مەرجەكانی ئەنجوومەنی نامەعقوڵی عوورەبە بۆ كورد

ئیسماعیل ئیبراهیم

سەرۆكی ئەنجوومەنی عەرەبیی لە كەركوك لە بەرامبەر گەڕانەوەی پارتی دیموكراتی كوردستان بۆ ئەو شارە كوردییە چەند مەرجێكی دیاری كردووە، ئەگەر جێبەجێیان نەكات، رازی نابن بە گەڕانەوەی.

جارێ دیاری كردنی مەرج بۆ حزبێكی رەسەنی وەك پارتی كە نەك لە كوردستان بەڵكو لەسەر ئاستی هەموو عێراق یەكێكە لە مەزنترین و جەماوەریتیرن حزب، نەك هەر گاڵتەجارییە، بەڵكو جۆرێكە لە ئیستیفزاز كردنی نەتەوەی كورد.
كە مەرجەكانیش دەخوێنییەوە جگە لە پێكەنین بە عەقڵی ئەو ئەنجوومەن و سەرۆكەكەی، رق و كینەت لە ئاست نەتەوەیی عەرەبی شۆفێنی زیاتر دەبێت، لە هەمانكاتیشدا گەورەیی پارتی زیاتر زەق دەبێتەوە، پرسیارە جەوهەرییەكە ئەوەیە بۆچی مەرج بۆ هیچ حزبێكی دیكە دانەنراوە تەنها پارتی نەبێت؟ لە كاتی قسەكردنی سەرۆكی ئەو ئەنجوومەنە عەرەبییە شۆفێنییە، چەندجارێك گووترا” گەڕانەوەی كورد بۆ كەركووك) واتە پارتی بگەڕێتەوە كەركووك ئاماژەیە بۆ ئەوەی كورد دەگەڕێتەوە ئەو شارە و ئەوانەی تا ئێستا لەوێ بوونە سەنگ و قورسایی ئەوتۆیان نەبووە كە بتوانن نوێنەرایەتی كورد بكەن، كە ئەمە هەیبەت و گەورەیی هەستی ناسیۆنالیزمی كورد لای پارتی بەدەردەخات.

جا سەیری مەرجەكانی ئەو ئەنجوومەنە بێ سەرووبەرە بكەن، لە مەرجی یەكەم نازم شەمەری دەڵێ:” داننانی ئەو پارتە( مەبەستی پارتییە) بە عێراقیی بوونی كەركووك و دەسەڵاتی دەوڵەتی عێراق بەسەریدا”، كە ئەمە خەونی حوشترە، پارتی واز لە كوردستانی بوونی كەركووك بهێنێت، پارتییەك كە شۆڕشی ئەیلولی لەسەر دانا و هەزاران ڕۆڵەی كورد لە پێناو كەركووك لە ریزەكانی پارتی كراونەتە قوربانی، ئێستا پارتی لەسەر داوای گرووپێكی شۆفێنی و بە ئاسانی دەستبەرداری ناسنامەی كوردستانی بوونی كەركووك ناهێنێت و نابێ بیریشی لێ بكاتەوە.

مەرجی دووهەمی ئەو ئەنجوومەنە شۆفێنییە:” پارتی دیموكراتی كوردستان دەستهەڵبگرێت لە وەسفكردنی هێزە ئەمنییە عێراقییەكان بە هێزی داگیركەر” ئەم مەرجە وەك ئەوە وایە بڵێی هێزە ئەمنییەكان و هێزەكانی حەشدی شەعبی ئێرانی و باقی هێزەكانی دیكە كەركوكیان داگیر نەكردووە و ئەوان هاتوونەتە سەر خاك و شاری خۆیان و ئەوە پارتییە كە داگیركەرە، وەك ئەوەی بڵێی خاوەن ماڵ ببێتە بێگانە بێگانەش ببێتە خاوەن ماڵ، ئەم مەرجە نەك ماقوڵە و جێبەجێ نابێ، بەڵكو بە دیدی من پێویستە پارتی زیاتر لە رابردوو و پێداگری لەسەر ئەوە بكات كە كەركووك داگیر كراوە، بە تایبەتی لە دوای خیانەتی 16ی ئۆكتۆبەر و رووداوەكانی چەند رۆژی رابردوو.

سێیەم مەرجی ئەو ئەنجوومەنە بریتییە لە :” ئازادكردنی دەستگیركراوانی عەرەب لە گرتووخانەكانی هەرێمی كوردستاندا”. ئەو عەرەبانەی لە گرتووخانەكانی كوردستانن، بەهۆی ئەنجامدانی تاوان دەستگیر كراون و دادگا بڕیاری لەسەر داون، كەس لە سەر كاری جوان، قسەی خۆش و بێ تاوان ناگیرێت، ئەوەی گیراوە یا دزی كردووە، یا كەسێكی كوشتووە، یا دەستی هەبووە لە ئاژاوەگێڕی، یا تاوانێكی گەورەی كردووە، بۆیە داواكەشیان وەك بوونی خۆیان نامەقوڵە و سەر ناگرێت.
مەرجی چوارەمی ئەو ئەنجوومەنە ناماقووڵە بریتییە لە:” قەرەبووكردنەوەی خەڵكی گوندە عەرەبییە وێرانكراوەكان و بەڵێندان بەوەی جارێكی تر ئەو ڕێوشوێنە سەركوتكارانەیەی رابردوو دووبارە نابنەوە”. تا خاوەن ماڵ دزی گرت دز خاوەن ماڵی لوولدا، داگیركردنی زەوی و راوەدوونانی گوندنشینانی سنووری ماددەی 140، لە نێویشیاندا گوندەكانی پەلكانە و دەشتی مەخموور، كە رۆژانە هێزە سەربازییەكانی داگیركەری عێراق بەسەریاندادەدەن، ناهێڵن جوتیاران زەوییەكانیان بكێڵن، ئەوە پارتییە خۆ هێزی داگیركەری عورووبە نییە!!!.

ئەو ئەنجوومەنە بەشێكە لە دامەزراوەی دژە نەتەوەیی كورد، بەشێكە لە ئەجندای دەرەكی بۆ درێژەدان بە چەوساندنەوەی نەتەوەی كورد لە هەموو عێراق، لە سەردەمی كۆنەوە تا دەگاتە حزبی بەعس و ئێستاش عێراقی حەشدی داعشی، بۆیە وەك دیارە ئەركی پارتی چۆن لە رابردوو قورس بووە، ئێستاش قورستر كراوە، ئەوەندەی من پارتی و سەركردایەتی پارتی بناسم نەك ناچێتە ژێر باری ئەو جۆرە شەرت و شوورتە بێ مانایانە، بەڵكو رژدتر دەبێت لە بەرگری كردن لە مافە نەتەوەییەكانی كوردستانیان لە هەموو بستێكی باشووری كوردستان تا حەمرین و هەر سێ پارچەكەی دیكە.
دڵنیاشم پارتی بە بێ ئەوەی حیساب بۆ ئەو جۆرە ئەنجوومەنانە بكات، بەسەر بڵندییەوە دەگەڕێتەوە كەركووك، گەڕانەوە بۆ كەركووكیش واتە گەڕانەوەی نەتەوەی كورد بۆ كەركووك بە شكۆ و هەیبەتێكەوە، كە هیچ لایەنێكی عێراقی و خاك فرۆشان بە بیریشیان نەدەهات.