پەكە*كە بەهانە دەداتە دەست توركیا بۆ داگیر كردنی خاكی كوردستان

” هەر چوار پارچەی كوردستان بەهۆی پەكە*كە لە مەترسیدایە”

زاری كرمانجی – سۆران:
پارتی كرێكارانی كوردستان “پەكە*كە”، حزبێكی كوردی چەپە و بە هزری ماركسی و لینینییەوە لە ساڵی 1978 لە باكوری كوردستان دامەزراوە و دواتر لە چیای قەندیل نیشتەجێ بوون، ساڵی 1992 ڕوویان لە لە ناوچە شاخاویەكانی كوردستان كردووە.
ماوەی بیست ساڵە زیاترە، ” پەكە*كە” لە ناوچە شاخاوی و گوندە سنووریەكانی سنووری ئیدارەی سۆران نیشتەجێ بوونە و لەماوەی ئەو ساڵانەدا بەردەوام شەڕ و ناكۆكی لەگەڵ توركیا هەیە، بەهۆی ململانێ و شەڕ و رووبەڕوو بوونەوەكانیان سەدان هاووڵاتی سڤیل لەو سنوورە ە بوونەتە قوربانی و ژمارەیەكی زۆری گوندیش چۆڵكراون و بوونەتە كێشە و گرفت بۆ هاووڵاتییان و بەهۆی ململانێی سیاسی دەڤەرەكەیان وەك مەیدانی جەنگ سوودیان لێ بینیووە.
هەر بەهۆی ناكۆكی و ململانێی سیاسی لە نێوان هەردوولادا، توركیا لە ساڵی 2017 لەشكركێشی بۆ سنووری ناحیەی سیدەكان دەستپێكردووە و بە مەودای زیاتر لە 30 كیلۆمەتر لەو ناوچەیە داخلی خاكی هەرێمی كوردستان بووە، بەپێی زانیاریەكان توركیا دەیەوێ كۆتای بە چەكدارانی پەكە*كە بهێنێت، ئەمەش وای كردووە رێژەیەكی زۆری خاكی كوردستان بەهۆی ئەوشەڕ و پێكدادانە بە نائارامی بمێنێتەوە و ژمارەیەكی زۆری گوندیش چۆڵكراون.
لەو بارەیەوە، د. مەهدی ستوونی مامۆستای زانكۆ بە زاری كرمانجی گووت:” بەهۆی ئەو سیاسیەتە هەڵەی پەكەكە پەیڕەوی دەكات بەهانە دەدەنە دەست وڵاتی توركیا تا لەشكركێشی بكەن و خاكی كوردستان داگیربكەن، چونكە بەپێی یاسایی نێودەوڵەتی مافی ئاسایی هەر دەوڵەتێكە بۆ پارێزگاری لە وڵاتەكەیان و نەهێشتنی تیرۆر لەسەر تەناهی گشتی و بەرقەرار بوونی ئەمنی، تا رادەیەك سنووری دراوسێ و وڵاتێكی دیكە ببەزێنن و خۆیان بپارێزن.
بە گووتەی ئەو مامۆستای زانكۆ، دروست بوونی پەكەكە بۆ تێكدانی بار و دۆخی هەرچوار پارچەی كوردستان بووە، چونكە ئامانجی سەرەكی پەكەكە شكست پێهێنانی پڕۆژەی نەتەوەی كوردە لەو پارچانەی كوردی لێ دەژیت، بۆیە ناكرێت پەكەكە بە حزبێكی نەتەوەی دابنێیین، ئەگینا پەكەكە چی دەكات لە شنگاڵ و قەندیل و سنوری ئیدارەی سۆران ؟ لە قامیشلۆ و ئیران و پارچەكانی دیكە چی دەكات؟.
د . مەهدی ستوونی، روونی دەكاتەوە:” ئەگەر پەكەكە وەك حزب دەیەوێت خزمەتی خەڵك بكات، دەبێ بەپێی بەرژەوەندی مللەتی خۆیان كار بكەن و پێویستیشە ئاشتی بەرقەرار بكەن، گۆڕەپانی سیاسی ئەوانیش توركیایە نەك سیدەكان و شنگاڵ و ناوچەكانی باشووری كوردستان، بەڵام بەداخەوە پەكەكە نەك نەیتوانیوە هیچ گوندێكی باكووری كوردستان ئازاد بكات، بەڵكو بوونەتە ئاستەنگیش لەبەردەم كوردەكانی باكوور، پێویستە ئەو سیاسەتە هەڵی خۆیان بگۆڕن چونكە سەردەم گۆڕاوە و دەبێ لەرێگەی ئاشتی و دیبلۆماسی كار بكەن و واز لەو دژایەتیی و كارە ناڕەوایەكانیان بهێنن.
گووتیشی:” جێگەی داخە، هەندێ لایەن و حزبە سیاسیەكانی كوردستان بۆ بەرژەوەندی تەسكی حزبایەتییان و تێكدانی بار و دۆخ و ئارامی گوند و ئاوایەكانی كوردستان، هاوكاری پەكەكە دەكەن تا بەردەوامی بەو دژایەتیەی قەوارە و خەڵكی هەرێمی كوردستان بكات، ئەمەش بووەتە هۆكار كە چەكدارانی پەكەكە بەردەوامی بە رێباز و خەباتی نائاسایی و ناتەندرووستی خۆیان بدەن.
لای خۆیەوە، محیەدین بادلی چاودێری سیاسی بە زاری كرمانجی گووت:” لە دەسپێكی نەوتەكان و دامەزراندنی حكومەتی هەرێمی كوردستان سەركردایەتی پەكەكە بە ئاشكرا دژایەتی خۆیان دەربڕیووە بەرامبەر بە هەرێمەكەمان، چەندین جار پەلاماری چەكداری بۆ سەر خاكی هەرێم ئەنجامداوە، هەمیشە ویستوویانە تەگەرە بخەنە بەردەم پڕۆسەی سیاسی كوردستان، ناوچە سنوورییەكانی هەرێمی كوردستانیان كردوونەتە مەیدانی شەڕ، لەهەمانكاتدا بوونەتە هۆكارێك بۆ لەشكركێشی توركەكان و تۆپبارانكردنی دێهات و ناوچەگەشتیاری و كوێستانەكان، كە بەو هۆیەوە دەیان كەسی بێتاوان بوونەتە قوربانی و زیاتر لە 600 گوند چۆڵكراون.
ئەو چاودێری سیاسیە، دەڵێت:” دوای ئەوەی پەكەكە لە كردار و رەفتارە سیاسی و سەربازییەكانیان دژ بە كوردستانی ئازاد شكەستیان هێنا، هەروەها پێگەی جەماوەریشیان بەرەو پوكانەوە ملیناوە، ئەوجارە دەستیان داوەتە لێدان لە لایەنی ئابووری و بازرگانی و ئەمنی هەرێمی كوردستان، پێشتریش چەند جارێك بۆڕی نەوتی كوردستانیان تەقاندۆتەوە، مەبەستی ئەوانیش لاوازكردن و بڕینی ئەو بڕە داهاتەیە كە لەو ڕێگەیەوە حكومەت دابینی دەكات بۆ بەڕێوەبردنی خەڵك و وڵات، هەروەها هێنانەدی مەرامی دوژمنانی ئازدی و بوونی كیانی كوردە، كە چاویان هەلنایەت بەو پێشكەوتنانەی هەرێمەكەمان لە ڕووی ئابووری و سیاسی پەرەی پێداون..
گووتیشی:” خەڵكی كوردستان باش لەوەگەیشتوون كە چەكدارانی پەكەكە دوورن لە كوردایەتی و خۆشەویستی بۆ جەماوەر، بەڵكو چەندین ساڵە بوونەتە گرفتێكی گەورەو ڕێگر لەبەردەم پرۆسەی سیاسی و ئاوەدانكردنەوەو ئابووری هەرچوار پارچەی كوردستان، دەركەوتووە كە دوای ئەو هەموو ساڵەی خەبات و كوشتن و كوشتنكارییەیان نەیانتوانیووە كردۆلكەیەكی كوردستانی باكوور ئازادبكەن و تێیدا بحەوێنەوە، بەلكو باشووریان كردۆتە مۆلگەی خۆیان و مەیدانی شەڕو ئاژاوەو بوونەتە میوانێكی نەخوازراوو نەویستراو لێرانەو بەڵایەكی گەورە بەسەر باكووریشەوە، بۆیە تكامان وایە پەكەكە سنووری هەرێمی كوردستان جێبهێلێت و خەباتی خۆی بگوازێتەوە بۆ مەیدانی ڕاستەقینەی خۆیان كە كوردستانی باكوورە نەك كورستانی ئازادكراو پڕلە ئارامی باشوور.
شایەنی باسە، پێشتر، چەكدارانی پەكەكە لە سنووری برادۆست، چەندین ناوچەی ستراتیژیان لە گوند و كوێستانەكان بەدەستەوە بوو لە بێركم و سنین، لۆڵان، خواكوڕك، چیادێل، خنێرە، بارەگا و بازگەی خۆیان بە تەواوی پێداویستیەوە دانابوو، بەپێی زانیاریەكانی دەست زاری كرمانجی كەوتووە، لە ئێستەدا چەكدارانی پەكەكە هیچ ناوچەیەكی دیاری كراویان لە ژێر دەست نەماوە و تەنها شەڕی پارتی زانی دەكەن، ئەمەش وای كردووە توركیا بە هەڕەمەكی تۆپباران و بۆڕدومانی دەڤەركە بكات و لەو دووایانەشدا ئۆپەڕاسیۆنی سەربازیان ئەنجامداوە”.