ئیسماعیل ئیبراهیم
مەترسی دەرەكی لەسەر هەموو وڵاتێكی جیهاندا هەیە، زلهێزەكانی جیهان ساڵانە بودجەیەكی زەبەلاحیان بۆ رووبەڕووبوونەوەی مەترسییەكان تەرخانكردووە، زلهێزی وەك ئەمریكا، چین، روسیە، بریتانیا، ئەڵمانیا و هەموویان ساڵانە بڕی تەرخانكراوی بودجە بۆ رووبەڕووبوونەوەی هەڕەشەكان لەسەر وڵاتیان كە لە دەرەوە ئاراستە دەكرێن ئامادە كردووە.
لەهەموو بوارێكەوە چاودێری وردی ئاسایشی نیشتمانی دەكەن، ناردنی سیخوور، هێزی سەربازی، كۆمپانیای مەزن، رێكخراوەكان بە ناوی جیاجیا بۆ وڵاتانی دیكە، هەمووی بۆ پاراستنی بەرژەوەندی نیشتمانە.
كاتێ ئەو وڵاتانە بەمجۆرە مامەلە لەگەڵ دەستوەردانەكانی وڵاتانی دیكە بكەن، بەدڵنیاییەوە هەرێمی كوردستان دوژمنەكانی زۆر زیاتر و تۆكمەتر و بەهێزترن، بۆیە مەترسییەكانی سەر هەرێم زۆر زیاترن، لەم روانگەیەشەوە پێویستە هەرێمی كوردستان زیاتر لە هەموو دەوڵەتانی دیكە حەكیمانەتر و ژیرانتر سیاسەت بكات.
جیاوازییەكی زەق لە شێوازی دوور خستنەوەی هەڕەشەكان لە وڵاتان بە بەروارد كردن لەگەڵ هەرێم هەیە، ئەویش بریتییە لەوەی، هەر حزب و رێكخراوێك لە دەستڵات بێت و خاوەن ئۆپۆزسیۆنێكی بەهێزیش بێت، كاتێ بابەتەكە هاتە سەر ئاسایشی نەتەوەی و نیشتمانی هەموویان دەبنە یەك و رووبەڕووی هەموو ئەگەرێكی زیانبەخش دەبنەوە.
لەبەر ئەوەی بوونی هەر لایەنێكی سیاسی پەیوەستە بە مانەوە و بەهێزی شكۆی وڵاتێكی خاوەن هەیبەت، بۆیە هەموو لایەنەكان بە هەموو پێكهاتەی جیا و بیروباوەری سیاسی و ئایدۆلۆژی جیاوازەوە بەرگری لە پاراستنی ئاسایشی نیشتمانی و نەتەوەیی دەكەن. ئەمەش وادەكات هەر جۆرە مەترسی و هەڕەشەیەك بێكاریگەر بكات.
لەم سۆنگەیەوە ئەركە لەسەر هەموو لایەنە سیاسییەكان بۆ دوور خستنەوەی مەترسی و هەڕەشەكانی سەر كیانی سیاسی هەرێمی كوردستان، جا هەر جۆرە دیدگایەكی سیاسی یا ئایدۆلۆژیان هەبێت، بۆ دوورخستنەوەی مەترسییەكان ببنە خاوەن یەك گووتار و رێككەون، چونكە نەمانی ئەم كیانە تەنها زیان لە لایەنێكی دیاری كراو نادات، هەموو لایەنەكان پێكەوە دەسووتێن و هاووڵاتی سڤیل دەبێتە قوربانی.
ئەوەی ئێستا لە نێو لایەنە سیاسییەكانی كوردستان دەگوزەرێت، پێچەوانەی پاراستنی هەموو بەهاكانە.
پشتگیری كردنی ژمارەیەك كەسایەتی سیاسی، بەرپرس، پەرلەمانتار و لایەنی سیاسی جگە لە خزمەت گیاندن بە دووژمن هیچ سوودێكی دیكەی نابێت، نە بۆ كیانی هەرێمی كوردستان، نە بۆ نەتەوە، نە بۆ هیچ لایەنێكی سیاسی، واتە ئەم جۆرە لە تێڕوانین و سیاسەتكردنە، تەنها دەچێتە خانەی خیانەتی نیشتمانی و نەتەوەیی جا هەر كەسێك بیەوێت بە هێنانەوەی بیانوو شەرعەییەت بەم خیانەتە بدات، ئەویش بەشێك دەبێت لە خیانەت.
