سالار تەحسین سەیدۆ دری
ئەندامی لیژنەی باڵای پێشوازیكردن لە زیارەتكاران لە حاجی ئۆمەران
ئەمڕۆ ٢٨ی ئاب دەیەمین ڕۆژی پرۆسەی پێشوازیكردن لە زیارەتكارانی ئێرانی و بیانی بۆ چلەی ئیمام حوسێن بەردەوامی ھەبووە، ھەڵبەتە بە ھێزی نەرم و كارامەیی لۆجستی ئەفسەر و كارمەندانی نشینگە و پاسپۆرتی دەروازەی حاجی ئۆمەران لە پێشوازیی كاروانی زیارەتكارانی كۆماری ئیسلامی ئێران بووین، وەك ئاشكرایە دووەمین ساڵە زیارەتكارانی ئێرانی و بیانی لە دەروازەی نێودەوڵەتیی حاجی ئۆمەرانەوە سەردانی نەجەف و كەربەلا دەكەن.
وەكو دامەزراوەی نشینگە و پاسپۆرت، بە پلەی یەكەم ئەركە قورسەكە لەسەر شانی ئێمە و دەزگا ئەمنییەكانی حاجی ئۆمەرانە، لە پێشوازیی میوانەكاندا ئاسانكاری پێویست لە ڕووی چێككردنی پاسپۆرت كراوە، ئەویش بە دانانی ٤٣ گێت لە گۆرەپانی دەرەوە و ١٤ گێت لە ناو ھۆلی چوون و ھاتن ئامادەكاریمان كردووە، لە ٢٥ مانگەوە ھاتنی زیارەتكاران بە لێشاو دەستی پێكردووە.
ئەمساڵ پڕۆسەكە لە ١٨ی ئاب دەستی پێكرد و بڕیار وایە ٦ی ئەیلوول كۆتا ڕۆژی پڕۆسەی ھاتن بیت، تاكو ئێستا زیاتر لە ٢٠ ھەزار زیارەتكاری ئێرانی و ھەزار زیارەتكاری ئازەربایجان، رووسیا، جۆرجیا، توركیا و كازاقستان لە ڕێگەی دەروازەی حاجی ئۆمەرانەوە داخل بوون، تەنھا ٢٧ی مانگ لە سەرووی ٨ ھەزار زیارەتكار و گەشتیاری ئاسایی ھاتۆچوویان كردووە، هاوكات پڕۆسەی گەرانەوەش دەستی پێكردووە و زیاتر لە ٧ ھەزار زیارەتكاری ئێرانی و زیاتر لە ٥٠٠ زیارەتكاری بیانی گەراونەتەوە.
پارساڵ بۆ یەكەمجار بە فەرمی پڕۆسەی هاتنی زیارەتكارانی ئێرانی و بیانی بۆ شوێنە پیرۆزەكانی عێراق لە دەروازەی نێودەوڵەتیی حاجی ئۆمەرانەوە بۆ ناو خاكی هەرێمی كوردستان دەستی پێكردووە و زیاتر لە (70 ھەزار) زیارەتكاری ئێرانی و بیانی لە ڕێگەی دەروازەی نێودەوڵەتیی حاجی ئۆمەرانەوە بۆ سەردانیكردنی شوێنە پیرۆزەكانی عێراق داخلی هەرێمی كوردستان بوون.
لەسەر ڕاسپاردەی جەنابی (سەرۆك بارزانی) پێویستە بە باشترین شێوە پێشوازیی لە زیارەتكاران بۆ شوێنە پیرۆزەكانی عێراق بكرێت، مەبەستی سەرەكی ئێمەش، ئەوەیە كاربەدەستانی دەروازە سنوورییەكان بە شێوەیەكی سەردەمییانە و بەپێی ستانداردە جیهانییەكان، ڕوویەكی جوانی شارستانی و بە ئەتەكێت بوون پێشانی زیارەتكاران و گەشتیارانی ئاسایی بدەین.
ئادابی لووتف شیرینی و ئەتەكێت بوونیش یارمەتیمان دەدات سەرنج و ڕێزگرتنمان بۆ كەسانی تر چ زیارەتكار یان گەشتیاری ئاسایی نیشان بدەین، هەروەها كەسانی تر دڵخۆش دەكات بە ناسینی ئێمە.
كارمەندانی دەروازە سنوورییەكان پێویستە بەرژەوەندیی زیارەتكاران و سەردانیكاران لە پێشینەی كارەكانیان بێت بەبێ ئەوەی خۆیان بخەنە پێگەیەكی نزمترەوە. ئەتەكێت بوونیش ئاسایشی كەسی دروست دەكات، گرنگی بەهەستی كەسانی زیارەتكار دەدات و ڕێز و خۆشەویستی دروست دەكات.
ئەوەی پێویستە، ئەوانەی لە دەروازە سنوورییەكان كار دەكەن تەنیا پێناسەی خۆیان ناكەن، بەڵكو نوێنەرایەتیی ئەو وڵاتە و حكومەت و هاونیشتمانییانیان دەكەن، كەوابوو ڕەفتار و ھەڵسوكەوتی باش كاریگەریی باش لەسەر سەردانیكاران و زیارەتكاران دادەنێت و سیمایەكی شارستانییانە لە حكومەت و گەلەكەیان پیشانی دەرەوە دەدەن و هۆكارێكی گرنگیشە بۆ راكێشانی بیانییەكان بۆ ناو وڵاتەكەیان كە لە ئەنجامدا دەبێتە هۆی بووژانەوەی ئابووریی وڵات و بەپێچەوانەكەشی راستە.
دیارە پیشوازیكردن لە گەشتیاران و زیارەتكاران و میوانان بە شێوازێكی مۆدێرن و ئەتەكێتی سەردەمییانە و بە لوتفێكی شیرین، دەبێتە یەكەم هەنگاوی وێناكردنی ڕەفتاری شایستەی حكومەت و سەرنجڕاكێشانی خەڵك و نیشاندانی كولتووری مرۆڤدۆستیی گەلی كورد، بەجۆرێك كە گەشتیاران و میوانان لە یەكەم دیمەنی گەشتكردنیاندا بۆ شوێنە پیرۆزەكانی عێراق، هەست بەوە بكەن كه پەروەردە و شوناسی نەتەوە و كولتوورێكی جوان و پێشكەوتوو و مۆدێرن لە هەرێمی كوردستان پەیڕەو دەكرێت.
هەر زیارەتكارێك یان گەشتیارێكی ئاسایی لە یەكەمین هەنگاوی ڕووبەڕووبوونەوەیدا، خوێندنەوەی خۆی لەسەر ئەدای ئەو كارمەندە دەبینێت كە پێشوازییان لێدەكات و لەسەر ئەو دیدگایە هەڵسەنگاندن بۆ كەسانی بەرامبەر دەكەن، لێرەوە پێویستە ئێمەمانان لە دەروازە سنوورییەكاندا، هەمیشە بە چاوی باڵیۆزێك سەیری هەر گەشتیارێك و زیارەتكارێكی ئایینی بكەین و بە تێكەڵكردنی كولتووری میواندۆستیی جوان و ئەتەكێتی سەردەمییانه، وێنەیەكی جوان پێشان بدەین و هەوڵبدەین حكومەت و یاسا تێكەڵ بە كولتووری میواندۆستیی خۆمان بكەین و بە كردەوە كاری لە سەر بكەین و ئەو جوانڕەفتاری و جوانكرداریەی خەڵكی كوردستان بە ڕووی جیهاندا زیاتر پەرە پێ بدەین و زیاتر كارمەندەكان بۆ هەڵگرتنی ڕەوشتی جوانی نیشتمانی و بەرپرسیارێتی هان بدەین و هەر لە دەروازەكانەوە بۆ زیارەتكاران و گەشتیاران بسەلمێنین كە ئێرە وڵاتێكی سەقامگیر، ئارام و میواندۆستە.. ئادابی ڕێزگرتن و میواندۆستیی، شوناسی گەلی كوردە.
مەزندەش دەكرێت لە ڕۆژانی داھاتوو ھاتن و گەرانەوەی زیارەتكارانی ئێرانی و بیانی گەرم و گوڕتر ببێت.
