ئاماژەشی بەوەدا:” ماوەیەكی زۆرە بینای قوتابخانە لەم سنوورە دروست نەكراون، پارساڵ و ئەمساڵیش زیاتر لە 500 ملیۆن دینار بۆ نۆژەنكردنەوەی ئەو قوتابخانانەی كە پێویست بوون تەرخان كراوە، ئەمساڵیش وەزارەتی پەروەردە كەل و پەلێكی زۆری دابینكردووە بۆ پەردوەردەكانی ئیدارەی سۆران، لە پلانماندایە لە گەڕەكی ئیسقەلا قوتابخانەیەك دروست بكەین، لەگەڵ ئەوەی ساڵی داهاتوو كۆمەڵەێك قوتابخانەی نوێ دروست بكەین.
هەڵگورد شێخ نەجیب، سەرپەرشتیاری ئیدارەی سۆران، گووتیشی:” هەوڵەكانمان بۆ كردنەوەی دەروازەی سنووری كێلەشین و زێتێ لە نێوان وڵاتانی ئێران و توركیا بەردەوامە، هەنگاوی باشمان بڕیوە و كرنەوەی زۆرترین دەروازە لە سنووری ئیدارەی سۆران ئاستی جموجۆڵی بازرگانی بەرز دەكاتەوە، هەر ئەوەش وای كردووە بەردەوام كار لەسەر كردنەوەی ئەو دەروازانە بكەین”.