پشتیوان كەریم – حاجی ئۆمەران:
بەمەبەستی بەشداریكردن لە چلەی ئیمام حوسێن لە 18ی ئەم مانگەوە دەروازەی نێودەوڵەتی حاجی ئۆمەران بەڕووی زیارەتكارانی ئێراندا كراوەتەوە، رۆژانە هەزاران زیارەتكار لەرێگەی ئەو دەروازەیەوە روو لە هەرێمی كوردستان دەكەن.
مقەدەم سالار تەحسین، بەرپرسی نیشینگە و پاسپۆرت لە دەروازەی نێودەوڵەتی حاجی ئۆمەران، بە زاری كرمانجی گوت: رۆژبەرۆژ ژمارەی زیارەتكارن زیاتر دەبێتەوە، تەنها دوێنێ یەك شەممە زیاتر 5500 زیارەتكار هاتوونەتە هەرێمی كوردستان، زیاتر لە 3 هەزار گەشتیاریش بە دەروازەكەدا هاتووچۆیان كردووە.
بەرپرسی نیشینگە و پاسپۆرت لە دەروازەی نێودەوڵەتی حاجی ئۆمەران، گوتیشی: پێشبینی دەكەین پێنج سەد هەزار زیارەتكار لەرێگەی دەروازەی نێوەدەوڵەتی حاجی ئۆمەرانەوە روو لە شوێنە ئایینییەكانی نەجەف و كەربەلا بكەن، بۆ ئەو مەبەستە هەموو ئامادەكاریەك كراوە و ڕۆژانە دەتوانین ڕێكاری هەزاران زیارەتكار ئەنجام بدەین.
مقەدەم سالار تەحسین، دەشڵێ: پارساڵ بۆ یەكەمجار بە فەرمی پڕۆسەی هاتنی زیارەتكارانی ئێرانی و بیانی بۆ شوێنە پیرۆزەكانی عێراق لە دەروازەی نێودەوڵەتیی حاجی ئۆمەرانەوە بۆ ناو خاكی هەرێمی كوردستان دەستی پێكردووە و زیاتر لە (70 ھەزار) زیارەتكاری ئێرانی و بیانی لە ڕێگەی دەروازەی نێودەوڵەتیی حاجی ئۆمەرانەوە بۆ سەردانیكردنی شوێنە پیرۆزەكانی عێراق داخلی هەرێمی كوردستان بوون.
بەرپرسی نیشینگە و پاسپۆرت لە دەروازەی نێودەوڵەتی حاجی ئۆمەران، زیاتر دەڵێ: لەسەر ڕاسپاردەی سەرۆك بارزانی، پێویستە بە باشترین شێوە پێشوازیی لە زیارەتكاران بۆ شوێنە پیرۆزەكانی عێراق بكرێت، مەبەستی سەرەكی ئێمەش ئەوەیە كاربەدەستانی دەروازە سنوورییەكان بە شێوەیەكی سەردەمییانە و بەپێی ستانداردە جیهانییەكان، ڕوویەكی جوانی شارستانی و بە ئەتەکێت بوون پێشانی زیارەتكاران و گەشتیارانی ئاسایی بدەین.
