ئەڤین بارزانی
مەسرور بارزانی سەروكێ حكوومەتا هەرێما كوردستانێ د گەل شاندەكێ بلند سەرەدانا بەغدا كرن و ل گەل بەرپرسێن حكومەتێ و ئالیێن سیاسی یێن عێراقێ كۆمبوون ئەنجامدان و پشتی كۆمبوونان ڕاگەهاند دێ هەڤدیتنێن وان ئەنجامێن خوە یێن باش هەبن.
بەری مەسرور بارزانی سەرەدانا بەغدا بكەت ل ئالیەكێ ئەمریكا و ل ئالیێ دی ئەمریكا ل سەر خەت بوون، بێگومان ئیران ژ بەر پارتێن ڕۆژهەلاتێ كوردستانێ داخواز ژ هەرێما كوردستانێ كربوو هاریكار بن و پشتی هندەك ژ هێزێن ڕۆژهەلاتێ كوردستانێ ژ دەڤەرێن سنۆرێ خوە ڤەكێشان ئیرانێ ژی داخواز ژ بەغدا كر هەلوەستێ خوە نەرم بكەت، ئەو یەك د سەرەدانا باڵیۆزێ ئیرانێ بۆ هەولێرێ و دیدارێن وی ل گەل سەروكێ هەرێما كوردستانێ و سەرۆكێ حكوومەتێ دا دیار بوون و خالا دی یا هەری گرنگ ژی نها سودانی دڤێت سەرەدانا ئەمریكا بكەت و ل گەل سەروكێ ئەمریكا كۆمبیت، لێ بەری سەرەدانا سودانی ئەمریكا ژ هەلوەستێ خراب یێ بەغدا ل هەمبەر هەرێما كوردستانێ یا دلگران بوو و هۆشداری ژی دابوو كو نابیت بابەتێ مووچێن فەرمانبەرێن هەرێما كوردستانێ وەك كارتەكا سیاسی ل دژی وان بهێتە بكارئینان.
ل ئالیێ دن هەم سەروكێ هەرێما كوردستانێ و هەم ژی سەروكێ حكومەتێ شیان ب ڕێیا پەیوەندیێن خوە یێن تایبەت د ئاستێ هەرێمی و نێڤدەولەتی دا فشارێن زێدە ل سەر بەغدا دروست بكەن و د ئەنجاما وان فشاران دا هەلوەستێ هێزێن شیعە ل هەمبەر هەرێما كوردستانێ ب ڕەنگەكێ باش هاتە گوهۆڕین و هەم سودانی و هەم ژی سەركردێن هێزێن كاریگەر یێن شیعە پێشوازیەكا باش ژ مەسرور بارزانی و شاندێ د گەل دا كرن و سۆز دان بابەتێن گرێدای مووچێ فەرمانبەران و بودجەی چارەسەر بكەن.
خالا دن یا گرنگا ڤێ سەرەدانا ئێكگرتنا هەمی فراكسیۆنێن كوردی ل بەغدا بوو، ئەو یەك جهێ دلخوەشیا هەموو وەڵاتییان بوو، بێگومان ڤێجارێ كوردان دوو كارتێن بهێز ل دژی بەغدا بكار ئینان و دهێتە چاڤەڕێكرن ئەنجامێن خوە یێن باش ژی هەبن، ئێك كارتیا ئێكگرتنێ بوو و یا دویێ ژی كارتا نێڤدەولەتی بوو و ژ بەر هندێ ژی هەلوەستێ هێزێن شیعە ل هەمبەر هەرێما كوردستانێ هاتە گوهۆڕین و ب ڕەنگەكێ باش پێشوازی ل داخوازیێن رەوا یێن هەرێما كوردستانێ هاتە كرن.
ئەزموونا چەند ڕوژێن بۆری ل بەغدا جارەكا دن سەلماند كورد د ناڤ خوە دا ئێكگرتی بن هەم دێ وەڵاتێن جیهانێ پشتەڤانیێ ل داخوازیێن كوردان كەن و هەم ژی بەرپرسێن بەغدا نەشێن ل هەمبەر داخوازیێن خەلكێ هەرێما كوردستانێ بێدەنگ بمینن، هەكە هێزێن كوردی هەردەم ئێكگرتی بن دێ شێن بەرەڤانیێ ل مافێن رەوا یێن وەلاتیێن هەرێما كوردستانێ بكەن، ئانكۆ دەمێ دبێژن ماف ناهێتە دان بەلكی دهێتە ستاندن ڕاستیەك د جهێ خوە دایە.
