دیدار- شەهلا رەشید
بەڕێوەبەری گواستنەوەی سۆران، لە دیدارێكی زاری كرمانجی دەڵێت” لە سنووری بەڕێوەبەرایەتیمان نزیكەی 1500 تەكسی كاری گواستنەوەی نەفەرات دەكەن، بەپێی رێنماییەكان ئەوانەی پێشمەرگە و فەرمانبەرن ئەگەر مووچەیان لە یەك ملیۆن كەمتر بێت دەتوانن ئیشی تەكسی بكەن.
لەبەردەوامی قسەكانیدا بارزان میر عەلی، بەڕێوەبەری گواستنەوەی سۆران، بە زاری كرمانجی ڕاگەیاند” بە فەرمانی وەزارەتی ناوخۆ ئەو بڕیارەی كە لەبارەی پێشمەرگە و فەرمانبەران درابوو ئیشی تەكسی نەكەن لە 1/6/2023 هەڵوەشایەوە و بڕیاریان دا ئەوانەی كە مووچەیان لە یەك ملیۆن كەمتر بێت بۆیان هەیە كاری تەكسی بكەن، بەڵام ئەگەر لە یەك ملیۆن زیاتر بێت ئەوا بە هیچ شێوەیەك لۆگۆیان بەناو ناكرێت، چونكە دەبێ پاكانەی بایۆمەتری لەگەڵ بێت لەوێش بەدیار دەكەوێ مووچەخۆرە و بڕەكەشی چەندە”.
ئاشكراشی كرد” لە سنووری ئیدارەی سەربەخۆی سۆران، نزیكەی 1500 تاكسی كاری گواستنەوە دەكەن، هەروەها لە 15/7/2023 بڕیارێك دەرچوو لەلایەن وەزارەتی ناوخۆ، بۆ ئەو ئۆتۆمبێلانەی كە لۆگۆیان لێنەدراوە دەبێ پێبژاردن بكرێن بە بڕی 40 هەزار دینار، هەروەها بەپێی یاسا و ڕێنماییەكانی وەزارەتی گواستنەوە ئێمە كار بە هیچ ئۆتۆمبێلێكی تایبەت ناكەین و دەبێ تابلۆی سۆر بێت، ئیشی ئێمە لەنێو ئیدارەیە، ئەوەی كە وا لە خەڵك بكرێت ناچار بن ڕێنماییەكان پەیڕەو بكەن كاری وەزارەتی ناوخۆیە و بڕیاریشی لەسەر دراوە بەڵام جێبەجێكردنی لەم قۆناغەدا لە سۆران ئەستەمە”.
ئاماژەی بەوەشدا: ” هۆكاری ئاستەمی جێبەجێكردنی بڕیارەكە بۆ ئەوە دەگەڕێتەوە، ئۆتۆمبێلی بێ سەرەتا(تۆزۆبا) زۆرە لەسنوورەكە، یان كەسێك ئۆتۆمبێل بە نرخێكی گران دەكڕێت و كەسێكیش بە نرخی هەرزان كە چی هەردووكیان بە یەك نرخ كاری گواستنەوە دەكەن، تەنانەت خەڵكیش زۆر حەزیان لە تەكسی نییە و كاتێك پەیوەندی بە خاوەن نووسینگەكان دەكەن بۆ داواكردنی تەكسی پێی دەڵێن ئۆتۆمبێلی تایبەت بێت، یاخود لەسەر شەقام دەست بۆ هەر ئۆتۆمبێلێك بڵند دەكات و لەگەڵی سەردەكەون”.
بەڕێوەبەری گواستنەوەی سۆران، ئەوەش دەخاتەڕوو: ” خەڵكیش هۆكارە بۆ ئەم گرفتە، بۆیە دەبێ فەرهەنگ سازی بكرێت و خەڵك تێبگەیەندرێت دەست بۆ هەر ئۆتۆمبێلێك ڕانەگرێت، هەموو ئەمانە هەندێك كاتی دەوێت و كاریان لەسەر دەكەین.
