” یەك بارم فڕێ دایە نێو رووباری گەڵی”
” 14 رۆژە بارێكم پێ ساخ نەبۆتەوە و نیوەی پارەی خۆ ناكاتەوە”
” لە بەیانییەوە 4 سەندوق تەماتەم فرۆشتووە “
” پۆلیسی هاتووچۆ و شارەوانیش كێشەمان بۆ دروست دەكەن”
“14 رۆژە بارم لە هەولێر هێناوە هێشتا پێم نەفرۆشراوە” ئەمە دەسپێكی قسەكانی هاووڵاتی داینار قادر بوو، كە لە سەر رێگەی دەروازەی گەڵی لە قەزای ناوەندی سۆران، پیكابیكی راگرتووە و میوە و سەوزەواتی لەسەر دەفرۆشێت، ئەو دەرچووی بەشی كارگێری و كارە پەیمانگا، خاوەن خێزانە و جگە لەم كارە هیچ كارێكی دیكەی نییە، دانیار بۆ زاری كرمانجی گووتی “هەموو ئەو شتانەی هێناومن خۆماڵین، بەڵام بازاڕ نییە و زۆرجار شتەكانم خراپ دەبن و ناچارم فرێیان بدەم”.
ئەو هاووڵاتییە بۆ سەلماندنی راستی قسەكانیدا ئاماژەی بە شووتییەكانی ناو پێكا كرد و گووتی ” ئەم شووتیانەم بە 500 دینار لەسەرن، ئێستا ناچارم بە 400 دینار بیانفرۆشم، تا زیاتر زیان نەكەم و هەر نەبێ تۆزێك پارەم دەسبكەوێتەوە “.
ئەبوبەكر كوڕە گەنجێكی دیكەیە و ئەویش پیكابێكی راگرتووە كە پەتاتە و پیاز و تەماتەی لەسەر دەفرۆشێت، خەریكی جیاكردنەوەی پەتاتە رزیوەكان بوو تا پەتاتەكانی دیكەش نەرزێنێت، گووتی ” بازار زۆر كزە، لە كاتژمێر 7ی بەیانییەوە لێرە وەستاوم تا ئێستا چەند سەندوقە تەماتەم فرۆشتووە، ئەگەر وا بێ بازاڕی بێت زیانێكی زۆر دەكەم”.
ئەم دوو هاووڵاتییە نموونەی دەیان كەسی دیكەن كە بۆ پەیدا كردنی بژێوی رۆژانەیان لە هەولێر باری میوە و سەوزەوات دەهێنن و لەسەر پێكاب لە رۆخ رێگا سەرەكییەكان دەیفرۆشن، زۆرینەیان كێشەیان وەك یەكە و بێ بازاڕی تەنگی پێ هەڵچنیوون، سەرباری ئەمەش وەك هاووڵاتی عەبدوڵڕەحمان محەمەد، ئاماژەی پێكرد، جار جار لە لایەن پۆلیسی هاتووچۆ یا شارەوانییەوە رێگریان لێ دەكرێت، ئەم هاووڵاتییە كە تەمەنی 50 ساڵە و خاوەنی 13 منداڵ گووتی ” جاری واهەیە ئەو بارەی لە هەولێر دەیهێنین سوودی دەبێت، بەڵام جاری واش هەیە ئەوەندە زیان دەكەن كە سوودی چەند رۆژی پێشتریش دەكاتە زیان” ئەو نموونەی هێنایە و گووتی ” هەفتەی رابردوو بارێك تەماتەم هێنا، زیانی 60 هەزار دینارم لێكرد، جارێكیش بارەكەم هەمووی رزی لەبەر ئەوەی نەفرۆشرا بۆیە لە ناچاری هەموویم فڕیدایە نێو رووباری گەڵی”.
ئەم بێ بازارییە برۆكی هەموو ئەو كاسبانەی گرتووە كە لەسەر رێگا سەرەكییەكان و لەسەر پیكاب كاری فرۆشتنی سەوزە و میوە دەكەن.
