زاری كرمانجی -سۆران:
لەسەر بڕیاری مەسروور بارزانی، سەرۆكوەزیران، خەمڵاندنی نرخی زەویی سندووقی لە 30% كراوەتە 10% و تاپۆ دەكرێن و رێگەپێدانی خانووكردنیان پێ دەدرێت.
ئەمڕۆ ئومێد خۆشناو، پارێزگاری هەولێر لە راگەیەندراوێكدا ئاشكرایكرد، بۆ زەویی سندووقی و خانووكردن لە حەرەمی گوندەكان و رێگەپێدان بۆ نۆژەنكردنەوەی خانوو لە كۆمەڵگەكان، مەسروور بارزانی، سەرۆكی حكوومەتی هەرێمی كوردستان رەزامەندی لەسەر چەند بڕیارێك دەربڕیوە. گوتیشی: “خەمڵاندنی نرخی زەویی سندووقی لە 30% كراوەتە 10% و تاپۆ دەكرێن و رێگەپێدانی خانووكردنیان پێ دەدرێت، هەروەها هەر شوێنێك پێویست بكات بۆ فراوانكردنی حەرەمی گوند، لێژنەكانی شارەوانی ئامادەكاریی بۆ دەكەن و راسپاردەی یەكە ئیدارییەكان دەدرێتە پارێزگا و ئەنجوومەنی پارێزگاكان و بۆ فراوانكردنی حەرەمی گوندەكان رەزامەندیی لەسەر دەدرێت.
پارێزگاری هەولێر ئاماژەی بەوەش كرد: “پێشتر ئەو رێنوێنییانەی كە بۆ زەویی سندووقی دەركرابوون تێبینییان لەسەر هەبوو، بەهۆی ئەوەی داواكارییەكی زۆری خەڵك هەبوو بۆ ئەوەی پێداچوونەوە بە رسووماتدا بكرێت، چونكە ئەوكات خەمڵاندنی تاپۆكردنیان بە 30%ی نرخی رۆژ بوو، لەو شوێنانەی كە زەوییەكانیان لێییە.
پارێزگاری هەولێر ئاشكراشی كرد، مەسروور بارزانی، سەرۆكی حكوومەتی هەرێمی كوردستان، لەپێناو خەڵكی كەمدرامەتدا رەزامەندیی دەربڕیوە، گوتیشی: “كۆنووسەكەمان بۆ سەرۆكی حكوومەتی هەرێمی كوردستان نارد، ئەویش لەپێناو كارئاسانی و هاوكاریی خەڵكی هەژار و كەمدرامەت، لە زەویی سندووقی و فراوانكردنی حەرەمی گوند، بەپێی پێویست و نۆژەنكرنەوەی ئەو خانووانەی كە لە شوێنەكانی دیكە كراون، سەرۆكی حكوومەت رەزامەندیی لەسەر كۆنووسەكە داوە.
ئومێد خۆشناو روونیشی كردەوە: كۆنووسەكە لەم چەند رۆژە رەزامەندیی سەرۆكی حكوومەتی بۆ وەرگیراوە و لەم هەفتەیەدا كۆبوونەوە بە فەرمانگە پەیوەندیدارەكان دەكرێت و رێنوێنیی تازە بۆ جێبەجێكردنی بڕیارەكان دەردەكرێت.
ئومێد خۆشناو ئاشكراشی كرد، بەپێی بڕیارەكان، دەست دەكرێت بە رێگەپێدانی نۆژەنكردنەوەی خانووەكان لە كۆمەڵگەكان و شوێنەكانی دیكە، ئەو خانووانە پێشتر لەو شوێنانە دروست كراون و رێگەیان پێ نەدراوە نۆژەن بكرێنەوە، ئێستا هەواڵی خۆش بۆ ئەوان ئەوەیە، بڕیاری رێگەپێدانی نۆژەنككرنەوە دەدرێت و نۆژەنكردنەوەكانیش دەست پێ دەكەنەوە.
خەسرۆ ئیسماعیل، بەڕێوەبەری گشتی شارەوانییەكانی ئیدارەی سۆران، بە زاری كرمانجی گوت: سەبارەت بە زەویە سندووقیەكان داواكاریەكانی خەڵك وەرگیراوە، مەسرور بارزانی، سەرۆكی حكوومەت بڕیارێكی زۆر گرنگی دا و پێداچوونەوە بە نرخی زەوییە سندووقیەكان دەكرێت، بۆ ئەوەی لەگەڵ بار و گوزەرانی هاووڵاتییان بگونجێت.
بەڕێوەبەری گشتی شارەوانییەكانی ئیدارەی سۆران، گوتیشی: ئەو داواكارییانەی لە سنووری ئیدارەی سەربەخۆی سۆران پێشكەش بە سەرۆكایەتی شارەوانی كرابوون نزیكەی 1187 داواكاری بوون، لە ئێستادا دووبارە داواكاری پێشكەش دەكرێنەوە و مامەڵەی هاووڵاتییان وەردەگرێت و پشكنینیان بۆ دەكرێت.
