زاری كرمانجی -بارزان:
رێڤەبەریا رۆشنبیری و هونەری یا بارزان ب هەڤكاریا ناڤەندا خانی یا رۆشنبیری و راگەهاندنێ، ئێڤاریەكا رۆشنبیری ل هولا رۆشنبیرییا بلێ سازكر ، هژمارەكا رێڤەبەرێن دەڤەرێ و نڤیسەر و رۆژنامەڤان و ژینگەپارێز و كەسایەتیێن دەڤەرێ پشكداربوون.
ناڤەندا خانێ و رێڤەبەریا رۆشنبیری و هونەری یا بارزان د ئێكەم وێستگەها خۆدا سەردانا مەزارێ نەمران كر ل بارزان و ژلایێ شێخ خەلات بارزانی، نوێنەرێ سەرۆك بارزانی ڤە هاتنە پێشوازیكرن و پەیڤەك هاتە خواندن لسەر ژیان و خەباتا بارزانی نەمر. دیڤدا شاندێ ناڤبری سەردانا مۆنۆمێنتا نیشتیمانا بارزانی كر و هەموو پشكێن مۆنۆمێنتی بۆ بەرهەڤبووان هاتنە زەلالكرن ژلایێ ستافێ مۆنۆمێنتێ ڤە.
هەروەسا سمینارەك بۆ دكتۆر بێكەس بریفكان، رێڤەبەرێ گشتیێ شوینواران ل پارێزگەها دهۆك هاتە رێكخستن ل ژێر ناڤێ (شكەفتا شانەدەر و گرنگیا وێ یا شوینواری و گەشتوگوزاری، پاشی سمینارەك بۆ نڤیسەر فاخر عەلی عارف، ل ژێر ناڤێ ڤەخواندنەك مەعریفی بۆ مەم و زینا خانی. رۆمانا نڤیسەر كرمانج چالی هاتە ئیمزاكرن بۆ بەرهەڤبووان ب ناڤێ (مەلە فەخری) كۆ نوی هاتیە چاپكرن و بەلاڤكرن، كۆمەكا پەرتووكێن نڤیسەرێن پارێزگەها دهۆك و نڤیسەرێن دەڤەرا بارزان دناڤ دیدارێ دا هاتنە بەلاڤكرن لسەر بەرهەڤبووان، هەردوو لایا پشتی گفتۆگویەكاڤەكری لسەر بوارێ رۆشنبیری بڕیادان كو ئەڤ دیدارە بەردەوام بن بۆ پتر ناساندنا بەرهەمێن نڤیسەرێن دەڤەرێ و تێكەلبوونا كلتوورێ دەڤەران.
