مەسروور بارزانی سەرۆكی حكوومەتی هەرێمی كوردستان، ئەمڕۆ لە كاتی لێدانی زەنگی دەستپێكی ساڵی نوێی خوێندن وێڕای دەستخۆشی لە مامۆستایان، لەسەر بارودۆخی ئێستای كوردستانیش دواو و گووتی ” پشوودرێژیمان نیشانەی لاوازیمان نییە” هەروەها گووتی” بۆ چارەسەری كێشە و گرفتەكان سەردانی بەغدا دەكەین و لەگەڵ لایەنە سیاسییەكانی عێراق كۆ دەبینەوە”.
ئەمڕۆ 13-9-2023، مەسروور بارزانی سەرۆكی حكوومەتی هەرێمی كوردستان، لە رێوڕەسمی لێدانی یەكەم زەنگی ساڵی نوێی خوێندنی ئەمساڵ رایگەیاند:” بە تەماین سەردانی بەغدا بكەین، بۆ ئەوەی بەشێوەیەكی ئاشتییانە هەوڵی چارەسەركردنی كێشە و گرفتەكانمان بدەین، پشوودرێژیی ئێمە مانای لاوازیی هەرێمی كوردستان نییە، بەڵكو خەمخۆری ئێمەیە بۆ ئەوەی نەهێڵین كێشە و گرفتەكان بە ئاقارێكی تردا ببرێن، دەمانەوێت بەشێوەیەكی ئاشتییانە كێشەكانمان چارەسەر بكەین و هەموو شایستە داراییەكانی خەڵكی كوردستان و مافە دەستوورییەكانی خەڵكی كوردستان دەستەبەر بكەین”.
سەرۆكی حكومەتی هەرێم زیاتر گووتی :” دەمانەوێت لەو سەردانەی لە بەغدا سەردانی لایەنە سیاسییەكان بكەین، بۆ ئەوەی بزانین بۆچی وەڵامی چاكەی خەڵكی كوردستان بەوشێوەیە دەدرێتەوە، كاتێك كە خەڵكی كوردستان باوەشیان بۆ هەموو خەڵكی عێراق كردەوە، چاومان لەوەیە ئێستە هەموو خەڵكی عێراقیش بەرگری لە ماف و شایستەكانی خەڵكی كوردستان بكەن. دەمانەوێت بزانین لەبەرچی سیاسەتی برسیكردنی خەڵكی كوردستان دەگرنەبەر، ئێمە پێمان وایە سەركەوتنی هەرێمی كوردستان سەركەوتنی هەموو عێراقە، بووژانەوەی ئابووری هەرێمی كوردستان بووژانەوەی ئابووری هەموو عێراقە”.
مەسرور بارزانی زیاتر دواو گووتی :” پێشتر لە سەردانەكانیاندا بۆ بەغدا زۆر رێككەوتنی باشیان لەگەڵ سەرۆك وەزیران ئەنجام دا، پێیان وابووە ئەو رێككەوتنانە دەبنە هۆكارێك بۆ سەقامگیری زیاتری عێراق و پێشخستنی وڵات، بەڵام بەداخەوە رێگرییان لێ كرا و نەیانهێشت رێككەوتنەكانی ئێمە لەگەڵ سەرۆك وەزیران بكەونە بواری جێبەجێكردن، بەڵام ئێمە داكۆكی لەسەر ئەوە دەكەینەوە كە جارێكی تریش رێی چارەسەر بدۆزینەوە، بۆیە لە سەردانەكەماندا بۆ بەغدا هەموو هەوڵێك دەدەین بەشێوەیەكی ئاشتییانە چارەسەری كێشە و گرفتەكان بكەین”.
