زاری كرمانجی- سۆران:
بەگوێرەی یاسای بودجەی عێراق، شایستە داراییەكانی هەرێمی كوردستان، مانگانە زیاتر لە ترلیۆنێك و سێ سەد ملیار دینارە، بەڵام بەغدا ڕایگەیاندووە نیوە كەمتری ئەو بڕە دەنێرێت، ئەویش بە قەرز، داهاتی ناوخۆ مانگانە سێ سەد و بیست ملیار دینارە، ئەندامانی شاندەكە دەڵێن، ئەو بڕەشی بەغدا بە قەرز دەنێرێت، بەشی مووچە ناكات. سیپان شێروانی، ئەندامی پەرلەمانی عێراق، دەڵێت: دادگەی فیدراڵی لە جیاتی ئەوەی بە ئەركی خۆی هەستێت و داكۆكی لە قوت و مافە دەستوورییەكانی هەرێم بكات، لە ئێستەدا خەریكی ڕێگری كردنە لە گەڕانەی پارتی بۆ كەركووك.
یاسای بودجەی گشتیی عێراق بۆ ساڵەكانی 2023-2024-2025، لە 12ـی حوزەیران لە پەرلەمان پەسەندكرا، لە 26ـی هەمان مانگ لە ڕۆژنامەی وەقائیعی عێراقی بڵاوكرایەوە، پارەكەی بۆ هەر ساڵێك 198.9 ترلیۆن دینارە و پشكی هەرێمی كوردستان تێیدا زیاتر لە شازدە ترلیۆن دینارە، بەپێی یاسای بودجە، ئەو پارەیەی بۆ مووچەی فەرمانبەران، خانەنشینان و پێشمەرگە بۆ تەواوی ساڵی 2023 تەرخانكراوە، مانگانە نۆ سەد و شەش ملیار دینارە، بەڵام بەغدا لە دوای پەسەندكردنی یاساكە، تەنیا مووچەی مانگی حوزەیرانی ناردووە، ئەویش لە دوای چەند جارێك سەردانیكردنی شاندی هەرێمی كوردستان بۆ بەغدا.
سیپان شێروانی، ئەندامی پەرلەمانی عێراق، بۆ زاری كرمانجی گوتی: ئەو ڕێككەوتنەی لە نێوان هەولێر و بەغدا لەبارەی پشكی هەرێم لە بودجە كرا بوو، لایەنە شیعەكان بە هاوكاری یەكێتی لە پەرلەمان سەرلەبەری ڕێككەوتنەكەیان گۆڕی، سەرەرای گۆڕانكارییە نادەستووری و نایاسایەكانی بودجەی پەسەندكراو، حكوومەتی هەرێم ئەوەی لەسەریەتی وەك خۆی جێبەجێكردووە.
ئەو ئەندامەی پەرلەمانی عێراق، دەشڵێ: بەپێی بودجەی فەرزكراو دەبێت عێراق مانگانە زیاتر لە ترلیۆنێك و سێ سەد ملیار دینار بۆ هەرێم بنێرێت، بەڵام دوای تێپەربوونی سێ مانگ، بڕیاریان داوە تەنیا پێنج سەد ملیار دینار مانگانە بنێرن، ئەمە لە كاتێكدایە دۆلارێك بۆ خەرجی وەبەرهێنان دانەنراوە، دۆلارێك بۆ بەڕێوەبردنی حكوومەت و وەزارەتەكان دانەنراوە، دۆلارێك بۆ دابینكردنی كارەبا و نەوت و بەنزین و ئاو و تەواوی خزمەتگوزارییەكانی وەك پەروەردە و تەندروستی دانەنراوە، دۆلارێك بۆ بەرهەمهێنانی نەوت دانەنراوە، ئەوجاش نیوەی مووچەی فەرمانبەرانی هەرێم دەنێرێت.
سیپان شێروانی، ئەندامی پەرلەمانی عێراق، زیاتر گوتی: دادگەی باڵا لەجێی ئەوەی بە ئەركی خۆی هەڵبستێت و داكۆكی لە قوت و مافە دەستوورییەكانی هەرێم بكات، لە ئێستەدا خەریكی ڕێگری كردنە لە گەڕانەی پارتی بۆ كەركووك، ئەوەی ئێستە لە عێراق دەگوزەرێت خاڵی بوونە لە فیدراڵییەت و بنپێ خستنی بنەماكانی تەوافوق و تەوازن و شەراكەت كە عێراقی نوێی لەسەر بنیادنراوە، لە ئێستەدا عێراق لە قۆناغی پشتگوێخستنی هەرێمەوە هەنگاوی ناوە بۆ قۆناغی كاركردنی جددی بۆ لەناوبردنی هەرێم و پێكهاتەی كورد.
