د. ئازا – زاری كرمانجی:
فواد عومەر ناوبژیوانی پلە یەكی هەرێمی كوردستان و عێراق، زیاتر لە 17 ساڵە بەردەوامە لە كاری ناوبژیوانی لە تیپە میللیەكان و خولە وەرزشییەكان، لە ساڵی 2021 بە فەرمی لە لایەن یەكێتی تۆپی پێ كوردستان دەبێت بە سەرپەرشتیاری خولەكانی كوردستان.
فواد عومەر، بۆ زاری كرمانجی دەڵێت: لە ئێستادا سەرپەرشتیارم لە خولە وەرزشییەكانی كوردستان، بەڵام هەركات حەزی ناوبژیوانیم هەبێت ئەوا ڕاستەوخۆ فیكە هەڵدەگرم و دەچمەوە نێو گۆرەپانی سەوزكاری ناوبژیوانی دەكەم.
ئەو ناوبژیوانە باس لەوە دەكات كە لە سنووری ئیدارەی سۆران وەرزشوانی زۆر باش و سەركەوتوو هەیە، بەڵام ئەوەی جێگەی نیگەرانیە لایەنی پەیوەندیدار گرینگی زۆر بە وەرزش نادات، هەرچەند ئەوەی جێگەی خۆشحاڵییە لەو چەند ساڵەی دوایی لەسەر دەستی چەند لاوێكی بەئەزموون لێژنەی تیپە میللیەكانی سۆران دروستكراوە توانیویانە تا ڕادەیەكی باش بەرەو قۆناغێكی تر هەنگاو بنێن بەتایبەت لە یاری تۆپی پێ، بەڵام لەگەڵ ئەمەش پێویستە هەموو وەرزشوانان یەك دەست بن و لە لایەن بەرپرسانی حكومی و حیزبی پشتگیری بكرێن.
كاپتن فواد، دەشڵێت: بەداخەوە تا ئێستا نەدامەزراوە وەرزشیەكان نە خودی ناوبژیوانانیش گرنگیان بەخۆیان نەداوە بۆ بەرەوپێش چوونی ئاستی ناوبژیوانیان، بۆیە بە بۆچوونی من ئەگەر وەرزشوانێك دەیەوێت ببێت بە ناوبژیوانێكی سەركەوتوو، پێویستە هەفتانە دوو ڕۆژ ڕاهێنانی تیۆری و پڕاكتیكی بكات و بەردەوام بێت لەسەر مەشقەكانی، بەڵام ناكرێت وەك یاریزان یاری بۆ تیپەكان ئەنجام بدات گرینگە كە تەنها كاری ناوبژیوانی بكات، بێگومان دوای ماوەیەك بە دڵنیایی دەبێت بە ناوبژیوانێكی چاك و دەتوانێت بەشداری خولی نێوخۆیی و نێودەوڵەتی بكات، هاوكات لەگەڵ ئەوەش دەبێت لە یادمان بێت كە كاری ناوبژیوانی كارێكی زۆر قورسە لەوانەیە ئەمەش هۆكارێك بێت لە كەمی ژمارەی ناوبژیوان، ئەوەی جێگەی داخە تائێستا لە ئیدارەی سەربەخۆی سۆران لێژنەی ناوبژیوانان وەك پێویست نیە لە یاری تۆپی پێ و یارییەكانی تر، ئەوەی كە تێبینیم كردووە ئەوانەی لە سنوری ئیدارەی سۆران كاری ناوبژیوانی دەكەن لە تیپە میللیەكانیش یاریزانن، ناوبژیوان هەیە لە تیپێك یاری دەكات لە تیپێك ڕاهێنەرە و ڕۆژی دواتر ناوبژیوانی دوو تیپی تر دەكات ئەمەش هەرگیز ناتوانن ئاستی ناوبژیوانی خۆیان بەرەو پێش ببەن و ببن بە ئەندام لە لێژنەی ناوبژیوانان لە یەكێتی تۆپی پێی كوردستان.
كاپتن فواد، وتیشی من لە ئێستادا دانیشتووی شاری سۆرانم بۆیە دەتوانم لە داهاتوو یارمەتی چەند وەرزشوانێك لە كور و كچ بدەم كە هەفتانە مەشق و ڕاهێنانیان پێ بدەم و هەوڵ بدەم لە خولەكانی كوردستان و عێراق بەژداری بكەن و بروانامە بەدەست بێنن و ببن بەناوبژیوانی فەرمی، چونكە تا ئێستا لە سنوری ئیدارەی سەربەخۆی سۆران ژمارەیەكی كەم لە ناوبژیوان هەیە كە لە خولەكانی كوردستان و عێراق كاری ناوبژیوانی بكات، بەڕاستی ئەمە خاڵێكی نەرێنیە، بۆیە دەكرێت هەموومان پێكەوە كار لەسەر ئەوە بكەین هاوكار و یارمەتیدەری ناوبژیوانەكان بین.
ئەو ناوبژیوانە لە رابردوو چەندین خولی ناوبژیوانی كردووەتەوە لە سنوری ئیدارەی سۆران لە شوێنەكانی سۆران ، سیدەكان، ڕواندز و خەلیفان كە ئەمە بوو بە دەرفەت چەندین ناوبژیوان بێتە پێشەوە، بەڵام دوای ئەوەی كە گرینگی زۆریان پێ نەدرا و خۆشیان بەشێك بوون لە كەمتەرخەمی، ئیتر كاری ناوبژیوانی بەرەو نزمی ڕۆیشت لەم دەڤەرە.
كاپتن فواد، گوتی: دڵنیام لە داهاتووێكی نزیك چەندین ناوبژیوان لە سنووری ئیدارەی سەربەخۆی سۆران دروست دەبن و توانای بەڕێوەبردنی یارییەكانیان هەیە لە خولە وەرزشیەكان لە ئاستی هەرێمی كوردستان و عێڕاق و گەشبینم و بە ئومێدەوە سەیری وەرزش دەكەم لەم سنوورە و هەوڵی خۆم دەخەمە گەڕ و پێموایە لە داهاتوو كاری ناوبژیوانی بەرەو ئاراستەیەكی زیندوو دەڕوات و ناوبژیوان زۆر باش دروست دەبێت.
لەكۆتایی دا زۆر سوپاسی دەزگای زاری كرمانجی دەكەم كە هەمیشە خەمخۆری وەرزش و وەرزشوانانە، من هەموو جار دەڵێم كەسانی وەك ئێوە سەربازی وونن دەجەنگن لەپێناو سەركەوتن و پێشكەوتنی شارەكەمان، سەرفراز بن.
