ئەڤین بارزانی
پشتی شەرێ جیهانی یێ دویێ، رەوشەكا گەلەك جودا ل دەڤەرێ هەبوو، هەمی پەیمان و رێككەفتنێن كو هاتنە كرن كورد تێدا پشكدار نەبوون، ل رۆژهەڵاتا ناڤین ل سەر بنەمایێ نەبوونا ئیرادا گەلێ نەخشێ دەڤەرێ هاتە دانان و كورد تێدا وەك نەتەوەك پشكدار نەبوون، ل باشورێ كوردستانێ هندەك هێزێن كوردی هەبوون لێ د وێ ئاستێ دا نەبوون بشێن رێبەراتیا نەتەوەكێ بكەن، د دەمەكێ وەسا هەستیار دا كو دوژمنان لسەر بنەمایێ نەبوونا نەتەوا كورد كار دكرن، هێڤیەك مەزن بۆ گەلێ كورد هاتە پێش، ب سەرۆكاتیا بارزانیێ نەمر مەزنترین هێزا مودێرن و نەتەوەی یا كوردی هاتە دامەزراندن.
پارتا دیموكراتا كوردستانێ، ب دامەزراندنا خوە بۆ هەمی دوژمنان سەلماند كو كورد ژناڤ ناچن، ب دامەزراندنا وێ پارتێ بارزانیێ نەمر و هەڤاڵێن وی دەست ب قۆناغەكا نوو كرن دا ژێرخانەكێ بۆ پاشەڕۆژا گەلێ هەری بندەست یێ رۆژهەڵاتا ناڤین ئانكۆ گەلێ كورد دروست بكەن، ژ بەر هندێ ژی گەلەك سروشتیە هەر ژ رۆژا كو پارتی هاتیە دامەزراندن هەتا نها پیلان ل دووڤ پیلانێ ل سەر پارتی دهێنە گێڕان و ئارمانجا وان ژناڤبرنا پارتی بوویە، لێ وەك جەنابێ سەرۆك بارزانی ژی دبێژیت: پارتی دار بەڕویە، نە ب سوتنێ و نە ژی ب بڕینێ ژناڤ ناچیت.
پارتا دیموكراتا كوردستانێ گەلەك دەستكەفتێن مەزن پێشكێش گەلێ خوە كرنە، سەرهلدانا ساڵا ١٩٩١ و ئاڤابوونا هەرێما كوردستانێ ئێكە ژ دەستكەفتێن خەباتا وێ پارتێ، هەروەسا بوو جارا ئێكێ د دیرۆكا كوردستانێ دا سەركردە و مەرجەعێ گەلێ كوردستانێ سەرۆك بارزانی، شیا سەركێشیا مەزنترین روودانا دیرۆكی بكەت كو ئەو ژی ریفراندۆم بوو، راستە ژ بەر پیلانێن ناڤخوە و دەرەكی یا مە كوردان دڤیا جارێ بدەستڤە نەهاتیە، لێ هەر كەس دزانیت كو ریفراندۆمێ چ كاریگەریا خوە هەبوویە و دێ جیلێن داهاتی شانازیێ ب ریفراندۆمێ و ئەنجامێن وێ كەن.
ئەڤرۆكە ئەم د دەمەكێ دا رۆژا ١٦ ێ تەباخێ پیرۆز دكەین كو گەلەك پیلان ل دژی هەرێما كوردستانێ و پارتی دهێنە گێڕان، هندەك هێزێن ب ناڤ كوردی ژی ل هەرێما كوردستانێ هاریكاریا دۆژمنێن گەلێ كوردستانێ دكەن، چونكی وان ژ بلی دژبەریا پارتی چو بەرنامەكا دی نینە، لێ پارتی گەلەك ژ هندێ مەزنترە كو خوە بوو تشتێن وەسا مژیل بكەت، خەباتا ٧٧ سالێن بۆری یا پارتی سەلماندیە پارتی ئەو هێزە نینە وەسا زوو لاواز ببت و ژناڤ بچیت، د شەرێ ل دژی مەزنترین رێكخستنا تیرۆرستی ل سەر ئاستێ جیهانێ دا پێشمەرگێن رێبازا پیرۆز یا بارزانی جارەكا دن بۆ نەیارێن گەلێ كوردستانێ سەلماند كو ئیرادە ل سەر هەمی تشتەكێ دایە.
د دووماهیێ دا من دڤێت بێژم ئەڤرۆكە پتر ژ هەر دەمەكێ پێدڤیا كوردستانێ ب پارتی هەیە، هەبوونا وێ وەكو مەزنترین هێزا سیاسی ل سەر ئاستێ هەر چار پارچێن كوردستانێ بوو پاشەڕۆژا گەلێ مە گەلەك گرنگە، پارتی و كوردستان ئێكن و بهێزبوونا پارتی ئانكۆ بهێزبوونا كوردستانێ، جارەكا دن ڤێ رۆژا پیرۆز ل سەرۆك بارزانی، خێزانێن شەهیدان و هەمی گەلێ كوردستانێ پیرۆز دكەم و هێڤیدارم د دەمەكێ نێزیك دا ل سەر دەستێ پارتی مەزنترین خەونا گەلێ كورد ژی ببیتە راستی.
