توانا تەها
سەربەخۆیی كوردستان مافێكی رەوای گەلی كوردستانە، ریفراندۆمیش بنەمایەكی گرنگە بەرە و سەربەخۆیی، سەربەخۆییش خەون نییە، بەڵكو كورد زیاتر لە سەد ساڵە قوربانی بۆ دەدات و لەو پێناوەدا تێدەكۆشێت.
لە لایەكی دیكەوە ریفراندۆمی سەربەخۆیی كوردستان وایكرد پرسی سەربەخۆیی كوردستان بچێتە بوارە بیرلێكراوەكانی ناوەند و بڕیار بەدەستەكانی جیهان كە پێشتر بەو ئاستە نەبووە. زیاتر لەوەش بۆ داهاتوو بەرچاومان روونترە، رێگەمان ئاسانترە، چونكە هەڵوێستی دراوسێ، دۆست، جیهان و دووژمنەكانمان بۆ دەركەوت، دەزانین گرە و لەسەر كێ دەكرێت و لەسەر كێش ناكرێت، لاوازییە ناوخۆییەكانمان چین و دەبێت چۆن چارەسەریان بكەین.
یەكێكی دیكە لە بایەخە گرنگەكانی ریفراندۆمی سەربەخۆیی ئەوەبوو، داخوازییەكانی گەلی كوردستانی لە باشووری كوردستان بەرزكردەووە بۆ ئاستی سەربەخۆیی، كە زۆر كەس و لایەن دەمێك بوو وازیان لێهێنابوو، كورد 53 ساڵ بەر لە ئێستا كاتێك ئۆتۆنۆمی بەدەستهێنا رژێمی بەعس تەنیا بە مانۆرێكی دەزانی. بەڵام وەك خۆی مایەوە و دوای رووخانی رژێمی بەعس لە ساڵی 2003 هەرێمی كوردستان زیاتر گەشەی كرد، ئەمەش دەكرێت بكرێتە گەورەترین وانەی بە بەهای مەعنەویی ریفراندۆمی سەربەخۆیی كوردستان، ئەم دەنگەش بەردێكی دیكەیە لە دوای ئەتۆنۆمییەكەی ساڵی 1970 لە بناغەی رێگەی دوور و درێژی بەرە و دەوڵەتی كوردستان.
ئایا ریفراندۆم شكستی هێنا
ریفراندۆم نەك هەر شكستی نەهێنا، بەڵكو سەركەوتنێكی گەورەی بەدەستهێنا، چونكە ئەگەر ریفراندۆم شكستی هێنابێت ئەوە واتای ئەوەیە ئەنجام نەدراوە. بەڵام كە ئەنجامدراو و ئەنجامەكەشی لە %٩٣ی دەنگی كورد بوو بۆ سەربەخۆیی، واتا سەركەوت و ئەو بەڵگەنامەیە بە دەستهات كە كورد چی دەوێت و ئامانجی كۆتایی چییە، راستە كاردانەوە و سزاكان هەندێك ئەستەم بوون، بەڵام بەخۆڕاگری سەركردایەتی سیاسی كورد دۆخەكە ئاسایی بووەوە و هەرێمی كوردستان بووژانەوەی سیاسی و دیپلۆماسی پایتەختی هەرێمی كوردستانی گەرم كردەووە، بینیمان ئەوانەی دژی ریفراندۆمیش وەستانەوە و هاوپەیمانییەتی حەشدی شەعبیانكرد خۆیان و حزبەكەیان لە نێو سەرگەردانی سیاسیدان، ئێستاشی لەگەڵدا بێت بوون بە حزبی بێ پڕۆژە، حزبی پەرتەوازە كە رۆژبەڕۆژ بێ جەماوەرتر دەبن.
زیندوو هێشتنەوەی ریفراندۆم
پێداگری سەركردایەتی سیاسی باڵای هەرێمی كوردستان لە سەر یادكردنەوەی شەشەمین ساڵیادی ریفراندۆمی سەربەخۆیی و هەروەها هاتنە سەرشەقامی هاووڵاتییانی هەرێمی كوردستان لە پایتەخت، دەری دەخات كە سەركردایەتی و هاووڵاتییانی كوردستان سەرباری فشارەكانی حكومەتی عێراق و پەیڕەوكردنی سیاسەتی برسیكردن، مكوڕن لەسەر گەیاندنی هەرێمی كوردستان بەرە و سەربەخۆیی.
