موڕشید برادۆستی – سیدەكان:
ماوەی چەند ساڵێكە، لە قەزای سیدەكانی سەر بە ئیدارەی سەربەخۆی سۆران، پەخشی كەناڵە ناوخۆیەكان بوونی نییە و دانیشتوانی لێ بێبەشن، ئەمەش نیگەرانی دروست كردووە و گەنجان لە ڕێگەی زاری كرمانجی داوا لە لایەنی پەیوەندی دار دەكەن بۆ دابین كردنی ئەو خزمەت گوزاریە.
سەركەوت جەمال چالاكوانێكی سیدەكانە، بە زاری كرمانجی گووت:” تائێستا هیچ خزمەت گوزاریەكی كەناڵە ناوخۆیەكان لە سنوورەكەمان بونی نییە و كار ناكات، چەندین جار داواكاریشمان داوەتە لایەنی پەیوەندیدار و كۆمپانیاكانی گەیاندن، بەڵام تائێستا هیچ هەوڵێكی دڵخۆشكەر نییە، بۆیە پێویستە وەك شوێنەكانی دیكە ئەو خزمەت گوزاریە بگەیەندرێتە ناوچەكەمان، تاچیتر خولیا و ئارەرزوومەندان لێی بەش نەبن .
ئاماژەشی بەوەدا،” هەبوونی كەناڵە ناوخۆیەكان گرنگی زۆری بۆ سنوورەكەمان هەیە، خواستێكی زۆری لەسەرە، بە تایبەت لەلایانی وەرزشی، ڕۆشنبیری، پەروەردە، ئاینی و بوارەكانی تر، دەرگا دەكاتەوە بەڕووی بەهرەمەندان و خولیای ڕاگەیاندنكاران، دەتوانن لەو ڕێگەیەوە بەهرە و توانای خۆیان پێشان بدەن.
فەهیم عومەر هاووڵاتییەكی دەڤەرەكەیە و شارەزای ئامێرە ئەلیكترۆنییەكانە، دەڵێت، لەساڵانی ڕابردوو لەرێگەی كۆمپانیایەكەوە بەشێك لە كەناڵە ناوخۆییەكان لە سنوورەكەمان كاری دەكرد، بەڵام بەشێوەیەكی باش نەبوو بەردەوام گرفتی هەبوو، بۆیە خەڵك زۆر بەكاریان نەدەهێنا، لەو ماوەیەدا چەندین جار داوایی گەیاندنی پەخشی كۆمپانیای HDBOXمان كردووە، بەڵام تا ئێستا نەتوانراوە لە سنوورەكەمان بوونی هەبێت.
زیاتر گووتی:” ئەوانەی داوا دەكەن بە زۆری بۆ سود مەند بوونە لە بینینی یاریەكان، لەگەڵ ئەوەشدا خەڵكێكی زۆر هەیە حەز بە كەناڵی ناوخۆی و پڕۆگرام و بەرنامەكان دەكات.
لای خۆیەوە، عەلی بولۆ نوێنەری كۆمپانیای HDBOX لە سۆران، بە زاری كرمانجی ڕاگەیاند:” ئێمە لە ماوەی ڕابردوو پشكنینمان بۆ سنووری قەزای سیدەكان كردووە، بەڵام بەهۆی شاخاوی بوون و هەڵكەوتەی شوێنەكە نەمان توانیوە پەخشی كەناڵەكان بە تایبەت بگەینینە سیدەكان، بەڵام پلانێكی دیكەمان بۆ ئەو دەڤەرە داناوە ئەگەر بگەینە ڕێكەوتن لە ماوەیەكی نزیكدا پەخشی كەناڵە ناوخۆیەكان دەگەینینە سیدەكان.
دووپاتی کردەوە:” دووای هەوڵێكی زۆر، سەرجەم كارەكانمان ئەنجامدا بۆ گەیاندنی پەخشی كەناڵە ناوخۆیەكان لە چوارچێوەی كۆمپانیاكەمان بە سنووری قەزای مێرگەسۆر و سیدەكان، كارەكانمان هەمووی تەواو كردووە و بە نیاز بووین دانانی وێستگەیەكن لە پیران سنووری قەزای مێرگەسۆر، لەو ڕێگەیەوە دەتوانرێت پەخشی 280 كەناڵی ناوخۆی لە سنووری قەزای مێرگەسۆر و سیدەكان كارپێبكەین .
بریكاری كۆمپانیای HDBOX لە سۆران، گووتیشی:” دانانی پەخشی كەناڵە ناوخۆیەكان لە سنووری ئەو دوو قەزایە، تەنها ڕەزامەندی كارگێڕی چیای كۆڕەكی پێویستە، كە گرفتی ئێمە لەسەر ئەو پارەیە كە مانگانە ئەوان لە بری دانانی تاوەر ” بورج ” داوایی دەكەن، سەرجەم تاوەرەکانمان لە شار و شارۆچكەكان بەلایەنی زۆر 500 دۆلارە، بەڵام كارگێڕی چیای كۆڕەك داوایی 700 دۆلار دەكەن، ئەگەر بێتوو ئەوان بەو نرخەی ئێمە ڕەزامەند بن، لە ماوەی یەك هەفتەدا پەخشی كەناڵە ناوخۆیەكان دەگەینینە سنووری هەردوو قەزای مێرگەسۆر و سیدەكان .
بە گووتەی ئەو بریكارە، لە كۆمپانیای HDBOX، خەرجی هاووڵاتییان بۆ دانان و كارپێكردنی پەخشی كەناڵە ناوخۆیەكان، كڕینی سێڵ و ئامێر، كەمتر لە 35 هەزار دینار، 280 كەناڵی ناوخۆی كاردەكات”.
