زاری كرمانجی-سۆران:
سەرۆک بارزانی لە کۆبوونەوەی لەگەڵ باڵیۆزی ئەڵمانیا لە عێراق ڕایگەیاند، تیرۆر هەڕەشەیەكی هاوبەشە بۆسەر هەموو مرۆڤایەتی و ئازادیخوازان و ئەو هەڕەشەیە هێشتا هەر بەردەوامە.
سەرۆک مەسعود بارزانی ئەمڕۆ دووشەممە 09ـی 10ـی 2023 لە سەڵاحەدین پێشوازی لە كریستیانە هۆمان باڵیۆزی ئەڵمانیا لە عێراق و شاندێكی یاوەری كرد كە لە ژمارەیەک دیپلۆماتكار و ڕاوێژكاری سەربازیی ئەڵمانیا پێكهاتبوو.
لە كۆبوونەوەكەدا سەرۆک بارزانی پیرۆزبایی دەستبەكاربوونی باڵیۆزی تازەی ئەڵمانیای كرد و هیوای سەركەوتنی بۆ خواست. هەروەها ئاماژەی بە پەیوەندیی و دۆستایەتیی نێوان گەلی ئەڵمانیا و گەلی كوردستان دا و سوپاسی گەل و حكوومەت و سوپای ئەڵمانیای كرد كە لە شەڕی تیرۆریستانی داعشدا یارمەتیی هێزی پێشمەرگەی كوردستانیان داوە. ئەوەشی خستەڕوو كە تیرۆر هەڕەشەیەكی هاوبەشە بۆسەر هەموو مرۆڤایەتی و ئازادیخوازان و ئەو هەڕەشەیە هێشتا هەر بەردەوامە و بە پێویستیشی زانی هەوڵە جیهانییەكان بۆ ڕیشەكێشكردنی تیرۆر بەردەوام بێت.
لەبەشێكی دیکەی ئەو دیدارەدا باڵیۆزی ئەڵمانیا لە عێراق وێڕای ئاماژەدان بە مەترسییەكانی بەهێزبوونەوەی تیرۆر، جەختی لە بایەخپێدانی وڵاتەكەی بۆ كاری هاوبەش و هەماهەنگی لە گەشەسەندنی سەقامگیری و خۆشگوزەرانی و ئابووریی بەهێز لەگەڵ عێراق و هەرێمی كوردستان كردەوە.
بارودۆخی سیاسیی عێراق و پەیوەندی و هەماهەنگیی نێوان ئەڵمانیا و هەرێمی كوردستان و بایەخدان بە كشتوكاڵ و ئابووریی فرەچەشن تەوەری دیکەی ئەو كۆبوونەوەیە بوون.
