زاری كرمانجی- سۆران:
سەرۆك وەزیرانی عێراق ئەو پارەیەی كە ناردوومانە بۆ هەرێمی كوردستان تاوەكو كۆتایی ئەمساڵ بەردەوام دەبێت و پێش كۆتایی ساڵ ڕێككەوتنی دارایی دەكەین.
محەممەد شیاع سوودانی، سەرۆكوەزیرانی عێراق لە چوارچێوەی كۆمەڵەی گشتیی نەتەوەیەكگرتووەكان بەشداری لە سیمینارێك كرد كە لەلایەن هەردوو دامەزراوەی ئەلمۆنیتەر و سێمافۆری ئەمریكییەوە بەڕێوەبرا، هەروەها ژمارەیەك دەزگای ڕاگەیاندن و كۆمەڵێك توێژەر تێیدا ئامادە بوون و باسی بابەتی جیاوازی سیاسی و ئابووریی تایبەت بە عێراق كرا.
محەممەد شیاع سوودانی، لە سیمینارەكەدا ڕایگەیاند: هێزە سیاسییەكان لە هەرێمی كوردستان بەشێكی سەرەكین لە هاوپەیمانی بەڕێوەبردنی دەوڵەت كە حكوومەتی پێكهێنا.
گوتیشی: ڕێككەوتنێكی سیاسی لەسەر بنەماكانی گشتی هەیە، ئەنجوومەنی نوێنەران دەنگی لەسەر دا و حكومەت لەخۆی گرتووە بۆ جێبەجێكردنی ئەو بەڵێنانە.
سەبارەت بە كێشە داراییەكانی هەرێمی كوردستان سوودانی باسی لەوە كرد، دارایی هەرێمی كوردستان لە بودجە پەیوەستە بە كێشە داراییەكانی پێشووە كە ڕووبەڕووی هەرێمی كوردستان بووەتەوە، پاش ڕاگرتنی هەناردەكردنی نەوت لەڕێگەی بەندەری جیهانی توركیاوە سەری هەڵدا و بەهۆی سنوورداركردن و سەختی یاسای بودجەی ساڵی 2023.”
بە سەرۆكایەتیی مەسرور بارزانی سەرۆكی حكوومەتی هەرێمی كوردستان لە ڕێككەوتی 14ـی 09ـی 2023 شاندی باڵای حكوومەتی هەرێمی كوردستان چووە بەغدا و بۆ تاوتوێكردنی پرسی مووچە و شایستەداراییەكانی هەرێمی كوردستان، سەرۆكوەزیرانی عێراق لەمبارەیەوە دەڵێت: دوای سەردانەكەی شاندی هەرێمی كوردستان بۆ بەغدا چارەسەرمان دۆزییەوە، بە بوونی تێگەیشتن و گفتوگۆ و پەسندكردنی پابەندبوونە یاساییەكان چارەسەری هەموو كێشەكان دەدۆزینەوە.
سەرۆكوەزیرانی عێراق هەروەها ئاماژەی بە بەردەوامبوونی گفتوگۆكانیان لەگەڵ هەرێمی كوردستان دا و گوتی: ئەو پارەیەی كە ناردوومانە تاوەكو كۆتایی ئەمساڵ بەردەوام دەبێت و پێش كۆتایی ساڵ ڕێككەوتنی دارایی دەكەین، هەروەها گفتوگۆكان لەسەر مافەكانی دیكە بەردەوامن، لەوانە گفتوگۆكردن لەسەر پڕۆژەیاسای نەوت و گاز.
