موڕشید برادۆستی – سیدەكان:
سەرپەرشتیاری پڕۆژەكە: ڕێگە نادەین پڕۆژەكە بە كەم و كوڕی تەواو بكرێت
ماوەی چەند مانگێكە، لەلایەن كۆمپانیای كۆڕەك بۆ بەڵێندەرایەتی، دەست كراوە بە دروست كردن و قیڕتاو كردنی رێگەی گەلی شێخزادان لە سنووری قەزای سیدەكان، سەرپەرشتیاری پڕۆژەكەش دەڵێت، پڕۆژەكە 70%ی تەواو كراوە و ناهێڵین بە كەم و كوڕی تەواو بكرێت .
زوبێر محەمەد ئەندازیاری سەرپەرشتیار لە پڕۆژەكە، بە زاری كرمانجی ڕاگەیاند،:” پڕۆژەی ڕێگەی گەلی شێخزادان بە گوژمەی یەك ملیار و 238 ملیۆن دینار لەسەر بوددجەی وەبەرهێنانی وەزارەتی ئاوەدان کردنەوە و نیشتەجێ کردنی حكوومەتی هەرێمی كوردستان و لەلایەن كۆمپانیای ” كۆڕەك ” بۆ بەڵێندەرایەتی دەست بەجێبەجێ كردنی كراوە، ئێمەش وەك بەڕێوەبەرایەتی چاككردنەوە و پاراستنی ڕێگە و بانی سۆران سەرپەرشتی دەكەین.
زیاتر گووتی:” درێژی ڕێگەی گەلی شێخزادان 9 كیلۆمەتر و نیوە، لە ڕۆژانی رابردوو بەشێكی پڕۆژەكە كاری قیڕتاوكردنی بۆ ئەنجامدراوە، بە شێوەیەكی گشتی پڕۆژەی گەلی شێخزادان 70%ی تەواو كراوە، هەروەها 2300 مەتری قیڕكردن و شۆڵدەری ماوە، ئەگەر هیچ گرفتێك نەهێتە پێش، سەرەتای ساڵی نوێ واتە كەمتر لە چوار مانگی دیكە كۆتای بەكارەكان دەهێندرێت و پڕۆژەكە تەواو دەكرێت .
لە بارەی نیگەرانی دانیشتوانانی دەڤەرەكە، لە كەم و كوڕی پڕۆژەكە، ئەو ئەندازیارەی سەرپەرشتیار، گووتی:” پڕۆژەكە هیچ بڕگەیەكی وای تێدا نییە تا كەم و كوڕی تێدابێت، تەنها بەردی شكاو ” موكەسەڕ ” و قیڕتاوكردنە، ئەم دوو بڕگەیەش هەر خۆی نابێت كەموكوڕی تێدابێت، ئەوەی باسی لێدەكرێت لە ئاوبەر ” قەنتەڕە ” كەموڕی هەیە، دیارە چەند ساڵێك بەر لە ئێستا دروست كراو و پەیوەندی بە پڕۆژەکەمانەوە نییە، بەڵام بۆ بەرژەوەندی گشتی هەوڵی چارەسەر كردنی ئەو شوێنانەش دەدەین، لە پرٍۆژەی ڕێگەی گەڵی شێخزادان، ئێمە نوێنەری حكوومەت و سەرپەرشتیارین، بە هیچ شێوەیەك ڕێگە نادەین پڕۆژەكەكە بە كەموكوڕی و گرفتەوە تەواو بكرێت، هەر کێشەیەکی هەبێت پڕۆژەكە لە حكوومەت وەرناگیرێت .
زوبێر محەمەد، ناشی شارێتەوە، پڕۆژەكە ستراتیژی گرنگە و دەڵێ:” بە تەواو بوونی ئەو پڕۆژەیە، چەندین گوندی سنووری گەلی شێخزادان و دەشتی هێرت لە قەزای سیدەكان سودمەند دەبن و ئاسانكاری زۆری هاتووچۆیان بۆ دروست دەبێت .
جێگەی باسە، لە دەستپێكی دامەزراندنی كابینەی نۆیەمی حكوومەتی هەرێمی كوردستان تا ئێستەشی لەگەڵدا بێت، گرنگی زۆری بە خزمەت گوزاری بەتایبەت بواری ڕێگە و بانی داوە، ئەمە سەرباری ئەوەی حكوومەتی عێراق هیچ بوددجەیەكی تایبەت بۆ پڕۆژەكان نانێرێت و لەسەر داهاتی نێوخۆی جێبەجێ دەكرێن، تەنها لە سنووری قەزای سیدەكان، سێ پڕۆژەی ڕێگە و بان بە گوژمەی زیاتر لە شەش ملیار دینار لە واری جێبەجێ كردندان، ئەوانیش پێكهاتوون لە پڕۆژەی ” ڕێگەی دۆڵی زەرزێ، گەلی لێتان، گەلی شێخزادان “.
