ئیسماعیل ئیبراهیم
رووداوەكای دوێنێی شاری كەركوك كە دەستی ناحەزانی نەتەوەی كوردی لە پشت بوو، حەشدی شەعبی بە ئاگاداری یەكێتی نیشتمانی كوردستان، دەیان رووتە و پێ پەتییان بە ناوی خۆپێشاندەرەوە هێنابووە سەر شەقام و چەندین رۆژ بوو رێگەی نێوان هەولێر و كەركوكیان داخستبوو، یارییەكی نەزانانەی سیاسی بوو كە پێش ئەوەی لە دایك بێت مردبوو.
قسەم لەسەر حەشدی داعشی بەكرێگیراوی ئێران نییە، لەبەر ئەوەی ئەوان بڕیاریانداوە دژی نەتەوەی كورد بوەستنەوە و بە هەموو شێوەیەك كار بۆ كوشتن و لە ناو بردنی نەتەوەی كورد بكەن لە هەر كوێیەك بێت.
بەڵام ئەوەی جێگەی هەڵوێستە لەسەر كردنە و بۆ ئەوەی شەقامی كوردستان زیاتر ئەو هێزە بناسێت قسەكانی ئاسۆ مامەند بوو، كە لە كەناڵی فەرمی یەكێتی نیشتمانی كوردستان بە شێوەی راستەوخۆ هەرتەركێكی لە كەنداڵێك دەدا، دەیویست بە هەموو شێوەیەك وای نیشان بدات كە خەمخۆری دۆخەكەن و گوایە چەندین رۆژە لەسەر خەتن بۆ ئەوەی ئەم دۆخە دروست نەبێت، كە ئەمە درۆیەكی زەقی ئەو و هاوئاوازەكانییەتی و هەوڵی دەدا شەرعییەت بداتە ئەو كارە قێزەوونەی لە ئاست گەنجان و هاووڵاتییانی ئەو شارە كرا.
ئەو لە كەناڵەكەیان بەو ئاراستەیە قسەی كرد، كە “بارەگایەكی پارتی ئەوەندە ناهێنێت خوێنی خەڵكی لەسەر برژێت” جارێ ئەو لە دیدی دژە پارتی بوونییەوە ئەو قسەیەی كرد، بەڵام لە راستیدا ئەو شوێنەی شەوی رابردوو لە كەركووك خوێنی لەسەر رژا، بە ناو بارەگای پارتی دیموكراتی كوردستانە، بەڵام لە جەوهەردا، شكۆی و مێژووی نەتەوەیەكە لەشاری كەركووك، ئەم بارەگایە ئەگەر هی شیوعی، زەحمەتكێشان یا هەر لایەنێكی دیكە بایە، تەعبیرە لە نوێنەرانی نەتەوەیەكی 50 ملیۆنی كە بوونی لە كەركووك مێژو و رەگێكی قوڵی هەیە، بۆیە خوێنی رۆڵەی كورد شەوی رابردوو لەسەر نەتەوەی كورد و ئەو زولمەی لە بەرامبەری دەكرا رژاوە، بەڵام شانازییەكەی وەك هەمیشە بەر پارتی دیموكراتی كوردستان كەوت، كە بارەگاكە بە رەواڵەت بە ناوی ئەوە، كورد چی بكات حزبەكەی ئاسۆ مامەند ئەو شانازییەی بە باڵای خۆی نەبینیوە.
لە بەشێكی دیكەی قسەكانیدا ئەو ئاسۆیە كە بەس ئاسۆ نییە، دەڵێت” ئێمە وەك یەكێتی ئامادەین هەموو بارەگاكانمان بە شۆفەڵ تەخت بكرێت، بەڵام خوێنی گەنجێكی ئەم شارە نەرژێت” كوڕی باش ئێوە شاری كەركوكتان فرۆشت، ئێوە و خیانەتی شومی 16ی ئۆكتۆبەر بوونە هۆكاری ئەم دۆخەی شاری كەركووك، ئێستا هاتووی بۆ چەواشەكاری كوردایەتی بە هاووڵاتییانی ئەم شارە دەفرۆشییەوە، هەموومان بیرمان دێت كاتێ خیانەتتان لە هێزەكانی پێشمەرگەی خۆتان كرد و دەبابە بەسەر جەستیان رۆیشت، ئێوە خەریكی دۆزینەوەی بیانو بوون تا شەرعییەت بدەنە حەشدی شەعبی، پێشمەرگەكانی بەشەرەفی كوردستانتان لە رێزی یەكێتی بە هەڵە لەقەڵەمدا، رۆژانە بە بەرچاوی ئێوەو بە هۆی خەیانەتی ئێوە بێ جورئەتی و بێ غیرەتیتان دەستدرێژەی دەكرێتە سەر نەتەوەی كورد نووزەتان لێوە ناهێت، ئێستا هاتووی كوردایەتی و دڵسۆزی بە شەقام دەفرۆشییەوە.
لە چاوپێكەوتنەكە زیاتر لە 10 جار گووتی ” داوامان لە سودانی و خالید شوانی كرد، ئەو دۆخە چارەسەر بكەن” كێ حیسابی بۆ قسەكانی ئێوە كرد، ئێوە بەخۆتان بوونەتە ئەڵقە لە گوێی ئەوان ئێستا هاتووی دەتەوێت دەستی چەور بە پارتی بسرێتەوە و بەرهەمێك بچێنییە، بەڵام دواجار دەستت وەك هەمووجار بە بەتاڵی لە بنی هەنبانە بەتاڵەكەتان دێتە دەرێ.
لەبەر ئەوەی شەقام باشتر لە ئێوە وریا و هۆشیارە ئەم وشەیەش دەنووسم، (ئەوەی بەنەفسە ئەلفێكی بەسە).
