ئەنجامدانی ڕیفراندۆم، بڕیارێكی بوێرانە و بێ وێنە بوو لە مێژوویی بزاڤی ڕزگاریخوازی كوردستاندا
زاری كرمانجی-سۆران :
ئەمڕۆ 25 ی ئەیلوول، شەش ساڵ تێپەڕ دەبێت بەسەر ئەنجامدانی ڕیفراندۆمی سەربەخۆیی كوردستان، ئەو ڕۆژە مێژوویی 92.73٪ ی خەڵك لە هەرێمی كوردستان بەڵێ یان بۆ سەربەخۆیی و دروستبوونی دەوڵەتی كوردستان كردو نیشانی هەموو جیهانی دا كە نەتەوەیەكی 60 ملیۆن كەسی، ناكرێت لەوە زیاتر لە سەر خاك و نیشتمانی خۆی دا خاوەن دەوڵەت نەبێت. گەنجانی ئیدارەی سۆران ڕیفراندۆم بە وەرچەرخانێكی گەورە و بێ وێنە ناوی دەبەن و پێیان وایە سەركردایەتی سیاسی كورد بە ڕێبەرایەتی سەرۆك بارزانی لەو كاتەدا باشترین بڕیاریان دا لە مێژووی بزاڤی ڕزگاریخوازی كوردستاندا، بڕیارێك كە هیچی كەمتر نەبوو لەو شۆڕشانەی دەیان ساڵ بەردەوامیان هەبوو. گەنجێك دەڵێ ڕیفراندۆم دڵی داگیركەران و دوژمنانی كوردی لەرزاند، یەكێكی تر دەڵێ ڕیفراندۆم باهۆزێك بوو، خەون و ئامانجی داگیركەرانی كوردستانی لەنێو برد. گەنجێكی تر دەڵێ ئامانجی بەشێكی زۆری شۆڕشەكانی كورد، لە پێناو سەربەخۆیی و دروستبوونی دەوڵەتی كوردستان بوو، سەرۆك بارزانی بەو هەنگاوە ڕۆحی بە بەر تەواوی شۆڕشەكان كردەوە و جارێكی تر بە دوژمنانی گوت ئێمە نەتەوەیەكی ئازاد و سەربەخۆییخوازین و لەوە زیاتر ژێردەستەیی قبووڵ ناكەین لە سەر خاك و نیشتمانی خۆمان.
“ڕەوا نییە نەتەوەیەكی 60 ملیۆن كەسی لە ڕۆژهەڵاتی ناوەڕاست، تا ئێستا بێ دەوڵەت بێت”
كاوە قادر،ڕیفراندۆم بە بڕیارێكی بوێرانە و مێژوویی گەلی كوردستان ناو دەبات و دەڵێ : “بە درێژایی مێژووی كورد و خەبات و شۆڕشەكانی، هیچ كامەیان وەكوو سەرۆك بارزانی ڕاشكاوانە و بوێرانە كاری بۆ سەربەخۆیی و دروستبوونی دەوڵەتی كوردستان نەكردووە، بۆیە زۆر شانازی دەكەم یەكێك بووم لەوانەی دەنگم بۆ سەربەخۆیی و دروستبوونی دەوڵەتی كوردستان بوو،”
كاوە باس لەوەش دەكات گەر چەندین جاری تریش ڕیفراندۆم بكرێتەوە، (بەڵێ) كەی دەبێتە گوللەیەك بۆ سەر سینگی داگیركەران و دوژمنانی كورد و كوردستان و دەڵێ : “سەربەخۆیی و دروستبوونی دەوڵەتی كوردستان، ئەرك و مافە، ڕەوا نییە نەتەوەیەكی 60 ملیۆن كەسی و كاریگەر لە ڕۆژهەڵاتی ناوەڕاست، تا ئێستا لەسەر خاكی خۆی سەربەخۆ نەبێت و دەوڵەتی نەبێت، دوژمنان و داگیركەران چەندین دەوڵەتیان لە سەر خاك و نیشتمانی ئێمە دروست كردووە، ئیدی كاتی ئەوە هاتووە ماف بۆ خاوەنەكەی بگەڕێتەوە و نەتەوەی ڕەسەنی ئەو خاكەش دەوڵەتی خۆی ئاوا بكات.”
” تاپۆ ڕەشەكە لە گیرفانی هەموو كوردێكی بەشەرەف دایە، ئەمڕۆ بێت یان سبەی بناخەی دەوڵەت ئاوا دەكەن “
سامی حەسەن ئەنجامدانی ڕیفراندۆم بە باهۆزێكی بەهێز ناو دەبات بەرەو ڕووی داگیركەرانی كوردستان و پێی وایە كاریگەری ئەو باهۆزە بە قەد كاریگەری شۆڕشی چەكداری 100 ساڵی ڕابردوو بوو و دەڵێ : “ئەنجامدانی ڕیفراندۆم بە سەرۆكایەتی سەرۆك بارزانی، ڕۆحی بە بەر شۆڕشەكانی ڕابردووی كوردستان كردەوە و جارێكی تر بانگی سەربەخۆیی و ئازادی بە گوێی داگیركەران و دوژمنانی كورد چرپاند، كە سەربەخۆیی و دروستبوونی دەوڵەتی كوردستان ئەرك و مافە و پێویستە كوردیش وەكوو گەلانی ناوچەكە لەسەر خاك و نیشتمانی خۆی دەوڵەتی هەبێت،”
سامی لە ساڵڕۆژی ئەنجامدانی ڕیفراندۆم دا دەڵێ: “تاپۆ ڕەشەكە لە گیرفانی هەموو كوردێكی بەشەرەف دایە لە سەرتاسەری كوردستانی مەزن، ئەمڕۆ بێت یا سبەی ئەو تاپۆیانە بناخەی دەوڵەت ئاوا دەكەن و دەوڵەتی كوردستانیش لە نەخشەی ڕۆژهەڵاتی ناوین بە فەرمی زیاد دەبێت.”
“چەندە بە ئازارە، هاونیشتمانییەك بە زمانی كوردی پێت بڵێ سەربەخۆیی و دروستبوونی دەوڵەتی كوردستان لە گۆڕ نرا”
ئومێد حەسەن سەرەڕای ئەوەی ئەنجامدانی ڕیفراندۆم بە جەژنێكی نەتەوەیی ناو دەبات، لە هەمان كات نیگەرانیشە لەو كەسانەی قسە لەسەر ئاوابوونی خۆری سەربەخۆیی و دروستبوونی دەوڵەتی كوردستان دەكەن و دەڵێ: “چ لەوە بە ئازار تر نییە كەسانێك هەبن كە هاونیشتمانی خۆت بن، ڕۆڵی دوژمنێك بگێڕیت و بە زمانی كوردی پێت بڵێ سەربەخۆیی و دروستبوونی دەوڵەتی كوردستان لە گۆڕ نرا، من بۆ ئەوان زۆر قسەم هەیە، بەڵام تەنیا ئەوە دەڵێم سەربەخۆیی و دروستبوونی دەوڵەتی كوردستان، نە خەونە و نە مردووشە، ئەوە مافە و لەگەڵ خوێنی هەر كوردێكی بەشەرەف تێكەڵ بووە، ئەمڕۆ بێ یان سبەی خۆری سەربەخۆیی كوردستان هەڵدێ و چاوی شەمشەمەكوێرەكان بە تەواوی كوێر دەكات.”
ئومێد ئەوەش دەڵێ : “سەربەخۆیی ڕەنگدانەوەی بەسەر تەواوی شۆڕش و خەباتی كورددا هەبووە و كاری بۆ كراوە، بەڵام بەهەر هۆكارێك بێت، باس نەكراوە و ڕانەگەیندراوە، ئیدی سەرۆك بارزانی بەو هەنگاوە ڕۆحی بە بەر تەواوی شۆڕشەكان كردەوە و جارێكی تر بە دوژمنانی وت ئێمە نەتەوەیەكی ئازاد و سەربەخۆییخوازین و لەوە زیاتر ژێر دەستەیی قبووڵ ناكەین لە سەر خاك و نیشتمانی خۆمان، پێویستە ئێمەش دەوڵەتی خۆمان هەبێت وەكوو تەواوی ئەو نەتەوانەی لە ڕۆژهەڵاتی ناوەڕاست دەژن.”
” سەرۆك بارزانی، ڕابەر و پێشمەرگەی نەتەوەیەكی ستەملێكراو و داگیركراوە، بۆیە بە ئەركی مێژوویی پێشمەرگایەتی خۆی هەستاو ڕیفراندۆمی كرد”
سازگار حەمەدەمین پێی وایە زیاتر لە سەدەیەكە كورد لەم پێناوەدا تێ دەكۆشێت و خەبات دەكات كە ببێتە خاوەن دەوڵەتی خۆی، بۆیە ڕیفراندۆم بە كەرنەڤاڵێكی گەورەی نەتەوەیی پڕ لە شانازی ناو دەبات و دەڵێ: “ڕیفراندۆمی سەربەخۆیی كوردستان، بڕیارێك بوو بە سەركردایەتی سەرۆك بارزانی و بە بەشداری بەشی زۆری پارتە سیاسییەكانی هەرێمی كوردستان درا، ئەو بڕیارە دەبێت ببێتە جێگەی شانازی هەموو كوردێك، چونكە تاكە بڕیاری نەتەوەیی بوو كە تەواوی كوردەكانی هەر چوار بەشی كوردستان لە ژێر چەتری ڕیفراندۆم كۆ كردەوە و پشتگیریی و هاوهەڵوێستی و هاوتەبایی دروست كرد لە نێو كوردان، ئیدی لەوە شانازی تر دەبێ چی بێت ؟”
سازگار، ڕیفراندۆم بە باشترین پەیام دەبینێت بۆ داگیركەران و دوژمنانی كورد، كە هەمیشە قسەیان لەسەر ئەوە بوو كە كورد بێ ڕۆح و گیان بووە و ناتوانێت باس لە ماف و ئازادییەكانی بكات : “ڕیفراندۆمی سەربەخۆیی سەركەوتنێكی بێ وێنە بوو لە مێژووی گەلەكەماندا و مەسیجێكیش بوو بۆ دوژمنان و داگیركەرانی كوردستان، كە پێیان وا بوو ئیدی كورد كۆتایی پێ هاتووە و بێ ڕۆح و گیان بووە، بە ئەنجامدانی ڕیفراندۆم لەوە گەیشتن ئەوەی ئەوان بیریان لێ دەكردەوە هەڵەبوون، كورد بە هێز تر بووە لە جاران و بە زیندوویەتی ماوەتەوە، هەر لە بەر ئەوە تووشی شۆك بوون،”
سازگار لەبارەی سەرۆك بارزانی كە بڕیاردەری ئەنجامدانی ڕیفراندۆم بوو وا قسە دەكات و دەڵێ: “سەرۆك بارزانی وەك پێشمەرگەیەك هەموو ژیانی خۆی لەپێناو سەربەخۆیی كوردستان تەرخان كردووە، ئەو ڕابەری نەتەوەیەكی ستەملێكراو و ژێر دەستەی زوڵم و ستەم و داگیركەری بووە، بۆیە ئەو كاتەی هەستی بە پیلانی داگیركەران و نەیارانی دۆزی ڕەوای گەلەكەی كرد، بە ئەركی مێژوویی پێشمەرگایەتی خۆی هەستا و، بە هاوبەشی لەگەڵ زۆرینەی پارتە كوردستانییەكان بڕیاری ڕیفراندۆمیان لە 25ی ئەیلوولی 2017 دا.”
“خۆری سەربەخۆیی كوردستان هەر چوار پارچەی نیشتمان ڕووناك دەكاتەوە”
گەنجانی ئیدارەی سۆران كۆكن لەسەر ئەوەی كە ئەنجامدانی ڕیفراندۆم وەك پرسێكی نەتەوەیی بۆ دیاریكردن و بڕیاردان لە ماف و چارەنووسی میللەتێك گرنگی خۆی هەبووە و ئەم پرسە بەستراوەتەوە بە بۆچوون و ئینتیمای تاك بە تاكی كۆمەڵگەی كوردی و تا ئێستا لە نێو هزر و ڕۆحیان لە گەشەكردن دایە و ڕۆژێك دێت خۆری سەربەخۆیی كوردستان هەر چوار پارچەی نیشتمان ڕووناك بكاتەوە .
