خەرمان هیرانی: لەتاریك و روونی یەكەم رۆژی مێژووەوە شانۆ لەگەڵ مرۆڤدا لەدایكبوو

محەمەد ئامۆكەیی- زاری كرمانجی:
بۆ چەند ساڵێك دەبێت شانۆ و دراما بەشێكی دانەبڕوای ژیانی ئەو بووە، سەرەڕای دوورە وڵاتی هێشتا بەردەوامی بە خەباتی هونەرەكەی دەدات، خەرمان هیرانی، ژنێك لە لووتكەی خۆڕاگری و سەركەوتن بەسەر بەربەستەكان، لەبارەی هونەر و شانۆ بۆ زاری كرمانجی دەڵێت” شانۆ لای من لەسەرەتادا وشە بوو، دەڵێم لەسەرەتادا شانۆ بوو دەكرێ وشەش بووبێت، بەڵام بێگومان لەتاریك و روونی یەكەم رۆژی مێژووەوە شانۆ لەگەڵ مرۆڤدا لەدایكبوو، لەگەڵیدا دەژی و شانۆیەكی تراژیدیش لەگەڵ مردنی خۆی نمایش دەكات”.
لەبارەی رۆڵی ئافرەت لە كایەكانی ژیان و بواری هونەر خەرمان هیرانی، روونی دەكاتەوە” دراماو فیلم چیڕۆكەكانیان لەژیانی رۆژانە وەردەگیرێت بەخۆشی و ناخۆشیەوە، ژیانیش ژن و پیاو منداڵ دەگرێتەوە، هەر بۆیە ئەگەر ژنان لە ناو چیڕۆكی فیلم و دراماكان نەبن، كەواتە ناتەواوی هەیە، ژنان دەبێت هەبن بێگومان بەپێی چیڕۆكەكە ئێمەی ئافرەت دەوری كارایان هەیە لە كایە هونەرییەكان و دەوری سەرەكی دەبینن وەك پیاوان، ژنان لە پێش خستنی هونەر و كلتووری كوردی دەوری كارایان هەبووە و دەبێت، ژنان لە ناو هەموو بوارەكانی هونەر كار دەكەن و توانیویانە جێگای خۆیان بكەنەوە نموونەمان زۆرە، هونەری درامای تەلەفزیۆنی و فیلم بێ بوونی ژن كەم كورتی دەبێت نابێت، ژنان هەمیشە پێشەنگ بوون لە بەرەو پێش خستنی وڵات لەهەموو رەهەندەكان و لەگەلیشیاندا هونەر، بۆیە بێ رۆڵی ژنان كلتوور و هونەری كوردی ناتوانێت هەنگاوی جدی بنێت”.
لەدوا پەیڤەكانی دا خانمە شانۆكار خەرمان هیرانی، داوایەك ئاراستەی حكوومەتی هەرێمی كوردستان دەكات رایگەیاند” هیوادارم كە لایەنی پەیوەندی دار زیاتر گرنگی بەگەنجان بدەن بۆ ئەوەی زەمینە لەبار بێت بۆ خۆ دۆزینەوەیان لەهەموو بوارەكانی ژیان، زۆر بەڕوونی دیارە كە گرنگی بە هونەرو شانۆ و دراما لە ئێستادا زۆر پشت گوێ خراون بەهیوام ئاوڕێكی جدیان لێ بدرێتەوە گرنگی زۆر بدرێت بەهونەر و هونەرمەندان.