ن/ ئیسماعیل ئیبراهیم
بەشداری كردنی هەڵبژاردن لە مافە سەرەتاییەكانی هەر مرۆڤێكە كە تەمەنی لە رووی یاساییەوە گونجاو و بێ كێشە بێت.
هەڵبژاردن بە یەكێك لە كۆڵەكە سەرەكییەكانی دیموكراسی دادەندرێت، هەڵبژاردنێكی پاك و بێگەرد، بۆ ئەوەی تاكەكانی كۆمەڵگە بە خۆیان نوێنەری خۆیان دیاری بكەن، هەر تاكێك لە رێگەی ئەو دەنگەی دەیدات جگە لەوەی مومارەسەی مافێكی یاسایی خۆی دەكات و رۆڵی دەبێت لە دابینكردن و ئاراستەكردنی سیاسەت و پلانی داهاتووی دەستەڵاتداران لە وڵات، لە هەمانكاتیشدا رووبەڕووی ئاڵەنگارییەكانی چەند ساڵی رابردووی وڵات دەبێتەوە، چ لە رووی سیاسییەوە یا ئابووری و هەر جومگەیەكی دیكەی ژیان لە نیشتمان.
بەشداری نەكردنی هەر تاكێك لە هەڵبژاردن كاریگەری سلبی لەسەر داهاتووی نیشتمان و دەوڵەتداری دەبێت.
بۆیە گرنگە هەموو هاووڵاتییەك بەشداری هەڵبژاردنەكانی وڵات بكات و ڕۆڵی هەبێت لە بنیادنانی داهاتوو، یا دیاریكردنی شێواز و جۆری دەوڵەتمەداری.
ئەو دۆخەی بەهۆی كۆمەڵێك فاكتەری سیاسی و ئابووری باڵی بەسەر كوردستاندا كێشاوە، كە دواجار هەموویان دەگەڕێتەوە بۆ سیاسەتی دوژمنكارانەی داگیركاران و شۆفینیزمی توندڕەوی تورك، فارس و عەرەب، وای كردووە ژمارەیەك لە هاووڵاتییان متمانەیان بە هەڵبژاردنەكان نەبێت و چوون و نەچوونیان وەیەك وێنا بكەن، ئەمە مەترسییە راستەقینەكەیە بەسەر داهاتووی وڵات، بە تایبەتی بۆ توێژی گەنجان، هەموو تاكێك لە نێوشیاندا لاوان دەبێ بە گڕوتینێكی جیا لە جارانەوە بەشداری لە هەڵبژاردنەكان بكەن، بۆ هاتنە ئارای كوردستانێكی بەهێزتر، بەهێز لە ئیدارەدان و نەهێشتنی مەترسییەكان و پیلانی داگیركەران و بەكرێ گیراوانیان، بەشداری كردنیان بۆ نەهێشتنی جیاكاری، نادادی، هێنانە كایە وڵاتێكی دامەزراوەیی لە دامەزراوەكان، بۆ رەخساندنی هەلی كاری زیاتر، بۆ دابینكردنی داهاتوویەكی بەتاڵ لە ئەنفاڵ، لە كیمیاباران، لە روخاندنەوەی گوندەكانمان، لە دوور خستنەوەی پۆستاڵی عەرەب، بۆ بەهێزتر كردنی كوردستانێكی بەتاڵ لە گەندەڵی، لە نادادپەروەری.
دەشێ هەموو تاكێكی ئەم وڵاتە بە چین و توێژی جیاوە گازەندە و رەخنەی هەبێت، بەڵام بەشداری نەكردن لە هەڵبژاردنەكان هیچ لە بابەتەكە ناگۆڕێت و بگرە دۆخەكە خراپتریش دەكات.
بەتایبەتی كە ئێستا پیلانێكی نێودەوڵەتی لە ئارادایە كە رێژەی بەشداربووان لە هەڵبژاردنەكانی داهاتوو نەگاتە ئاستی یاسایی و هەرێمی كوردستان كە كیانێكی سیاسی دان پێدانراوە لە بەردەم مەترسی پیلانی لاواز كردن تا ئەندازەی نەهێشتنی دایە.
دەشێ گەندەڵی و نادادپەروەری چارەسەر بكرێت، دەشێ هەڵی كار بێتە ئاراوە، دەشێ بواری تەندروستی و پەروەردە لەبارە و رێكبخرێتەوە، دەشێ زیاتر لە رابردوو خزمەتی هاووڵاتییان و كوردستانێكی بەهێزتر بكرێت، بەو مەرجە ماڵەگەورەكەمان لەدەست نەچێت، كە كوردستانە.
كاتێ كوردستان و كیانی سیاسیمان نەما، هەموو خەوشەكان زیاتر و قوڵتر دەبنەوە، لەسەرووی هەموو ئەوانەش سووكایەتیكردن و بێ سەروو شوێنكردنی لاوانمان وەك بەر لە راپەڕین سەرهەڵدەداتەوە.
بۆ رێگری كردن لە هەتكردنی شكۆی نەتەوەیی، نەهێشتنی لاقەكردنی ئافرەتانمان لە زیندانەكان بە بەرچاوی هاوسەر، برا و باوكیان، دەبێ دەست بە پایەكانی وڵاتەوە بگرین.
ئەم وتانەی من لە سۆنگەی هەستكردنە بە بەرپرسیارییەت لە ئاست نیشتمان، لە ئاست خوێنی شەهیدان، لە ئاست فرمێسكی دایكە ئەنفال و بێ سەروو شوێنەكان.
من بەوپەڕی ورە بەرزییەوە بەشداری لە هەڵبژاردنەكان دەكەم و دەنگ بەو لایەنە دەدەم كە دەتوانێت بمپارێزێت، كە دەتوانێت داهاتوویەكی دادپەروەرانە بنیاد بنێت، دەنگ بەو لایەنە دەدەم كە مساوەمە لەسەر بستێك خاكی كوردستان ناكات.
بۆیە داوا لە هەموو تاكێكی ئەم نیشتمانە دەكەم بە تایبەتی سنووری ئیدارەی سەربەخۆی سۆران، سەردانی بنكەكانی كۆمسیۆن بكەن، بۆ دڵنیا بوون لە بێ كیشە بوونی ناوەكانیان.
ئەم داوایەی من مانای وانییە كە خاڵی بم لە تێبینی و رەخنە، بەڵام رەخنەكانم لە وڵاتێكی بەهێز جێگەی خۆی دەگرێت، نەك لە وڵاتێكی داگیركراوی ژێر پۆستاڵی حەسەن پلایس و قەیس غەزعەلی…
