چاودێرانی سیاسی : ئەم رەفتارەی حكومەتی ناوەندی سەری سودانی و عێراقیش دەخوات

زاری كرمانجی:
حكومەتی ناوەندی بە هەموو شێوەكانییەوە گووشار لەسەر حكومەتی هەرێمی كوردستان دەكات بۆ لاواز كردنی و چاودێرانی سیاسیش پێیانوایە ئەم جۆرە هەڵسوكەوتانە سەری كابینەكەی شیاع سودانی و حكومەتی عێراقیش دەخوات.
ئەحمەد برایم، چاودێری سیاسی و مامۆستای زانكۆ لەمبارەیەوە بۆ زاری كرمانجی گووتی ” بە هۆی زاڵ بوونی بیری شۆفینیزمی عەرەبی لە نێو دەستەڵاتدارانی سیاسی بەغدا، هەمیشە كێشە بۆ نەتەوەی كورد دروست دەكرێت، چاوەرێ ئەوەش دەكرێت ئەو كردەوە دووژمنكارانەیەش زیاتر و توندتر بێت “.
ئەو مامۆستایەی زانكۆیە گووتیشی ” كابینەی حكومەتە یەك لە دوایەكەكانی عێراق، بەرووكەش عێراقین بەڵام لە ناوەخەن و لە قووڵییەوە دەستەڵات و ئاراستە كردن و بڕیارە گرنگەكان بە دەست ئێرانە و لە رێگەی ملیشیاكانەوە ئەوەی بخوازێت وادەكات “.
سۆران رەسول، چاودێری سیاسییە و چەندین وتار و شڕۆڤەی لەسەر دۆخی ئێستای عێراق نووسیوە، ئەو پێیوایە ئەم دۆخەی عێراق و شێوازی مامەلەكردنی لەگەڵ هەرێم بەردەوام بێت زیانی گەورە بەر عێراق دەكەوێت، ئەو دەڵێت ” ئەم رەفتارانەی حكومەتی ناوەندی لەگەڵ هەرێمی كوردستان نەك لە ناوخۆی كوردستان و عێراق جێگەی قبول كردن نین و نیگەرانی بەدواوە هاتووە، لە سەر ئاستی نێودەوڵەتیش زیانێكی زۆری بە پێگەی ئەم كابینەیە گەیاندووە، بە تایبەتی كە هەرێمی كوردستان هەموو بڕگەكانی رێككەوتنەكەی جێبەجێكردووە، بەڵام حكومەتی ناوەندی هەرجار بە دۆزینەوەی بیانوو كێشە بۆ حكومەت و هاووڵاتییانی هەرێمی كوردستان دروست دەكات”.
ئەم نووسەرە زیاتر گووتی ” ئەم رەفتارەی حكومەتی ناوەندی بەردەوام بێت، سەری كابینەی شیاع سودانی دەخوات و كێشەی گەورە بۆ عێراق دروست دەكات و دوور نییە تووشی كێشەی گەورەی وابكات بە ئاسانی لێ رزگار نەبێت”.