حزبەكانی رۆژهەڵات لە ساڵیادی شەهیدبوونی ژینا مانگرتنی گشتی رادەگەیەنن

زاری كرمانجی – سۆران :

لە ساڵیادی شەهیدبوونی ژینا ئەمینی و سەرهەڵدانی شۆرشی (ژن، ژیان، ئازادی) لە رۆژهەڵاتی كوردستان و ئێران، حزبەكانی رۆژهەڵات بڕیاریان دا لەو رۆژەدا مانگرتنی گشتی رادەگەیەنن.
ئەمڕۆ چوارشەممە 6ـی ئەیلوولی 2023، شەش پارت و لایەنی سیاسی رۆژهەڵاتی كوردستان لە راگەیاندراوێكی تایبەت بە ساڵیادی شەهیدبوونی ژینا و راپەرینی جەماوەریی رۆژهەڵات و ئێران، مانگرتنی گشتی خۆیان راگەیاند و داوا لە تێكۆشەرانی راپەرینی ژینا و خەڵكی رۆژهەڵاتی كوردستان دەكەن لە ساڵوەگەڕێ دەستپێكی شۆڕشی ژینادا جێی خۆیەتی بە نیشانەی بەرزڕاگرتنی یاد و بیرەوەریی شەهیدانی ئەم شۆڕشە نوێیە و ڕێزلێنان لە قوربانیان و زیندانییان سیاسی و زیندووڕاگرتنی بزووتنەوەی سیاسی، بە شكۆوە بەرەوپیلی ئەم یادە مەزنە سیاسی و كۆمەڵایەتییەوە بچین.
لە دەقی راگەیەندراوەكەی شەش پارتی رۆژهەڵات (حیزبی دێموكراتی كوردستانی ئێران، كۆمەڵە (ڕێكخراوی كوردستانی حیزبی كۆمۆنیستی ئێران)، پارتی ژیانی ئازادی كوردستان (پژاك) ، سازمانی خەباتی كوردستانی ئێران، پارتی ئازادیی كوردستان (پاك)، كۆمەڵەی زەحمەتكێشانی كوردستان) هاتووە :

بانگەوازی حیزب و لایەنە سیاسییەكانی ڕۆژهەڵاتی كوردستان بۆ مانگرتنی گشتیی ٢٥ی خەرمانان

كۆمەڵانی تێكۆشەری خەڵكی كوردستان! خەباتكارانی سیاسی و مەدەنی! ٢٥ی خەرمانانی ١٤٠١، ژینا ئەمینی كچە كوردی لاوی سەقزی لە شاری تاران و لە ئاكامی پەلاماری هێزە دەست‌وەشێن و سەركوتكەرەكانی رێژیمدا گیانی بەخت كرد. ناوی (ژینا) وەك لە سەر گڵكۆكەی نووسرا، بوو بە “ڕەمز”ی ڕاپەڕینێكی جەماوەریی بەرین كە لە كوردستانەوە بە درووشمی “ژن، ژیان، ئازادی” دەستی پێ كرد و زۆری نەخایاند سەرتاسەری شار و ناوچەكانی ئێران و دەرەوەی وڵاتیشی گرتەوە و لە درێژەی خۆیدا بە “شۆڕشی ژینا” و “شۆڕشی ژن، ژیان، ئازادی” ناوی دەركرد.
شۆڕشی ژینا جەماوەریترین و درێژترین سەرهەڵدان و ناڕەزایەتییە كە توانیویەتی دەسەڵاتی كۆماری ئیسلامی بخاتە ژێر پرسیار و هەنگاو بۆ لە گۆڕنانی ئەم ڕێژیمە سەركوتكەرە بنێ. لە ماوەی یەك‌ ساڵی ڕابردوودا و لە ڕەوتی ئەم شۆڕشەدا بزووتنەوەی ئازادیخوازانەی خەڵكی ئیران بەگشتی و خەڵكی كوردستان بەتایبەتی دژبە ڕێژیمی زاڵ بە سەر ئێراندا، قۆناغی نوێ و جەماوەریی ئەزموون كردووە و هەنگاوی لێبڕاوانەی ناوە كە ڕاوەستان و گەڕانەوەی بۆ نییە. دەوری بەرچاوی ژنان لە پێشەنگایەتیی ئەو شۆڕشەدا كۆمەڵگەی ئێمەی لە ڕووی كۆمەڵایەتییەوە یەك هەنگاوی گەورە بەرەو پێش بردووە و ئاسۆی سەركەوتنی روونتر كردووە و لاوان لەوپەڕی گیانبازیدا بۆ ژیانێكی ئازاد و ئارەزوومەند فیداكاریی كەم‌وێنە دەكەن.
لە ساڵوەگەڕێ دەستپێكی شۆڕشی ژینادا جێی خۆیەتی بە نیشانەی بەرزڕاگرتنی یاد و بیرەوەریی شەهیدانی ئەم شۆڕشە نوێیە و ڕێزلێنان لە قوربانیان و زیندانییان سیاسی و زیندووڕاگرتنی بزووتنەوەی سیاسی، بە شكۆوە بەرەوپیلی ئەم یادە مەزنە سیاسی و كۆمەڵایەتییەوە بچین.
لەم پێوەندییەدا دوای چەند جار دیدار و ڕاوێژی سیاسی، رۆژی چوارشەممە، ١٥ی خەرمانانی ١٤٠٢ی هەتاوی، حیزبە سیاسییەكانی ڕۆژهەڵاتی كوردستان بریتی لە: – حیزبی دێموكراتی كوردستانی ئێران – كۆمەڵە (ڕێكخراوی كوردستانی حیزبی كۆمۆنیستی ئێران) – پارتی ژیانی ئازادی كوردستان (پژاك) – سازمانی خەباتی كوردستانی ئێران – پارتی ئازادیی كوردستان (پاك) – كۆمەڵەی زەحمەتكێشانی كوردستان لەسەر ئەم خاڵانەی خوارەوە رێكەوتن:
١- پشتیوانی لە داخوازیی تێكۆشەرانی كۆمەڵگەی مەدەنی و ڕێكخراوه سەربەخۆكان بۆ ڕێزگرتن و بەشداریی چالاكانه له ساڵڕۆژی شۆڕشی ژن، ژیان، ئازادی.
٢- ڕاگەیاندنی ڕۆژی ٢٥ی خەرمانان، وەك ڕۆژی مانگرتنی گشتی له هەموو كوردستان. لەم ڕۆژەدا هەموو دووكان و بازاڕ و ناوەندەكانی كار و ئیدارەكان دادەخرێن؛ سەر لە بەیانیی ئەو ڕۆژه (٢٥ی خەرمانان)، جەماوەری خەڵكی كوردستان سەردانی گڵكۆی ژینای جوانەمەرگ و سەرجەم شەهیدان و گیانبەختكردووانی شۆڕشی” ژن، ژیان، ئازادی” له شار و گوندەكانی كوردستان دەكەن و چەپكەگوڵی ڕێز و خۆشەویستی لەسەر مەزارەكانیان دادەنێن و ڕێوڕەسمی ڕێزلێنانیان بۆ بەڕێوه دەبەن.
٣- داوا لەسەرجەم خەڵكی ئازادیخوازی ئێران (ژنان، لاوان، كرێكاران، مامۆستایان و خانەنشینان، ژینگەپارێزان و نەتەوەبندەستەكان لە سەرتاسەری ئێران دەكەین؛ پشتیوانی لە مانگرتنی خەڵكی كوردستان بكەن و بە مانگرتنی گشتی، به هەمووانی نیشان بدەن كه شۆڕشی” ژن، ژیان، ئازادی” تا گەیشتن به ئامانجەكانی هەروا درێژەی هەیه.‌
٤- داوا له هەموو تێكۆشەرانی خەباتكار، هێز و لایەنه پێشكەوتنخوازەكان له دەرەوەی وڵات دەكەین به هەموو شێوەیە‌ك پشتیوانی له مانگرتنی گشتیی ٢٥ی خەرمانان بكەن و لەو ڕۆژەدا خۆپێشاندان و ڕێپێوانی جەماوەری بەڕێوە بەرن و سەرنجی كۆمەڵانی خەڵكی مرۆڤدۆستی جیهان بۆ پشتیوانی له شۆڕشی ژینا ڕابكێشن.
٥- هەركام له حیزب و لایەنە سیاسیەكانی كوردستانی بەشدار لەم دانیشتنە، پشتیوانی و بەشداریی خۆیان له مانگرتنی ڕۆژی “٢٥ی خەرمانان” و ڕێوڕەسمەكانی سەر گڵكۆی شەهیدان و گیانبەختكردووان ڕادەگەیەنن.

١٥ی خەرمانانی ١٤٠٢ی هەتاوی
٦ـی ئەیلوولی ٢٠٢٣