زاری كرمانجی-سۆران:
پەرلەمانتارێكی پارتی دیموكراتی كوردستان لە پەرلەمانی عێراق، رایگەیاند، ئەو پڕۆژەی یەكێتی بۆ ناردنی مووچەی فەرمانبەران لە بەغداوە بەشێوەی ڕاستەوخۆ زۆر مەترسیدارە و رێگری لێ دەكەین.
دوای ئەوەی ژمارەیەك پەرلەمانتاری یەكێتی بە پاڵپشتی ژمارەیەك لە پەرلەمانتاری عەرەب واژوویان كۆكردووەتەوە كە مووچە راستەوخۆ لە بەغداوە بۆ فەرمانبەرانی هەرێمی كوردستان بنێردرێت و ئەو پەرلەمانتارە عەرەبانەشی پشتگیری ئەم پڕۆژەی یەكێتی دەكەن بە دژە كورد و كیانی سیاسی هەرێم ناسراون، ئەندام پەرلەمانەكانی پارتی هەڵوێستیان نواند و دەڵێن دژی ئەم پڕۆژەیە دەوەستین لەبەر ئەوەی مەترسییە بۆ سەر كیانی هەرێمی كوردستان و مووچەخۆران.
نەهرۆ مەحموود رواندزی، ئەندامی پەرلەمانی عێراق لە فراكسیۆنی پارتی، بە زاری كرمانجی گووت: ئەم پڕۆژەیە زۆر مەترسیدارە و وەكو فراكسیۆنی پارتی دیموكراتی كوردستان بەهیچ شێوەیەك لەگەڵی نین و رێگری لێ دەكەین، لەبەر ئەوەی بە پێدانی راستەوخۆی مووچە لەلایەن بەغداوە بە فەرمانبەرانی هەرێمی كوردستان، مەترسی دەكەوێتە سەر مووچەی فەرمانبەران، بەمەیش هەر مووچەخۆرێك دوای ساڵی 2007 دامەزرابێت، مووچەكەی دەبڕدرێت”.
رواندزی، زیاتر روونیكردەوە: ئەوە پیلانی هەندێك لایەنە و پێویستە فراكسیۆنە كوردییەكان ئاگاداری مەترسییەكانی پشت ئەم بابەتە بن، چونكە ئەم كارە بۆ بچووككردنەوەی قەوارەی هەرێمی كوردستانە”.
نەهرۆ مەحموود، زیاتر روونیكردەوە: هەر پڕۆژە یاسایەك لە دژی هەرێمی كوردستان بێت، ئێمە دژی دەوەستین و رێی پێ نادەین، ئەوەی یەكێتی دەیكات جێبەجێكردنی ئەجێندای دەرەكییە”.
