هەڵبژاردن و بەهێزهێشتنەوەی کوردستان

گولستان بەهجەت
ئێستاش گریان، ناڵە و لاواندنەوەكانی دایكە ئەنفالەكان لە گوێم دەزرنگێتەوە، ئێستاش لە نێوان شار و گوندەكان تێدەپەڕم گۆڕستانی شەهیدانیان سەرنجم رادەكێشێت، ئێستا كاتێ جلی ڕەش لەبەر ئافرەتێكی كورد و پیاوێكی كورد دەبینم تازیە و شینی خانەوادەی شەهیدانم بۆ رۆڵەكانیان دێتەوە بەرچاو.
هەموو ئەمانە تەنها یەك هۆكاری لە پشتە، ئەویش كورد بوونە، كوردبوونم وایكردووە، گوندەكانم بە مزگەوت و قورئانی ناوەوەشیان بسووتێندرێن، كورد بوونم وایكردووە، كانیەواكانمان ئێستاش بۆنی بارووتیان لێ بێت، كورد بوونمان وایكردووە لە ژێر هەر بەردێك و دەوەنێك و دۆڵێك خوێنی لاوێكی ئەم نیشتمانەم لێ رژابێت.
ئەم تاوانانەی لە ئاست نەتەوەكەم بە هۆی كورد بوونمەوە مێژوویەكی دوور و درێژی هەیە و قوڵ بۆتەوە بۆ سەدان ساڵ، ئەوەی هاتە سەر حوكم بە فارس و عەجەم و تورك و عەرەبەوە هەموو جۆرە چەك و تەقەمەنی لەسەر تاقی كردینەوە، لە زیندانەكان هەموو جۆرە ئەشكەنجەدانیان لەسەر لاوانمان تاقی كردەوە، ئەوەی هاتە سەر حوكم لە برسیكردن و كوشتنمان دڵیان ئاوی نەخواردەوە دەستیان بۆ شەرەف و كەرامەت و ناموسیان هێناین.
ئەو كاتیش نادادی هەبوو، گەندەڵی هەبوو، بێكاری هەبوو، هەموو شتەكان هەبوون، سەرووی هەمووشیان یاریكردن بە هەست و سۆزی مرۆڤانەی ئێمە هەبوو، ڕفاندن هەبوو، ئێستاش هەزاران كەسمان لە منداڵ تا بەساڵاچوو لە رەگەزی جیا و چینی جیا بێ سەروو شوێنن، هەموو ئەوانە بە هۆی كورد بوونەوە بووە، نەك بەهۆی ئەوەی خاكی كەسمان داگیر كردبێت، نەك لەبەر ئەوەی مێژووی كەسمان شێواندبێت، یا دەستمان بۆ شكۆی نەتەوەیی و شەرەف و نامووسی هیچ نەتەوەیەكی دیكە بردبێت، تاوانی ئێمە تەنها كورد بوون بووە و بەس .
ئێستا پاش هەموو ئەو دەردە سەریانە و پەرێنەوە لە ڕووبارێك خوێنی تاكی ئەم وڵاتە كیانێكی سیاسیمان بنیادناوە، بە هەموو كەم و كورییەكانەوە، بەڵام شەرەف و ناموسمان و كوردبوونمان وەك مرۆڤێكی درووستكراوی خودا پارێزراوە.
ئەو كیانە ئێستا لە مەترسیدایە، داگیركەران و بەكرێگیراوانیان خەریكن ئەم هەرێمەمان بنكۆڵ دەكەن، تا دووبارە هەمان رووداوەكانی پڕِ لە تراژیدیای مەرگ و خوێنمان بەسەر دووبارە بكەنەوە.
لەوەتەی مێژوو هەیە، كورد دەكوژرێت و دەچەوسێندرێتەوە، ئەگەر دەست بە باشووری كوردستانەوە نەگرین، خراپتر لە رابردوومان بەسەر دێنن.
بۆیە بە بەهێز هێشتنەوەی كوردستان ئەركە لەسەر هەموو تاكی كورد، بە هەموو ئەو تێبینیانەی كە هەشن.
بەشداریكردنی هەر تاكێكی كوردستان بۆ بەهێز كردنی نیشتمان لە هەر بوارێكەوە بێت كاریگەری بەردەوامی ئەم نیشتمانە ئازادەیە.
یەكێك لەو بوارە گرنگانە لە داهاتوویەكی نزیك دێتە پێش بەشداریكردنە لە هەڵبژاردنی پەرلەمانی كوردستان.
هەڵبژاردنی داهاتوو بۆ نیشتمانپەروەران و سەربەخۆ خوازان دەلیڤەیەكی مەزنە، تاقیكردنەوەیەكی گرنگە، پێویستە هەموو سەربەخۆ خوازان بەشداری تێدا بكەن، بزانن هەر دەنگێك بۆ نیشتمانێكی ئازاد و خۆنەچەماندن وەك مستێكی پۆڵاینە بۆ دەمی ناحەزانی كوردستان و نەتەوەی كورد.
یەك دەنگ واتە نزیك بوونەوە لە سەر كەوتن، دوور كەوتنەوە لە كارەساتەكان، واتە دوژمن بەزاندن، واتە بەهێز مانەوە.
بۆیە ئەركە لەسەر هەموو كوردێكی خاوەن ئیرادە و نیشتمانپەروەر، دڵنیا ببێتەوە لەوەی كارتی دەنگدانی بێ كێشەیە تا لە رۆژی هەڵبژاردن، پایەكانی شكۆی نەتەوەیی بەهێزتر بكەن، پێویستە هەر دەنگێكمان مووشەكێك بێت بۆ تێكشكاندنی ئەبرامزەكانی داگیركەران”.